deepika.com : Kerala|National|International|Sports|Business News

വയനാട് ഉരുൾപൊട്ടൽ: രക്ഷാപ്രവർത്തനത്തിന് കേന്ദ്രത്തിനു കൊടുക്കണം 13.65 കോടി

തിരുവനന്തപുരം: വയനാട് ദുരന്തവുമായി ബന്ധപ്പെട്ട് ഹെലികോപ്റ്റർ ഉൾപ്പെടെയുള്ളവ ഉപയോഗിച്ചുള്ള രക്ഷാപ്രവർത്തനത്തിനും ദുരിതാശ്വാസ പ്രവർത്തനത്തിനുമായി 13.65 കോടി രൂപ വേണമെന്നു കേരളത്തോടു കേന്ദ്രസർക്കാർ.

വയനാട് ഉരുൾപൊട്ടൽ ദുരന്തമുണ്ടായ ജൂലൈ 30 മുതൽ ഓഗസ്റ്റ് പകുതി വരെ വിവിധ സേനാ വിഭാഗങ്ങളെ ഉപയോഗിച്ചുള്ള ദുരിതാശ്വാസ പ്രവർത്തനങ്ങൾക്കും എയർ ലിഫ്റ്റിംഗ് വഴിയുള്ള രക്ഷാപ്രവർത്തനത്തിനുമായി 13.65 കോടി രൂപ നൽകണമെന്നാവശ്യപ്പെട്ടു കേന്ദ്ര പ്രതിരോധ മന്ത്രാലയം, സംസ്ഥാന ചീഫ് സെക്രട്ടറിക്കു കത്തു നൽകി.

2018ലെ പ്രളയം മുതൽ വ്യോമസേന വിവിധ ഘട്ടങ്ങളിൽ കേരളത്തിനു നൽകിയ രക്ഷാപ്രവർത്തനത്തിന് 132.6 കോടി രൂപ സംസ്ഥാന സർക്കാർ, കേന്ദ്രത്തിനു നൽകാനുണ്ടെന്നും കത്തിൽ പറയുന്നു.

വയനാട് പുനർനിർമാണ പ്രവർത്തനങ്ങൾക്കു കേന്ദ്രസഹായം തേടി സംസ്ഥാനം തുടർച്ചയായി കത്തു നൽകുന്ന സാഹചര്യത്തിലാണ് രക്ഷാ പ്രവർത്തനങ്ങളുടെ ഭാഗമായുള്ള എയർ ലിഫ്റ്റിംഗ് അടക്കമുള്ളവയ്ക്കു ചെലവായ തുക മടക്കി നൽകണമെന്ന് ആവശ്യപ്പെട്ടു കേന്ദ്രം, കേരളത്തിനു കത്തു നൽകിയത്.

ദുരന്തത്തിനു ശേഷമുള്ള പുനർനിർമാണത്തിനും പുനരധിവാസ പ്രവർത്തനങ്ങൾക്കുമായുള്ള പോസ്റ്റ് ഡിസാസ്റ്റർ നീഡ് അസസ്മെന്‍റ് റിപ്പോർട്ട് (പിഡിഎൻഎ) കേരളം സമർപ്പിക്കാത്ത സാഹചര്യത്തിലാണ് കേന്ദ്രത്തിന്‍റെ പ്രത്യേക സാന്പത്തികസഹായ പാക്കേജ് പ്രഖ്യാപിക്കാത്തതെന്നാണ് ആഭ്യന്തര മന്ത്രി അമിത്ഷാ കഴിഞ്ഞ ദിവസം പാർലമെന്‍റിൽ അറിയിച്ചത്.

ദുരിതാശ്വാസ പ്രവർത്തനങ്ങൾക്കായി 1200 കോടിയുടെ പ്രാഥമിക സഹായം ആവശ്യപ്പെട്ട് ഓഗസ്റ്റ് 17ന് സംസ്ഥാന സർക്കാർ ആദ്യനിവേദനം നൽകിയിരുന്നു.

പിന്നീട് നവംബർ 13നാണ് പിഡിഎൻഎ റിപ്പോർട്ട് കേന്ദ്രത്തിനു സമർപ്പിക്കാനായത്. റിക്കവറി ആൻഡ് റീകണ്‍സ്ട്രക്‌ഷൻ എസ്റ്റിമേറ്റായി മേപ്പാടിക്ക് 2,221 കോടി രൂപയും വിലങ്ങാടിന് 98.1 കോടി രൂപയും വേണമെന്നായിരുന്നു പിഡിഎൻഎ റിപ്പോർട്ടിൽ ആവശ്യപ്പെട്ടിരുന്നത്.

നാടിന്‍റെ പൊന്നോമനകൾക്കു കണ്ണീരിൽ കുതിർന്ന യാത്രാമൊഴി

കല്ലടിക്കോട്: പനയന്പാടം ലോറിയപകടത്തിൽ മരിച്ച വിദ്യാർഥിനികൾക്കു നാടിന്‍റെ കണ്ണീരിൽ കുതിർന്ന യാത്രാമൊഴി. മൃതദേഹങ്ങൾ വീടുകളിലെത്തിച്ചപ്പോൾ രക്ഷിതാക്കളുടെയും ബന്ധുക്കളുടെയും ദുഃഖം അണപൊട്ടി. ഹൃദയഭേദകമായ കാഴ്ച ഏവരുടെയും കണ്ണുനനയിച്ചു.

കരിന്പ ചെറുള്ളി സ്വദേശികളായ ആയിഷ, റിദ ഫാത്തിമ, ഇർഫാന, നിദ ഫാത്തിമ എന്നിവരുടെ മൃതദേഹങ്ങൾ ഇന്നലെ പുലർച്ചെ അഞ്ചരയോടെ പാലക്കാട് ജില്ലാ ആശുപത്രി മോർച്ചറിയിൽനിന്ന് പോലീസ് അകന്പടിയോടെ നാല് ആംബുലൻസുകളിലായി വീടുകളിലേക്കു കൊണ്ടുവന്നു.

ചെറുള്ളിയിൽ ആയിഷയുടെ വീടാണ് ആദ്യം. തുടർന്നങ്ങോട്ട് റിദ, ഇർഫാന, നിദ ഫാത്തിമ എന്നിവരുടെ വീടുകൾ... ദിവസേന സ്കൂളിലേക്ക് ഒരുമിച്ചു പോയിവന്നിരുന്ന കൂട്ടുകാരികളുടെ ചേതനയറ്റ ശരീരം നിരനിരയായി തുപ്പനാട് ചെറുള്ളിയിലേക്കെത്തുന്പോൾ ഗ്രാമം കണ്ണീരിൽ കുതിർന്നിരുന്നു. വീടുകളിൽനിന്ന് എട്ടോടെ മൃതദേഹങ്ങൾ തുപ്പനാട് ദേശീയപാതയോരത്തെ കരിന്പനയ്ക്കൽ ഹാളിലേക്ക് ആംബുലൻസിൽ കൊണ്ടുവന്നു.

8.20ന് ഹാളിൽ പൊതുദർശനം. അതിനു മുന്പേതന്നെ നാടുമുഴുവൻ കരിന്പനയ്ക്കൽ ഹാളിലേക്ക് ഒഴുകിത്തുടങ്ങിയിരുന്നു. തിരക്ക് നിയന്ത്രിക്കാൻ പോലീസ് പാടുപെട്ടു. ഹാളിന്‍റെ വളപ്പും കവിഞ്ഞ് റോഡിന്‍റെ ഇരുവശങ്ങളിലേക്കും വരികൾ നീണ്ടതോടെ പലപ്പോഴും ദേശീയപാതയിലെ ഗതാഗതം തടസപ്പെട്ടു. അവസാനമായി ഒരു നോക്കുകണ്ടവർ പിരിഞ്ഞുപോകാതെ അന്ത്യയാത്രയ്ക്കു സാക്ഷ്യം വഹിക്കാൻ സമീപത്തെ കെട്ടിടങ്ങളിലും മറ്റുമായി വിതുന്പലോടെ ഒതുങ്ങിനിന്നു.

പ്രിയമക്കളുടെ മൃതദേഹങ്ങൾക്കരികിലായി രക്ഷിതാക്കളുടെ ഉള്ളുലഞ്ഞുള്ള ഇരിപ്പ് കണ്ടുനിന്നവരുടെ കണ്ണുകളെ ഈറനണിയിച്ചു. കൂട്ടുകാരികളെ കാണാനായി വന്ന കരിന്പ ഗവ. ഹയർസെക്കൻഡറി സ്കൂളിലെ വിദ്യാർഥികളും, അധ്യാപകരും വിതുന്പുന്നതും സങ്കടക്കാഴ്ചയായി.

