ഡബിള്‍ ഡെക്കര്‍ ബസുകള്‍ക്ക് ഇളവ് നല്‍കിയതിനെതിരേ കോടതി
Tuesday, January 28, 2025 6:46 AM IST
കൊച്ചി: മൂന്നാറില്‍ ഓടുന്ന കെഎസ്ആര്‍ടിസി ഡബിള്‍ ഡെക്കര്‍ ബസുകള്‍ക്ക് മാനദണ്ഡങ്ങളില്‍ ഇളവുകള്‍ നല്‍കിയതിനെതിരേ ഹൈക്കോടതി. ഡിസംബര്‍ 28ന് സര്‍ക്കാര്‍ പുറപ്പെടുവിച്ച ഉത്തരവില്‍ കോടതി വിശദീകരണം തേടി.
ടൂറിസത്തിന്‍റെ ഭാഗമായി സര്‍വീസ് നടത്തുന്ന കെഎസ്ആര്‍ടിസി റോയല്‍വ്യൂ ബസുകളില്‍ അനുവദനീയമായതിലും അധികം ലൈറ്റുകളുണ്ടെന്ന് ദൃശ്യങ്ങള്‍ പരിശോധിച്ചു കോടതി വിലയിരുത്തി.
നാല് ഹെഡ്‌ലൈറ്റുകള്‍ക്കു പകരം ആറെണ്ണമുണ്ട്. മോട്ടോര്‍ വാഹന നിയമത്തിനു വിരുദ്ധമായി പാസഞ്ചര്‍ കാബിനിലടക്കം ബഹുവര്‍ണ ലൈറ്റുകള്‍ ഘടിപ്പിച്ചിരിക്കുന്നു. സൈഡ് വിന്‍ഡോ ഗ്ലാസ്, വീല്‍ ആര്‍ച്ച് എന്നിവിടങ്ങളിലും ലൈറ്റുണ്ട്.
മറ്റു വാഹനങ്ങള്‍ക്കു മാത്രമല്ല സ്വന്തം വാഹനത്തിനും അപകടമുണ്ടാക്കാവുന്നതാണ് ഈ പരിഷ്‌കാരങ്ങളെന്നും ഡിവിഷന്‍ ബെഞ്ച് ചൂണ്ടിക്കാട്ടി.
മാനദണ്ഡങ്ങളില്‍ ഇളവ് നല്‍കി സര്‍ക്കാര്‍ ഉത്തരവിറക്കിയ കാര്യം തുടര്‍ന്ന് കെഎസ്ആര്‍ടിസി സ്റ്റാന്‍ഡിംഗ് കോണ്‍സല്‍ ചൂണ്ടിക്കാട്ടി. കേന്ദ്ര നിയമം ഉള്‍പ്പെടെ ബാധകമായ വിഷയത്തില്‍ സംസ്ഥാനം ഇളവ് നല്‍കുന്നതെങ്ങനെയെന്ന് കോടതി ചോദിച്ചു. തുടര്‍ന്നാണ് ഉത്തരവിനെക്കുറിച്ച് വിശദീകരണം തേടിയത്.
സ്വകാര്യ കോണ്‍ട്രാക്‌ട് കാര്യേജുകള്‍ രൂപമാറ്റം നടത്തി ഓടിച്ചാല്‍ ഡ്രൈവറെയും ഉടമയെയും ബോഡി ബില്‍ഡറെയും പ്രോസിക്യൂട്ട് ചെയ്യാന്‍ നടപടി വേണ്ടതാണെന്ന് ഹൈക്കോടതി വാക്കാല്‍ പറഞ്ഞു.
ഇതിനു മുന്നോടിയായി അന്വേഷണവും വേണം. ചുറ്റിനും ലൈറ്റുകളും മുന്‍വശത്തെ ചില്ലില്‍ ഉള്‍പ്പെടെ സ്റ്റിക്കറുകളും പതിച്ച് രൂപമാറ്റം വരുത്തിയ ‘സിങ്കം’, ‘വയനാടന്‍’ എന്നീ ടൂറിസ്റ്റ് ബസുകളുടെ വ്ലോഗുകള്‍ തുറന്ന കോടതിയില്‍ കാണിച്ചു. രജിസ്ട്രേഡ് ഉടമകളെ കേസില്‍ കക്ഷി ചേര്‍ക്കാനും നിര്‍ദേശിച്ചു.