പ്രതീക്ഷയായത് ഫുട്ബോൾ മാത്രം: ഐ.എം. വിജയൻ
Thursday, January 30, 2025 3:50 AM IST
തൃശൂർ: ഫുട്ബോൾ മാത്രമായിരുന്നു ജീവിതത്തിലെ ഏക പ്രതീക്ഷയെന്നും അതില്ലായിരുന്നെങ്കിൽ അച്ഛനെപ്പോലെ കൂലിപ്പണിക്കു പോകേണ്ടിവരുമായിരുന്നെന്നും മുൻ ഇന്ത്യൻ ഫുട്ബോൾ താരം ഐ.എം. വിജയൻ. പദ്മശ്രീ നൽകി രാജ്യം ആദരിച്ചതിനുപിന്നാലെ തൃശൂർ പ്രസ് ക്ലബിന്‍റെ ‘മീറ്റ് ദ പ്രസ്’ പരിപാടിയിൽ സംസാരിക്കുകയായിരുന്നു അദ്ദേഹം.
ചെറുപ്പത്തിൽ ചാത്തുണ്ണി സാറിനെപ്പോലെ കുറേയാളുകൾ പഠിപ്പിച്ചു. അവിടെനിന്ന് 17-ാം വയസിൽ എത്തിയത് കേരള പോലീസ് ഫുട്ബോൾ ക്ലബ് എന്ന പുലിമടയിലാണ്. ഇന്ത്യയിലെ മുൻനിര കളിക്കാർക്കൊപ്പമായിരുന്നു പരിശീലനം. കേരള പോലീസിനൊപ്പം നിൽക്കാൻ കഴിഞ്ഞതാണ് ഏറ്റവും വലിയ ആത്മവിശ്വാസം.
ഞങ്ങൾ കളി തുടങ്ങുന്പോൾ ഫുട്ബോളിനെക്കുറിച്ച് വലിയ അറിവുണ്ടായിരുന്നില്ല. ഐഎസ്എൽ പോലുള്ള മത്സരങ്ങൾ വന്നതോടെ കുട്ടികൾക്കു കൂടുതൽ അവസരം ലഭിക്കുന്നു.
സ്പോർട്സ് ക്വാട്ടയിൽ ഏറ്റവും കൂടുതൽ സർക്കാർ ജോലി നൽകുന്ന സംസ്ഥാനം കേരളമാണെന്നും വിജയൻ പറഞ്ഞു.
വിരമിക്കലിനുശേഷം സിനിമയിൽ വിളിച്ചാൽ അഭിനയിക്കും. രാഷ്‌ട്രീയത്തിലേക്കില്ല. ഫുട്ബോൾ അക്കാഡമിയെന്ന സ്വപ്നമുണ്ട്. മന്ത്രിമാർ സഹായിക്കാമെന്ന് അറിയിച്ചിട്ടുണ്ട്. ഏപ്രിൽ 30നു വിരമിക്കും. അതോടൊപ്പം പത്മശ്രീ ലഭിച്ചതിൽ ഏറെ അഭിമാനിക്കുന്നു. ഇന്ത്യ ലോകകപ്പിൽ കളിക്കണമെന്നാണ് ആഗ്രഹമെന്നും ഐ.എം. വിജയന്‍ പറഞ്ഞു.