ചില കുട്ടികൾ അലമുറയിട്ടുകരഞ്ഞു. കുടുംബാംഗങ്ങളെയും കൂട്ടുകാരികളെയും ആശ്വസിപ്പിക്കാൻ ആർക്കുമായില്ല.

പൊതുദർശനം പത്തുവരെയാണ് നിശ്ചയിച്ചിരുന്നതെങ്കിലും തിരക്കുമൂലം 10.30 വരെ നീണ്ടു. ശേഷം മൃതദേഹങ്ങൾ തുപ്പനാട് ജുമാമസ്ജിദിലേക്കു കൊണ്ടുപോയി. മതപരമായ ചടങ്ങുകൾക്കുശേഷം 10.50ന് കബർസ്ഥാനിലെത്തിച്ചു. അടുത്തടുത്തായുള്ള കബറുകളിലാണ് നാലുപേരെയും സംസ്കരിച്ചത്.

എയ്ഡഡ് ‌മേഖലയിലെ നിയമനം; സർക്കുലർ പിൻവലിച്ചു

തിരുവനന്തപുരം: എയ്‌ഡഡ് സ്കൂൾ മേഖലയിലെ ജീവനക്കാരുടെ നിയമനവുമായി ബന്ധപ്പെട്ട് നവംബർ 30നു പൊതുവിദ്യാഭ്യാസ വകുപ്പ് ഇറക്കിയ വിവാദ സർക്കുലർ പിൻവലിച്ചു.

ഈ സർക്കുലറിലെ നിർദേശങ്ങൾ നിർത്തിവച്ചുകൊണ്ടുള്ള ഉത്തരവ് ഇന്നലെ ഇറങ്ങി. എയ്ഡഡ് സ്കൂൾ നിയമനം തന്നെ പ്രതിസന്ധിയിലാക്കുന്നതായിരുന്നു സർക്കുലർ. വിദ്യാഭ്യാസ മന്ത്രിയുടെ നിർദേശാനുസരണം പൊതുവിദ്യാഭ്യസ ഡയറക്ടർ യോഗം വിളിച്ചിരുന്നു.

സർക്കുലർ പിൻവലിച്ചില്ലെങ്കിൽ ശക്തമായ സമരം ആരംഭിക്കുമെന്ന മുന്നറിയിപ്പ് മാനേജ്മെന്‍റുകൾ യോഗത്തിൽ അറിയിച്ചിരുന്നു.

അറ്റസ്റ്റേഷൻ നടപടിക്ക് ഓഫീസുകൾ സഹകരിക്കുന്നില്ലെന്ന് ഇന്‍റലിജൻസ്

തിരുവനന്തപുരം: വിദേശ രാജ്യങ്ങളിലേക്കുള്ള വിവിധ സർട്ടിഫിക്കറ്റുകളും രേഖകളും സാക്ഷ്യപ്പെടുത്തി നൽകുന്നതിനുള്ള ആഭ്യന്തര അറ്റസ്റ്റേഷൻ നടപടിയുമായി സർക്കാർ ഓഫീസുകളും സർവകലാശാലകളും സഹകരിക്കുന്നില്ലെന്ന് ഇന്‍റലിജൻസ് മേധാവി. വിവരങ്ങൾ ശേഖരിക്കാൻ സ്പെഷൽ ബ്രാഞ്ച് ഉദ്യോഗസ്ഥർ ഓഫീസുകളിൽ എത്തുന്ന അന്നു തന്നെ ബന്ധപ്പെട്ടവ രേഖാമൂലം നൽകണമെന്ന് ആഭ്യന്തര അഡീഷണൽ ചീഫ് സെക്രട്ടറി ഉത്തരവിട്ടു.

ബന്ധപ്പെട്ട രേഖകൾ സ്പെഷൽ ബ്രാഞ്ച് ഉദ്യോഗസ്ഥർക്കു നൽകുന്നതിൽ വീഴ്ച വരുത്തുന്ന ജീവനക്കാർക്കെതിരേ കടുത്ത അച്ചടക്ക നടപടി സ്വീകരിക്കാനും ആലോചനയുണ്ട്. സ്പെഷൽ ബ്രാഞ്ച് ഉദ്യോഗസ്ഥർ നേരിട്ട് ഓഫീസുകളിലെത്തി സർട്ടിഫിക്കറ്റുകളുടെയും രേഖകളുടെയും ആധികാരികത പരിശോധിക്കാൻ ആവശ്യപ്പെടുന്പോൾ സമയബന്ധിതമായി അതേദിവസം തന്നെ നൽകാൻ വകുപ്പു തലവൻമാരും ഓഫീസ് മേധാവികളും നടപടി സ്വീകരിക്കണമെന്നും നിർദേശത്തിലുണ്ട്.

വിദേശ ജോലിയുടെയും പഠനത്തിന്‍റെയും ആവശ്യാർഥം ജനങ്ങൾ സമർപ്പിക്കുന്ന സർട്ടിഫിക്കറ്റുകളുടെയും രേഖകളുടെയും ആധികാരികത പരിശോധിച്ച് ഉറപ്പുവരുത്തി റിപ്പോർട്ട് നൽകേണ്ട ചുമതല എഡിജിപിയുടെ നിയന്ത്രണത്തിലുള്ള സംസ്ഥാന ഇന്‍റലിജൻസ് വിഭാഗത്തിനാണ്.

ഇത്തരത്തിലുള്ള രേഖകളുടെ ആധികാരിക പരിശോധിക്കാനുള്ള വിവരങ്ങൾ ശേഖരിക്കാൻ സ്പെഷൽ ബ്രാഞ്ച് ഉദ്യോഗസ്ഥർ ബന്ധപ്പെട്ട സർക്കാർ ഓഫീസുകളിലും സർവകലാശാലകളിലും പോയി ആവശ്യപ്പെടുന്പോൾ ചില ഓഫീസുകളിൽനിന്നു വിവരങ്ങൾ രേഖാമൂലം നൽകാൻ വിമുഖത കാണിക്കുന്നതായും ചില വിവരങ്ങൾ വാക്കാൽ മാത്രം പറഞ്ഞുകൊടുക്കുന്നതായും ഇന്‍റലിൻജൻസ് മേധാവി ഓഗസ്റ്റ് 13നു സർക്കാരിനെ അറിയിച്ചിരുന്നു.

ഇതിനാൽ രേഖകളുടെ ആധികാരികത പരിശോധിച്ച് ഉറപ്പാക്കാൻ സെപ്ഷൽ ബ്രാഞ്ചിന് ബുദ്ധിമുട്ടുണ്ടാകുന്നു. ഇതുമൂലം സർക്കാരിലേക്ക് റിപ്പോർട്ട് സമർപ്പിക്കാൻ കാലതാമസം നേരിടുന്നതായും ഇന്‍റലിജൻസ് മേധാവി സർക്കാരിനെ അറിയിച്ചു.

അറ്റസ്റ്റേഷൻ സേവനങ്ങൾ സേവനാവകാശ നിയമത്തിന്‍റെ പരിധിയിൽ ഉൾപ്പെട്ടതിനാൽ സമയബന്ധിതമായി സേവനം ഉറപ്പാക്കേണ്ടതുണ്ട്. എന്നാൽ, ഇതിനാണു പ്രധാനമായി തടസം നേരിടുന്നത്. സർവകലാശാലകളാണ് ഇക്കാര്യത്തിൽ കൂടുതൽ ബുദ്ധിമുട്ട് സൃഷ്ടിക്കുന്നതെന്നും അറിയിച്ചിരുന്നു. ഇതിനു പിന്നാലെയാണ് കർശന നിർദേശം പുറപ്പെടുവിച്ചത്.

നിർദേശത്തിന്‍റെ പകർപ്പ് എല്ലാ അഡീഷണൽ, പ്രിൻസിപ്പൽ സെക്രട്ടറിമാർക്കും ജില്ലാ കളക്ടർമാർക്കും വകുപ്പു മേധാവികൾക്കും കൈമാറി.

കാസയും ക്രോസും സഭയുടെ ഔദ്യോഗിക സംഘടനകളല്ല: മാർ പാംപ്ലാനി

ചിറ്റാരിക്കാൽ (കാസർഗോഡ്): കാസ, ക്രോസ് എന്നിവ സഭയുടെ ഔദ്യോഗിക സംഘടനകളല്ലെന്നും അവരുടെ എല്ലാ പ്രവർത്തനങ്ങളുടെയും ഉത്തരവാദിത്വം സഭയ്ക്കില്ലെന്നും ആർച്ച്ബിഷപ് മാർ ജോസഫ് പാംപ്ലാനി.

