പൊതുഗതാഗതം തടസപ്പെടുത്തി ധര്‍ണ; ഹൈക്കോടതിയില്‍ കൊച്ചി സിറ്റി പോലീസ് മാപ്പ് പറഞ്ഞു
Wednesday, January 29, 2025 3:40 AM IST
കൊച്ചി: കോണ്‍ഗ്രസ് പ്രവര്‍ത്തകര്‍ പൊതുഗതാഗതം തടസപ്പെടുത്തി കൊച്ചിയില്‍ നടത്തിയ ധര്‍ണയുമായി ബന്ധപ്പെട്ട് സിറ്റി പോലീസ് കമ്മീഷണര്‍ ഹൈക്കോടതിയില്‍ മാപ്പപേക്ഷിച്ചു.
കൊച്ചി കോര്‍പറേഷന്‍ ഓഫീസിനു മുന്നില്‍ ഫുട്പാത്ത് അടക്കം കൈയേറി നടത്തിയ ധര്‍ണയുമായി ബന്ധപ്പെട്ട വീഴ്ചകളിലാണ് കമ്മീഷണര്‍ പുട്ട വിമലാദിത്യ നിരുപാധികം മാപ്പപേക്ഷ നടത്തിയത്.
കോടതിയലക്ഷ്യ നടപടികളുമായി ബന്ധപ്പെട്ട് ഫെബ്രുവരി പത്തിന് നേരിട്ടു ഹാജരാകണമെന്ന് ഡിവിഷന്‍ബെഞ്ച് നിര്‍ദേശിച്ച സാഹചര്യത്തിലാണ് നടപടികളില്‍നിന്ന് ഒഴിവാക്കണമെന്ന ആവശ്യമുന്നയിച്ച് കമീഷണറുടെ മാപ്പപേക്ഷ.
ധര്‍ണയ്ക്കു നേതൃത്വം നല്‍കിയ ഡിസിസി പ്രസിഡന്‍റ് മുഹമ്മദ് ഷിയാസ് ഉള്‍പ്പെടെ 150 പേര്‍ക്കെതിരേ പോലീസ് സ്വമേധയാ കേസെടുത്തിട്ടുണ്ട്. സെന്‍ട്രല്‍ പോലീസ് എസ്.എച്ച്.ഒ അനീഷ് ജോയ് അന്വേഷണം നടത്തുകയാണ്.
മേയറുടെ രാജിയാവശ്യപ്പെട്ട് കോണ്‍ഗ്രസ് നടത്തിയ പ്രതിഷേധമായിരുന്നു. തിടുക്കത്തില്‍ നടപടിയെടുക്കുന്നത് ക്രമസമാധാന പ്രശ്‌നങ്ങള്‍ക്ക് ഇടയാക്കുമെന്ന നിഗമനത്തിലാണു സംയമനം പാലിച്ചത്. ഇതില്‍ വീഴ്ച പറ്റിയിട്ടുണ്ട്.
ധര്‍ണയില്‍ അനിഷ്‌ട സംഭവങ്ങളുണ്ടാകാതെ ജാഗ്രത പുലര്‍ത്തിയിരുന്നു. ഭാവിയില്‍ ഇത്തരം പ്രശ്‌നങ്ങള്‍ ആവര്‍ത്തിക്കാതിരിക്കാന്‍ പോലീസിന് മാര്‍ഗനിര്‍ദേശങ്ങൾ നല്‍കിയിട്ടുണ്ടന്നും കമ്മീഷണര്‍ അറിയിച്ചു.