അവരുടെ പ്രവർത്തനങ്ങളിലെ നന്മകളെ നമ്മളാരും തള്ളിപ്പറയുന്നില്ല. അതിനെക്കുറിച്ചൊന്നും വിയോജിപ്പില്ല. സഭാ നേതൃത്വവുമായി ഒത്തുപോകുകയാണെങ്കിൽ അവർ ചെയ്യുന്ന നല്ല കാര്യങ്ങളെ പിന്തുണയ്ക്കാൻ തയാറാണ് -അദ്ദേഹം പറഞ്ഞു.

ചിറ്റാരിക്കാലിൽ നടക്കുന്ന തലശേരി അതിരൂപതാതല ദിവ്യകാരുണ്യ കോൺഗ്രസിനോടനുബന്ധിച്ച യു ടോക് യുവജന സിമ്പോസിയത്തിൽ യുവാക്കളുടെ ചോദ്യത്തിനു മറുപടി പറയുകയായിരുന്നു ആർച്ച്ബിഷപ്.

മഴയ്ക്ക് ഇന്നു ശമനമെന്നു കാലാവസ്ഥാ നിരീക്ഷണകേന്ദ്രം

തിരുവനന്തപുരം: സംസ്ഥാനത്ത് പല ജില്ലകളിലും ഇന്നലെ ആര്‍ത്തലച്ചു പെയ്ത മഴയ്ക്ക് ഇന്ന് ശമനമെന്നു കാലാവസ്ഥാ നിരീക്ഷണ കേന്ദ്രം. സംസ്ഥാനത്തെ ഒരു ജില്ലയിലും ഇന്ന് കാലാവസ്ഥാ വകുപ്പ് മഴ മുന്നറിയിപ്പ് നല്കിയിട്ടില്ല.

വെള്ളിയാഴ്ച്ച സംസ്ഥാനത്ത് മൂന്നു ജില്ലകളില്‍ അതി ശക്തമായ മഴ പ്രവചിക്കുന്ന ഓറഞ്ച് അലേര്‍ട്ടും ആറു ജില്ലകളില്‍ ശക്തമായ മഴയ്ക്ക് സാധ്യത കല്പിക്കുന്ന യല്ലോ അലേര്‍ട്ടും പ്രഖ്യാപിച്ചിരുന്നു.

ഇന്നലെ ഇടുക്കി, കൊല്ലം ജില്ലകളിലെ പല സ്ഥലങ്ങളിലും ശക്തമായ മഴയാണ് പെയ്തിറങ്ങിയത്. കൊല്ലം ജില്ലയിലെ ആര്യന്‍കാവില്‍ 15 സെന്‍റീമീറ്റര്‍ മഴയാണ് പെയ്തത്. ഇടുക്കി കോവില്‍കടവില്‍ 12 സെന്‍റീമീറ്റര്‍ മഴ പെയ്തു. പുനലൂര്‍, വട്ടവട, തെന്‍മല, തുടങ്ങിയ സ്ഥലങ്ങളിലെല്ലാം ഇന്നലെ പെയ്തിറങ്ങിയത് ശക്തമായ മഴയായിരുന്നു.

കൈവെട്ടു കേസ്: മുഖ്യപ്രതിക്കു ജാമ്യം

കൊച്ചി: മതനിന്ദ ആരോപിച്ച് തൊടുപുഴ ന്യൂമാന്‍ കോളജിലെ അധ്യാപകന്‍റെ കൈ വെട്ടിയ കേസിലെ മുഖ്യപ്രതി എം.കെ. നാസറിന്‍റെ ശിക്ഷ താത്കാലികമായി മരവിപ്പിച്ച് ഹൈക്കോടതി ജാമ്യം നല്‍കി. നാസര്‍ നല്‍കിയ അപ്പീല്‍ ഫയലില്‍ സ്വീകരിച്ചാണു ഡിവിഷന്‍ ബെഞ്ചിന്‍റെ നടപടി.

ആലുവ കുഞ്ഞുണ്ണിക്കര സ്വദേശിയായ എം.കെ. നാസര്‍ 2015 ലാണ് കോടതിയില്‍ കീഴടങ്ങിയത്. അന്നുമുതല്‍ തടവില്‍ കഴിഞ്ഞ നാസറിനെ യുഎപിഎ ഉൾപ്പെടെയുള്ള കുറ്റകൃത്യത്തിന് എന്‍ഐഎ കോടതി രണ്ടാംഘട്ട വിചാരണ നടത്തി 2013ല്‍ ജീവപര്യന്തം തടവിന് ശിക്ഷിച്ചു.

തടവില്‍ കഴിഞ്ഞ കാലയളവു പരിഗണിച്ച് ജാമ്യം നല്‍കണമെന്നാവശ്യപ്പെട്ട് നാസര്‍ ഹൈക്കോടതിയില്‍ അപ്പീല്‍ നല്‍കി. ഒമ്പതു വര്‍ഷം ജയിലില്‍ കഴിഞ്ഞു എന്ന ഹര്‍ജിക്കാരന്‍റെ വാദവും സമാന കുറ്റം ചെയ്ത കൂട്ടുപ്രതികള്‍ അഞ്ചു വര്‍ഷം തടവുശിക്ഷയനുഭവിച്ച് മോചിതരായെന്നതും കണക്കിലെടുത്താണ് ജസ്റ്റീസുമാരായ വി. രാജാ വിജയരാഘവന്‍, പി.വി. ബാലകൃഷ്ണന്‍ എന്നിവരുള്‍പ്പെട്ട ഡിവിഷന്‍ ബെഞ്ചിന്‍റെ ഉത്തരവ്. ജീവിക്കാനുള്ള മൗലികാവകാശം മുന്‍നിര്‍ത്തിയാണു നാസറിന് ജാമ്യം അനുവദിക്കുന്നതെന്ന് കോടതി വ്യക്തമാക്കി.

ഒരു ലക്ഷം രൂപയുടെ സ്വന്തം ബോണ്ടും തത്തുല്യമായ രണ്ട് ആള്‍ജാമ്യവുമാണ് മുഖ്യവ്യവസ്ഥ. പ്രതി രാജ്യം വിടരുതെന്നും ശേഷിക്കുന്ന വിചാരണയില്‍ ഇടപെടരുതെന്നും സാക്ഷികളെ സ്വാധീനിക്കരുതെന്നും മറ്റു കുറ്റകൃത്യങ്ങളില്‍ ഏര്‍പ്പെടരുതെന്നും കോടതി നിർദേശിച്ചു. പ്രതിയുടെ ശിക്ഷ ഇനി അപ്പീലുകളിലെ തീര്‍പ്പിനു വിധേയമായിരിക്കും.

2010 ജൂലൈ നാലിനാണു ചോദ്യപേപ്പറിലെ മനനിന്ദ ആരോപിച്ച് അധ്യാപകനായ പ്രഫ. ടി.ജെ. ജോസഫിന്‍റെ വലതു കൈപ്പത്തി ഒരുസംഘം പോപ്പുലര്‍ഫ്രണ്ട് പ്രവര്‍ത്തകര്‍ വെട്ടിമാറ്റിയത്. കേസില്‍ 31 പ്രതികള്‍ വിചാരണ നേരിട്ടതില്‍ കൊച്ചിയിലെ എന്‍ഐഎ കോടതി 13 പ്രതികളെ ശിക്ഷിക്കുകയും 18 പ്രതികളെ 2015ല്‍ വെറുതെ വിടുകയും ചെയ്തു.

ഏതു വസ്ത്രം ധരിക്കണമെന്നത് സ്ത്രീയുടെ സ്വാതന്ത്ര്യം: കോടതി

കൊച്ചി: ഏതു വസ്ത്രം ധരിക്കണമെന്നത് സ്ത്രീയുടെ സ്വാതന്ത്ര്യമാണെന്ന് ഹൈക്കോടതി. അതു കോടതിയുടെ മോറല്‍ പോലീസിംഗിനു വിധേയമാക്കേണ്ടതില്ലെന്നും ജസ്റ്റീസുമാരായ ദേവൻ രാമചന്ദ്രനും എം.ബി. സ്‌നേഹലതയും അടങ്ങിയ ഡിവിഷൻ ബെഞ്ച് അഭിപ്രായപ്പെട്ടു.

ധരിക്കുന്ന വസ്ത്രമടക്കം കണക്കിലെടുത്ത് കുട്ടികളുടെ കസ്റ്റഡി നിഷേധിച്ച കുടുംബക്കോടതി ഉത്തരവിനെതിരേ രണ്ടു കുട്ടികളുടെ അമ്മ നല്‍കിയ ഹര്‍ജിയിലാണു കോടതി നിരീക്ഷണം.

സ്ത്രീയെ, അവര്‍ ധരിക്കുന്ന വസ്ത്രത്തിന്‍റെ അടിസ്ഥാനത്തില്‍ വിലയിരുത്തരുത്. വ്യക്തിപരമായ അഭിപ്രായം വിധിന്യായങ്ങളില്‍ ഉണ്ടാകരുത്. ഭരണഘടനയുടെ 75-ാം വാര്‍ഷികം ആഘോഷിക്കുമ്പോഴാണ് ഇത്തരമൊരു നിരീക്ഷണം നടത്തേണ്ടിവരുന്നത് എന്നതു നിര്‍ഭാഗ്യകരമാണെന്നും കോടതി പറഞ്ഞു. വിവാഹമോചനം നേടിയ യുവതിയാണ് കുട്ടികളുടെ കസ്റ്റഡി നിഷേധിച്ചതിനെതിരേ ഹൈക്കോടതിയില്‍ എത്തിയത്.

ശരീരം വെളിപ്പെടുത്തുന്ന വസ്ത്രങ്ങള്‍ ധരിക്കുന്നു, ഡേറ്റിംഗ് ആപ്പിൽ ഫോട്ടോ പ്രസിദ്ധീകരിച്ചു, പുരുഷസുഹൃത്തുക്കള്‍ക്കൊപ്പം സമയം ചെലവഴിക്കുന്നു തുടങ്ങിയ കാരണങ്ങളുടെ പേരിലാണ് കുട്ടികളുടെ കസ്റ്റഡി കുടുംബക്കോടതി നിഷേധിച്ചത്. വിവാഹമോചനം സുഹൃത്തുക്കളോടൊപ്പം ആഘോഷിച്ചതിനെയും കുടുംബക്കോടതി കുറ്റപ്പെടുത്തിയിരുന്നു.

വിവാഹമോചിതകളെല്ലാം സങ്കടപ്പെട്ടു കഴിയണമെന്ന കുടുംബക്കോടതിയുടെ വിലയിരുത്തല്‍ അംഗീകരിക്കാനേ ആകില്ലെന്നും ഡിവിഷൻ ബെഞ്ച് പറഞ്ഞു.

കുട്ടികളുടെ താത്പര്യം അമ്മയോടൊപ്പം കഴിയാനാണ്. അവധിസമയത്തു പിതാവിനോടൊപ്പം പോകാനും ആഗ്രഹമുണ്ടെന്ന് കുട്ടികള്‍ അറിയിച്ചു. ഇതും കണക്കിലെടുത്ത് കുടുംബക്കോടതി ഉത്തരവ് റദ്ദാക്കി കുട്ടികളുടെ കസ്റ്റഡി ഹൈക്കോടതി അമ്മയ്ക്കു നല്‍കി.

പനയന്പാടം അപകടം; ആക്‌ഷൻ പ്ലാൻ തയാറാക്കും: മന്ത്രി കെ. കൃഷ്ണൻകുട്ടി

പാലക്കാട്: കല്ലടിക്കോട് പനയന്പാടത്ത് നാലു വിദ്യാർഥിനികളുടെ മരണത്തിനിടയാക്കിയ അപകടസ്ഥലത്തു ബന്ധപ്പെട്ട വകുപ്പുതല ഉദ്യോഗസ്ഥർ ഇന്നു സ്ഥലപരിശോധന നടത്തും. പ്രദേശവാസികളുടെ അഭിപ്രായംകൂടി കണക്കിലെടുത്ത് ആക്‌ഷൻ പ്ലാൻ തയാറാക്കുമെന്നും സമയബന്ധിതമായി ആക്‌ഷൻ പ്ലാൻ നടപ്പാക്കുമെന്നും മന്ത്രി കെ. കൃഷ്ണൻകുട്ടി അറിയിച്ചു.

അപകടത്തിന്‍റെ പശ്ചാത്തലത്തിൽ മന്ത്രി കെ. കൃഷ്ണൻകുട്ടിയുടെ അധ്യക്ഷതയിൽ കളക്ടറേറ്റ് കോണ്‍ഫറൻസ് ഹാളിൽ ചേർന്ന അടിയന്തരയോഗത്തിലാണു മന്ത്രി ഇക്കാര്യം അറിയിച്ചത്.

ജില്ലാ പോലീസ് മേധാവി, ആർടിഒ, പൊതുമരാമത്ത് - ദേശീയപാതാവിഭാഗം ഉദ്യോഗസ്ഥരുടെ സംഘമാണ് പരിശോധന നടത്തി ആക്‌ഷൻ പ്ലാൻ തയാറാക്കുക. ആക്‌ഷൻ പ്ലാൻ പരിശോധിച്ചശേഷം ജില്ലാ കളക്ടറുടെ നേതൃത്വത്തിൽ അടിയന്തരയോഗം ചേർന്ന് സർക്കാർതലത്തിലുളള തീരുമാനങ്ങൾകൂടി കൈക്കൊണ്ട് നടപ്പാക്കും.

ഇന്നലെ രാത്രിതന്നെ അപകടസ്ഥലത്തു വാഹനപരിശോധന ആരംഭിച്ചു. കണ്ടെത്തലുകൾ പരിഗണിച്ച് പോലീസ് വേണ്ട നടപടികൾ സ്വീകരിക്കുമെന്നു ജില്ലാ പോലീസ് മേധാവി പാലക്കാട് (ഇൻചാർജ്) ആർ. വിശ്വനാഥ് അറിയിച്ചു. അപകടം സംബന്ധിച്ച് ഡിവൈഎസ്പി തലത്തിൽ അന്വേഷണം നടന്നുവരികയാണ്. ഇത്തരം അപകടമേഖലകളിൽ സ്പീഡ് ബ്രേക്കർ സംവിധാനം നടപ്പാക്കുന്നതിന്‍റെ പ്രായോഗികത പരിശോധിക്കുമെന്നും അദ്ദേഹം വ്യക്തമാക്കി.

ദരിദ്രകുടുംബത്തിൽപെട്ടവരാണ് അപകടത്തിൽ മരണപ്പെട്ടതെന്നും ഇവരുടെ കുടുംബങ്ങൾക്ക് അടിയന്തരമായി സർക്കാർ ധനസഹായം അനുവദിക്കണമെന്നും ആവശ്യമുയർന്നു.

കരിന്പ ഹയർസെക്കൻഡറി സ്കൂൾ ബസ് സ്റ്റോപ്പിനുസമീപം രാവിലെ ഒന്പതുമുതൽ 10 വരെയും വൈകിട്ട് നാലുമുതൽ അഞ്ചുവരെയും പോലീസിനെ നിയോഗിക്കണമെന്നും ആവശ്യമുയർന്നു.

കെ. ശാന്തകുമാരി എംഎൽഎ, ജില്ലാ കളക്ടർ ഡോ. എസ്. ചിത്ര, പാലക്കാട് ജില്ലാ പോലീസ് മേധാവി (ഇൻചാർജ്) ആർ. വിശ്വനാഥ്, അഡീഷണൽ ജില്ലാ മജിസ്ട്രേറ്റ് പി. സുരേഷ്, കരിന്പ ഗ്രാമപഞ്ചായത്ത് പ്രസിഡന്‍റ് പി.എസ്. രാമചന്ദ്രൻമാസ്റ്റർ, വാർഡ് മെംബർ പി.കെ. അബ്ദുള്ളക്കുട്ടി, പ്രദേശവാസികൾ, വിവിധ രാഷ്ട്രീയപാർട്ടി പ്രതിനിധികൾ, വിവിധ വകുപ്പ് ഉദ്യോഗസ്ഥർ തുടങ്ങിയവർ യോഗത്തിൽ സംബന്ധിച്ചു.

മന്ത്രിമാരായ കെ. കൃഷ്ണൻകുട്ടി, എം.ബി. രാജേഷ്, എംഎൽഎമാരായ കെ. ശാന്തകുമാരി, പി.പി. സുമോദ്, ജില്ലാ കളക്ടർ ഡോ. എസ്. ചിത്ര, വിവിധ രാഷ്‌ട്രീയപാർട്ടിനേതാക്കളായ പി.കെ. കുഞ്ഞാലിക്കുട്ടി, കളത്തിൽ അബ്ദുള്ള, ജോസ് ബേബി, ടി.എ. സിദ്ദിഖ്, ഇ.എൻ. സുരേഷ് ബാബു, കെ.പി. സുരേഷ് രാജ്, സി. ചന്ദ്രൻ, മരക്കാർ മാരായമംഗലം, മണ്ണാർക്കാട് നഗരസഭാ ചെയർമാൻ ഫായിദ ബഷീർ തുടങ്ങി നിരവധിപേർ അന്ത്യോപചാരമർപ്പിക്കാനെത്തി.

കരിന്പനയ്ക്കൽ ഹാളിലെ പൊതുദർശനവേദിയിലെ മയ്യത്ത് നിസ്കാരത്തിനു സാദിഖ് അലി ശിഹാബ് തങ്ങളും തുപ്പനാട് ജുമാമസ്ജിദിലെ മയ്യത്ത് നിസ്കാരത്തിനു സയ്ദ് പി.കെ. ഇന്പിച്ചിക്കോയ തങ്ങൾ കുടക്കാടും നേതൃത്വം നൽകി.

ലോറി ഡ്രൈവർമാർ റിമാൻഡിൽ

നാലു വിദ്യാർഥിനികളുടെ മരണത്തിനിടയാക്കിയ പനയന്പാടം അപകടത്തിൽ രണ്ടു ലോറിയുടെയും ഡ്രൈവർമാരെ കല്ലടിക്കോട് പോലീസ് അറസ്റ്റ് ചെയ്തു. കാസർഗോഡ് സ്വദേശി മഹേന്ദ്ര പ്രസാദ് (34), നിലന്പൂർ വഴിക്കടവ് പള്ളിപ്പറന്പിൽ പ്രജീഷ് ജോണ്‍(27) എന്നിവരെയാണു മണ്ണാർക്കാട് ഡിവൈഎസ്പി സി. സുന്ദരന്‍റെ നിർദേശപ്രകാരം കല്ലടിക്കോട് സിഐ എം. ഷഹീറിന്‍റെ നേതൃത്വത്തിൽ അറസ്റ്റ് ചെയ്തത്. ഇരുവരെയും മണ്ണാർക്കാട് മുൻസിഫ് മജിസ്ട്രേറ്റ് കോടതിയിൽ ഹാജരാക്കി. കോടതി ഇവരെ രണ്ടാഴ്ചത്തേക്കു റിമാൻഡ് ചെയ്തു.

അമിതവേഗത്തിൽ വാഹനമോടിച്ച് അപകടമുണ്ടാക്കിയതിനു കുറ്റകരമായ നരഹത്യാക്കുറ്റം ചുമത്തിയാണ് കേസെടുത്തിട്ടുള്ളതെന്നു ഡിവൈഎസ്പി പറഞ്ഞു. സിമന്‍റ് ലോറിയിലെ ഡ്രൈവറാണ് മഹേന്ദ്രപ്രസാദ്. സിമന്‍റ് ലോറിയിൽ ഇടിച്ച ലോറിയിലെ ഡ്രൈവറാണ് പ്രജീഷ് ജോണ്‍.

വനം നിയമ ഭേദഗതിയുടെ പേരിൽ ജനദ്രോഹം അനുവദിക്കില്ല: മാർ ജോർജ് മഠത്തിക്കണ്ടത്തിൽ

കോതമംഗലം: വനംവകുപ്പിന് അനിയന്ത്രിതമായ അധികാരങ്ങൾ നൽകി ഫോറസ്റ്റ് ഗുണ്ടാരാജിന് വഴിയൊരുക്കുന്ന കേരള വനം നിയമ ഭേദഗതി ജനങ്ങളോടും നിയമവാഴ്ചയോടുമുള്ള വെല്ലുവിളിയാണെന്ന്‌ കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ. ഈ നിയമഭേദഗതിയിലൂടെ ജനജീവിതത്തെ ദുസഹമാക്കുന്നതിനുള്ള ഗൂഢപദ്ധതിയാണ് വനംവകുപ്പും ഭരണാധികാരികളും ചേർന്നു നടപ്പാക്കുന്നത്.

ഫോറസ്റ്റ് ഡിപ്പാർട്ട്മെന്‍റിലെ ബീറ്റ് ഫോറസ്റ്റ് ഓഫീസർമാർക്കുപോലും വാറന്‍റില്ലാതെ ആരുടെ വീട്ടിലും എവിടെയും കയറി പരിശോധിക്കാനും അറസ്റ്റ് ചെയ്യാനുമുള്ള അനിയന്ത്രിതമായ അധികാരം നൽകുന്ന ഈ നിയമഭേദഗതി ദൂരവ്യാപകമായ മനുഷ്യാവകാശ ലംഘനങ്ങള്‍ക്കു കാരണമാകും.

വനത്തോടുചേർന്നുള്ള പുഴകളിൽ പരിപൂര്‍ണ മീൻപിടിത്ത നിരോധനവും തദ്ദേശവാസികളുടെ എല്ലാവിധ അവകാശങ്ങളും ഹനിച്ചുകൊണ്ട് വനംവകുപ്പിന്‍റെ കൈപ്പിടിയിൽ പുഴയും മറ്റു വനാതിര്‍ത്തി പ്രദേശങ്ങളും കൊണ്ടുവരുന്നതും പ്രകൃതിയുടെ യഥാര്‍ഥ സംരക്ഷകരായ സാധാരണക്കാർക്ക് വലിയ ബുദ്ധിമുട്ടുകൾ ഉണ്ടാക്കും. അതിനുപുറമേ പോലീസിന്‍റെ അധികാരം വനംവകുപ്പിനു നല്‍കുന്നത് വനംരാജ് നടപ്പാക്കാനുള്ള ഗൂഢ തന്ത്രമാണ്. അതിനാൽ ഇതിൽനിന്നു സർക്കാർ അടിയന്തരമായി പിന്മാറണമെന്ന് ബിഷപ് ആവശ്യപ്പെട്ടു.

നിലവിലുള്ള നിയമങ്ങൾ വനസംരക്ഷണത്തിനു പര്യാപ്തമാണ്. കേരളത്തിൽ ഓരോ വർഷവും വനവിസ്തൃതി കൂടുന്നുവെന്നുള്ളത് പഠനങ്ങൾ തെളിയിക്കുന്ന കാര്യമാണ്. തന്നെയുമല്ല വനം നിയമ പരിഷ്കരണം ഉണ്ടാകുമ്പോൾ ഇക്കാലത്തെ അടിയന്തര പ്രശ്നമായ വന്യജീവി ആക്രമണം നിയന്ത്രിക്കാനോ ദുരിതം പേറുന്ന ജനതയെ സംരക്ഷിക്കാനോ ഉള്ള ഒരു ശിപാർശയുമില്ല എന്നുള്ളത് ആശങ്കപ്പെടുത്തുന്നു.

ഗസറ്റിൽ വരുന്നതിനുമുന്പേ 140 എംഎൽഎമാർക്കും ഈ ബില്ലിന്‍റെ കോപ്പി ലഭിച്ചിട്ടുണ്ടാകണം. എന്നിട്ടും ഒരു പ്രതിഷേധക്കുറിപ്പ് എഴുതാൻപോലും ഒരു എംഎൽഎയ്ക്കും കഴിഞ്ഞില്ല എന്നുള്ളത് ഭരണ- പ്രതിപക്ഷത്തിന്‍റെ ജനവിരുദ്ധതയുടെ അടയാളമാണ്.

വനവിസ്തൃതി കൂട്ടി ജനങ്ങളെ ദുരിതത്തിലാഴ്ത്തുന്ന ഈ നിലപാട് ഉപേക്ഷിച്ചില്ലെങ്കില്‍ ജനം കൂടെയുണ്ടാകില്ല. ജനവിരുദ്ധമായ നിയമങ്ങൾ അടിച്ചേൽപ്പിച്ച് മലയോരജനതയെ ദ്രോഹിക്കാനാണു സർക്കാരിന്‍റെ ഭാവമെങ്കിൽ ജനപക്ഷത്തു നിന്ന് ശക്തമായ പ്രതിഷേധത്തിന് നേതൃത്വം നൽകുമെന്നും മാർ ജോർജ് മഠത്തിക്കണ്ടത്തിൽ മുന്നറിയിപ്പു നൽകി.

സ്വകാര്യ കാറുകൾ ഉടമയല്ലാത്തവർക്കും ഓടിക്കാം

തിരുവനന്തപുരം: സ്വകാര്യ കാറുകൾ സ്ഥിരമായല്ലാതെ കുടുംബാംഗങ്ങളോ മറ്റുള്ളവരോ ഓടിക്കുന്നതു കുറ്റകരമല്ലെന്നു ട്രാൻസ്പോർട്ട് കമ്മീഷണർ സി.എച്ച്. നാഗരാജുവിന്‍റെ വിശദീകരണം.

ഇടയ്ക്കിടെ മറ്റുള്ളവർക്കും ഓടിക്കാം എന്നാണു പറയുന്നത്. ഇടയ്ക്കിടെ എന്നതു കൃത്യമായി നിർവചിച്ചിട്ടില്ല. കന്പനികളുടെ ഉടമസ്ഥതയിലുള്ള കാറുകളും ഡ്രൈവർമാരെ ഉപയോഗിക്കുന്ന കാറുകളും നിയമലംഘനം നടത്തുന്നില്ലെന്നും അദ്ദേഹം വ്യക്തമാക്കി.

ആലപ്പുഴയിൽ മെഡിക്കൽ വിദ്യാർഥികൾ വാടകയ്ക്കെടുത്ത കാറിൽ പോകവേ അപകടമുണ്ടായ സാഹചര്യത്തിൽ ട്രാൻസ്പോർട്ട് കമ്മീഷണർ നടത്തിയ പ്രസ്താവനയുടെ പേരിലുണ്ടായ അവ്യക്തതയുടെ പശ്ചാത്തലത്തിലാണ് അദ്ദേഹം നിയമത്തിൽ വ്യക്തത വരുത്തിയത്. ഒരാളുടെ പേരിലുള്ള വാഹനം സൗജന്യമായോ അല്ലാതെയോ മറ്റൊരാൾക്ക് ഓടിക്കാനാകില്ലെന്നായിരുന്നു അദ്ദേഹം പറഞ്ഞത്.

റെന്‍റ് എ കാർ ആയി വാഹനം ഓടിക്കുന്നതിനു പെർമിറ്റും ഫിറ്റ്നസ് സർട്ടിഫിക്കറ്റും ഉണ്ടാകണം. ഇത്തരം വാഹനങ്ങളുടെ നന്പർ പ്ലേറ്റിൽ കറുത്ത പശ്ചാത്തലത്തിൽ മഞ്ഞ നിറത്തിലാണ് നന്പർ എഴുതേണ്ടത്. ഡ്രൈവർ ഉള്ള മോട്ടോർ കാബ് ആയി ഉപയോഗിക്കുന്ന വാഹനങ്ങൾ മഞ്ഞ ബോർഡിൽ കറുത്ത നിറത്തിലാണ് നന്പർ എഴുതേണ്ടത്.

എന്നാൽ വെള്ള നിറത്തിലുള്ള ബോർഡുമായി നിരവധി വാഹനങ്ങൾ റെന്‍റ് എ കാർ ആയി നൽകുന്നതായി ടാക്സി ഡ്രൈവർമാരും ഓട്ടോറിക്ഷക്കാരും നിരന്തരമായി പരാതിപ്പെട്ടുകൊണ്ടിരിക്കുകയാണ്. മോട്ടോർ വാഹന വകുപ്പ് ടാക്സി ഡ്രൈവർമാരുടെയും ഓട്ടോ ഡ്രൈവർമാരുടെയും യോഗം വിളിച്ചു കൂട്ടി ഇങ്ങനെ അനധികൃതമായി റെന്‍റ് എ കാർ സർവീസ് നടത്തുന്ന വാഹനങ്ങൾ കണ്ടെത്തി നടപടി സ്വീകരിക്കും.

സ്ഥിരമായി കാർ മറ്റുള്ളവർക്കു നൽകുന്നതും അനധികൃതമായി എയർപോർട്ട് ടാക്സി ആയി ഓടുന്നതും ഓണ്‍ലൈൻ ടാക്സി ആയി സർവീസ് നടത്തുന്നതും നിയമവിരുദ്ധമാണ്. ഇത്തരം കുറ്റം ചെയ്യുന്നവർക്കു പിഴ ചുമത്തും. ആവർത്തിച്ചാൽ ആർസി സസ്പെൻഡ് ചെയ്യും. വീണ്ടും ആവർത്തിച്ചാൽ ആർസി റദ്ദാക്കുമെന്നും ട്രാൻസ്പോർട്ട് കമ്മീഷണർ അറിയിച്ചു.

‘ജീസസ് ആന്‍ഡ് മദര്‍ മേരി’ടൈറ്റില്‍ പോസ്റ്റര്‍ മാര്‍പാപ്പ പ്രകാശനം ചെയ്തു

ഇരിങ്ങാലക്കുട: ലോകസിനിമാചരിത്രത്തില്‍ ആദ്യമായി ത്രീഡിയില്‍ ഒരുങ്ങുന്ന ബൈബിള്‍ സിനിമ ജീസസ് ആന്‍ഡ് മദര്‍ മേരിയുടെ ടൈറ്റില്‍ പോസ്റ്റര്‍ വത്തിക്കാനില്‍ ഫ്രാന്‍സിസ് മാര്‍പാപ്പ പ്രകാശനം ചെയ്തു.

ഇരിങ്ങാലക്കുട സ്വദേശി റാഫേല്‍ പൊഴോലിപ്പറമ്പിലിന്‍റെ ഉടമസ്ഥതയിലുള്ള റാഫേല്‍ ഫിലിം പ്രൊഡക്‌ഷന്‍സാണ് ഇംഗ്ലീഷിലും മറ്റു ഭാഷകളിലും ചിത്രം നിര്‍മിക്കുന്നത്.

തോമസ് ബെഞ്ചമിനാണ് സംവിധാനം. ജയിംസ് കാമറൂണ്‍ ചിത്രമായ അവതാറിന്‍റെ വിഷ്വല്‍ ഇഫക്ട് സൂപ്പര്‍വൈസര്‍ എന്നറിയപ്പെടുന്ന ചക്ക് കോമിസ്‌കിയും പ്രോജക്ടിനൊപ്പമുണ്ട്.

ബ്രിട്ടനിലും ഇറ്റലിയിലും ആസ്ഥാനമായി പ്രവര്‍ത്തിക്കുന്ന മക്കിനേറിയം എന്ന കമ്പനിയാണ് ചിത്രത്തിന്‍റെ പ്രോസ്‌തെറ്റിക് മേക്കപ്പ് ജോലികള്‍ക്കു നേതൃത്വം നല്‍കുന്നത്.

ഖത്തര്‍ ആസ്ഥാനമായുള്ള വ്യവസായി ഡേവിസ് എടക്കളത്തൂരും ഇന്ത്യയില്‍നിന്നും യുഎഇയില്‍നിന്നുമുള്ള മറ്റു പത്തുപേരും‍ ഈ ബിഗ് ബജറ്റ് ചിത്രത്തിന്‍റെ സഹനിര്‍മാതാക്കളില്‍ ഉള്‍പ്പെടുന്നു.

കാരുണ്യവാന്‍റെ ജനനം

റവ. ഡോ. ദേവമിത്ര നീലങ്കാവില്‍

സെമിറ്റിക് പൈതൃക മുള്ള ‘റെഹ്‌മ’ എന്ന ഹീബ്രൂ- സുറിയാനി പദത്തിന് കരുണ, അമ്മയുടെ ഗർഭപാത്രം എന്നിങ്ങനെ രണ്ട് അർഥങ്ങളാണുള്ളത്. ഒറ്റനോട്ടത്തിൽ ഈ രണ്ട് അർഥങ്ങൾ ഒരേ വാക്കിനു വരാൻ കാര്യമായ കാരണങ്ങൾ ഇല്ല എന്നു തോന്നിയേക്കാം. എങ്കിലും, ആഴത്തിലുള്ള വിചിന്തനം മാതൃഗർഭം കരുണയുടെ ഉത്തമ ദൃഷ്ടാന്തമാണെന്ന് മനസിലാക്കാൻ സാധിക്കും.

ഒരു വ്യക്തി മാതൃഗർഭത്തിൽ ഉരുവാകുന്ന സമയം മുതൽ പ്രസവസമയംവരെ ഭ്രൂണരൂപത്തിൽ മാതൃസംരക്ഷണത്തിലാണ്.

ഗർഭസ്ഥ ശിശുവിന് അമ്മ പോഷണവും ഭക്ഷണവും സ്വന്തം ശരീരത്തിൽനിന്നു നല്കുന്നു. അമ്മയുടെ വികാര വിചാരങ്ങളും ചലനങ്ങളും ശിശു അറിയുന്നു. ഗർഭസ്ഥ ശിശുവിന്‍റെ അനക്കവും നീക്കവും അമ്മയും അറിയുന്നു. അങ്ങനെ പരസ്പരം അറിഞ്ഞും ആസ്വദിച്ചും വ്യത്യസ്ത വ്യക്തികൾ ഒന്നായി വസിക്കുന്നതിന്‍റെ ഉത്തമ ഉദാഹരണമാണ് മാതൃഗർഭത്തിലെ ശിശു.

ശിശു അമ്മയുടെ ‘റെഹ്‌മയിലാണ്’ - എന്നുവച്ചാൽ ‘ഗർഭത്തിലാണ്’. ഒരർഥത്തിൽ ശിശു അമ്മയുടെ കാരുണ്യത്തിലാണ്. മാതൃഗർഭത്തിലെന്നപോലെ അപരന്‍റെ ചലനങ്ങളറിയുന്ന, ഭാവങ്ങളും ഭാവമാറ്റങ്ങളും അനുഭവിക്കുന്ന, ഭക്ഷണം പകർന്നു നല്കുന്ന, സംരക്ഷണം നല്കുന്ന അവസ്ഥയാണ് കാരുണ്യം. ആ കാരുണ്യത്തിന്‍റെ മൂർത്തീരൂപമാണ് ദൈവപുത്രനായ ഈശോമിശിഹാ. ആ കാരുണ്യവാന്‍റെ ജനനോത്സവത്തിനാണ് നാം ഒരുങ്ങിക്കൊണ്ടിരിക്കുന്നത്.

ദുഷ്ടരുടെയും ശിഷ്യരുടെയും മേൽ സൂര്യനെ ഉദിപ്പിക്കുകയും മഴപെയ്യിക്കുകയും ചെയ്യുന്ന കരുണാമയനായ പിതാവിന്‍റെ പുത്രൻ മനുഷ്യാവതാരം ചെയ്തുകൊണ്ട് മനുഷ്യരെ പഠിപ്പിച്ചു: ‘സ്വർഗസ്ഥനായ പിതാവ് കരുണാമയനായിരിക്കുന്നതുപോലെ കരുണയുള്ളവരായിരിക്കുവിൻ’ (ലൂക്കാ 6:36).

കരുണയുള്ളവരായിരിക്കാൻ പഠിപ്പിക്കുന്നതിനു മുന്പുതന്നെ ആ കരുണാമയൻ കാരുണ്യം കാണിച്ച് മാതൃക നല്കി. കല്യാണസദ്യക്ക് വിഭവം തികയാതെ വിഷമിച്ച ആതിഥേയ രോട് കരുണ കാണിച്ചുകൊണ്ട് ആ കരുണാമയൻ അവിടെ ലഭ്യമായിരുന്ന വെള്ളം വിഭവമാക്കി മാറ്റി. തന്നെ ശ്രവിക്കാൻ ഒരുമിച്ചു കൂടിയിരുന്നവർക്ക് വിശപ്പടക്കാൻ ഭക്ഷണമില്ല എന്നു മനസിലാക്കിയ കരുണാമയൻ അവർക്കു സമൃദ്ധമായി ഭക്ഷിക്കാൻ നല്കി.

അഞ്ചപ്പംകൊണ്ട് അയ്യായിരങ്ങളെ തീറ്റിപ്പോറ്റിയവന് ദാഹജലം നല്കിയ പാപിനിയായ സ്ത്രീക്ക് കാരുണ്യവാൻ ഒരിക്കലും മേലിൽ ദാഹമുണ്ടാകാത്തവിധം പരിശുദ്ധാത്മാവാകുന്ന ജലം നല്കി. തന്നെ സമീപിച്ച രോഗികളെയും പിശാചുബാധിതരെയും സുഖപ്പെടുത്തിക്കൊണ്ട് ആ കരുണാമയൻ ജീവന്‍റെ സമൃദ്ധി പ്രദാനം ചെയ്തു. വിധവയുടെ ഏക മകനെ ജീവനിലേക്ക് തിരികെ കൊണ്ടുവന്നുകൊണ്ട് മരിച്ചവന് പുതുജീവനും വിധവയ്ക്ക് കാരുണ്യവും നല്‍കി.

ഗർഭസ്ഥ ശിശു ആവശ്യപ്പെടാതെതന്നെ അതിനെ പോറ്റുന്ന, അതിന്‍റെ അനക്കങ്ങൾ അറിയുന്ന, അതിനെ സംരക്ഷിക്കുന്ന ആ മനോഭാവം അപരന്‍റെ നേർക്ക് ഉണ്ടാകുന്പോഴേ കാരുണ്യമാകൂ. ദൈവത്തിൽനിന്ന് നിരന്തരം കാരുണ്യം സ്വീകരിക്കുന്ന നമുക്ക്, ദൈവത്തിന് കാരുണ്യം തിരിച്ചു നല്കുക സാധ്യമല്ല. എന്നാൽ, ദൈവത്തിന്‍റെ മുഖം പേറുന്ന മനുഷ്യമക്കളോട് കാരുണ്യം കാണിക്കുകവഴി കാരുണ്യവാനോട് നമുക്കു നന്ദിയുള്ളവരായിരിക്കുവാൻ സാധിക്കും.

കാരുണ്യവാനായ ഈശോ തന്‍റെ സുവിശേഷത്തിലൂടെ മനുഷ്യകുലത്തെ പഠിപ്പിച്ചു: ‘കരുണയുള്ളവർ ഭാഗ്യവാന്മാർ, എന്തെന്നാൽ അവർക്കു കരുണ ലഭിക്കും’ (മത്താ 5:7).

18ന് ദേശീയ ന്യൂനപക്ഷ അവകാശദിനമായി ആചരിക്കും

കൊച്ചി: ഭരണഘടന വിഭാവനം ചെയ്യുന്ന ന്യൂനപക്ഷ സംരക്ഷണവും അവകാശവും ഉറപ്പാക്കണമെന്നു പ്രഖ്യാപിച്ച് ഭാരത കത്തോലിക്കാ മെത്രാൻ സമിതി (സിബിസിഐ) ലെയ്റ്റി കൗണ്‍സില്‍ 18ന് ദേശീയ ന്യൂനപക്ഷ അവകാശദിനം ആചരിക്കും.

രാജ്യത്തെ വിവിധ കേന്ദ്രങ്ങളില്‍ അന്നു ന്യൂനപക്ഷ അവകാശ ബോധവത്കരണ പരിപാടികള്‍ സംഘടിപ്പിക്കുമെന്ന് സിബിസിഐ ലെയ്റ്റി കൗണ്‍സില്‍ സെക്രട്ടറി ഷെവ. വി.സി. സെബാസ്റ്റ്യന്‍ പറഞ്ഞു.

സിബിസിഐയുടെ രാജ്യത്തെ 14 റീജണല്‍ കൗണ്‍സിലുകളുടെയും വിവിധ കത്തോലിക്ക അല്മായ സംഘടനകളുടെയും ഇതര ക്രൈസ്തവ സഭാവിഭാഗങ്ങളുടെയും നേതൃത്വത്തിലാണ് ന്യൂനപക്ഷ അവകാശദിനാചരണം.

ജനസംഖ്യയില്‍ 2.3 ശതമാനം മാത്രമുള്ള ക്രൈസ്തവരെ മൈക്രോ മൈനോറിറ്റിയായി പ്രഖ്യാപിച്ച് പ്രത്യേക ക്ഷേമപദ്ധതികള്‍ ആവിഷ്‌കരിക്കാന്‍ കേന്ദ്രസര്‍ക്കാര്‍ പഠനസമിതി രൂപീകരിക്കണം.

ക്രൈസ്തവവിശ്വാസം സ്വീകരിച്ചതിന്‍റെ പേരില്‍ ദളിത് ക്രൈസ്തവ സമൂഹം നേരിടുന്ന നീതിനിഷേധത്തിനെതിരേയുള്ള നിയമ-സമര പോരാട്ടങ്ങള്‍ക്ക് രാജ്യത്തുടനീളം 18ന് ഐക്യദാർഢ്യം പ്രഖ്യാപിക്കും.

രാജ്യത്തെ എല്ലാ ക്രൈസ്തവസ്ഥാപനങ്ങളും സംഘടനകളും 18ലെ ദേശീയ ന്യൂനപക്ഷ അവകാശദിനാചരണത്തില്‍ പങ്കുചേരണമെന്ന് വി.സി. സെബാസ്റ്റ്യന്‍ അഭ്യര്‍ഥിച്ചു.

സിസ്റ്റർ ലിറ്റിൽ തെരേസ് സിഎംസി പ്രൊവിൻഷ്യൽ സുപ്പീരിയർ

തലശേരി: സിഎംസി സെന്‍റ് ജോസഫ്സ് പ്രൊവിൻസിന്‍റെ പ്രൊവിൻഷ്യൽ സൂപ്പീരിയറായി സിസ്റ്റർ ലിറ്റിൽ തെരേസ് വീണ്ടും തെരഞ്ഞെടുക്കപ്പെട്ടു. സിസ്റ്റർ ധന്യയാണ് പ്രൊവിൻഷ്യൽ വികാർ. സിസ്റ്റർ മേരി മാത്യു, സിസ്റ്റർ സുമ, സിസ്റ്റർ ആൻജോ എന്നിവരാണ് കൗൺസിലേഴ്സ്.

സിസ്റ്റർ നെസി മരിയ ഇന്‍റേണൽ ഓഡിറ്ററായും സിസ്റ്റർ ഹെലൻ റോസ് പ്രൊവിൻഷ്യൽ സെക്രട്ടറിയായും സിസ്റ്റർ ഹിത മരിയ ഫിനാൻസ് സെക്രട്ടറിയായും തെരഞ്ഞെടുക്കപ്പെട്ടു.

കേരള കോൺഗ്രസ് കർഷക പ്രക്ഷോഭം മൂന്നാംഘട്ടം ജനുവരിയിൽ

കോട്ടയം: റബർ വില സ്ഥിരതാ ഫണ്ട് 300 രൂപയായി വർധിപ്പിക്കാൻ കേന്ദ്ര സംസ്ഥാന സർക്കാരുകൾ സംയുക്ത നടപടി സ്വീകരിക്കണമെന്നാവശ്യപ്പെട്ട് കേരള കോൺഗ്രസ് നടത്തിവരുന്ന കേരള കോൺഗ്രസ്ത്തിന്‍റെ മൂന്നാംഘട്ട സമര പരിപാടികൾ ജനുവരി ആദ്യവരം തുടക്കം കുറിക്കുമെന്ന് പാർട്ടി എക്സിക്യൂട്ടീവ് ചെയർമാൻ മോൻസ് ജോസഫ് എംഎൽഎ.

സംസ്ഥാന വ്യാപകമായി സത്യഗ്രഹം ഉൾപ്പെടെയുള്ള സമരപരിപാടികളാണ് സംഘടിപ്പിക്കുന്നത്. പാർട്ടി ചെയർമാൻ പി.ജെ. ജോസഫ് ഉദ്ഘാടനം ചെയ്യും.

വീട്ടമ്മയെ കബളിപ്പിച്ച് ഒന്നേമുക്കാല്‍ കോടി തട്ടിയ സംഭവം; പ്രതി അന്തർസംസ്ഥാന തട്ടിപ്പുകാരന്‍

കോട്ടയം: കാഞ്ഞിരപ്പള്ളി സ്വദേശിനിയായ വീട്ടമ്മയെ കബളിപ്പിച്ച് ഒന്നേമുക്കാല്‍ കോടി രൂപ തട്ടിയ യുവാവ് അന്തർസംസ്ഥാന തട്ടിപ്പുകാരന്‍.

കാഞ്ഞിരപ്പള്ളി സ്വദേശിനിയായ വീട്ടമ്മയെ സിബിഐയുടെ ഓഫീസില്‍നിന്നാണു വിളിക്കുന്നതെന്ന് പറഞ്ഞ് കബളിപ്പിച്ച് ഒരു കോടി 86 ലക്ഷം രൂപയാണ് തട്ടിയെടുത്ത സംഭവവുമായി ബന്ധപ്പെട്ട് തൃശൂര്‍ വരന്തരപ്പള്ളി ചന്ദ്രശേരി സലീഷ് കുമാറിനെ (47) പോലീസ് അറസ്റ്റുചെയ്തിരുന്നു. സലീഷ് വിവിധ സംസ്ഥാനങ്ങളില്‍ തട്ടിപ്പു കേസുകളില്‍ പ്രതിയാണെന്നു പോലീസ് കണ്ടെത്തി.

വീട്ടമ്മയുടെ ഫോണിലേക്ക് സിബിഐയില്‍ നിന്നാണെന്നു പറഞ്ഞു പ്രതി വിളിച്ച ശേഷം അക്കൗണ്ടില്‍ കള്ളപ്പണം വെളുപ്പിക്കല്‍ നടന്നതായി കണ്ടെത്തിയിട്ടുണ്ടെന്നും കോടതി അറസ്റ്റ് വാറണ്ട് പുറപ്പെടുവിച്ചിട്ടുണ്ടെന്നും പറഞ്ഞു ഭീഷണിപ്പെടുത്തി. തുടര്‍ന്ന് വീട്ടമ്മ പല തവണകളായി 1,86,62,000 രൂപ പ്രതി‍ പറഞ്ഞ അക്കൗണ്ടുകളിലേക്ക് അയച്ചുകൊടുക്കുകയായിരുന്നു.

പരാതിയെ തുടര്‍ന്ന് കാഞ്ഞിരപ്പള്ളി പോലീസ് കേസ് രജിസ്റ്റര്‍ ചെയ്തു നടത്തിയ അന്വേഷണത്തില്‍ പണം സലീഷ് കുമാറിന്‍റെ അക്കൗണ്ടിലേക്ക് എത്തിയതായി കണ്ടെത്തി. ജില്ലാ പോലീസ് മേധാവി ഷാഹുല്‍ ഹമീദിന്‍റെ പ്രത്യേക നിര്‍ദേശത്തെ തുടര്‍ന്ന് അന്വേഷണസംഘം നടത്തിയ തെരച്ചിലില്‍ സലീഷിനെ ഗോവയില്‍നിന്നു പിടികൂടുകയായിരുന്നു.

കേസിന്‍റെ തുടരന്വേഷണം ജില്ലാ ക്രൈംബ്രാഞ്ചിനെ ഏല്‍പ്പിക്കുകയും ക്രൈംബ്രാഞ്ച് ഡിവൈഎസ്പി സാജു വര്‍ഗീസിന്‍റെ നേതൃത്വത്തില്‍ നടത്തിയ അന്വേഷണത്തില്‍ വീട്ടമ്മയുടെ നഷ്ടപ്പെട്ട പണം ഇയാള്‍ രാജസ്ഥാന്‍, ഹരിയാന, കോയമ്പത്തൂര്‍, ഗുജറാത്ത് എന്നിവിടങ്ങളിലെ വിവിധ അക്കൗണ്ടുകളിലേക്ക് ട്രാന്‍സ്ഫര്‍ ചെയ്ത് നല്‍കിയതായി കണ്ടെത്തുകയും ചെയ്തു. തുടര്‍ന്ന് നടത്തിയ വിശദമായ അന്വേഷണത്തിലാണ് ഇയാള്‍ വിവിധ സംസ്ഥാനങ്ങളില്‍ നിരവധി തട്ടിപ്പ് കേസുകളില്‍ പ്രതിയാണെന്ന് കണ്ടെത്തിയത്.

തൃശൂര്‍ വരന്തരപ്പള്ളി, കൊരട്ടി സ്റ്റേഷനിലും ഗോവ, കര്‍ണാടക, തെലുങ്കാന, തമിഴ്‌നാട്, രാജസ്ഥാന്‍, പശ്ചിമബംഗാള്‍, ജാര്‍ഖണ്ഡ്, ഹരിയാന സംസ്ഥാനങ്ങളിലെ വിവിധ സ്റ്റേഷനുകളില്‍ ഇയാള്‍ക്കെതിരേ പണം തട്ടിയെടുത്ത കേസില്‍ അന്വേഷണം നടത്തിവരുന്നതായി കണ്ടെത്തി.

തുടര്‍ന്ന് അതത് സംസ്ഥാനത്തെ സ്റ്റേഷനുകളെ അന്വേഷണസംഘം വിവരമറിയിക്കുകയായിരുന്നു. ഇതിന്‍പ്രകാരം തെലുങ്കാന പോലീസ് കാഞ്ഞിരപ്പള്ളി കോടതിയില്‍ ഇയാളെ കസ്റ്റഡിയില്‍ ലഭിക്കുന്നതിനുവേണ്ടി അപേക്ഷ സമര്‍പ്പിക്കുകയും ചെയ്തു.

സൈബർ കുറ്റകൃത്യം : രാജ്യത്ത് 85 ലക്ഷം മൊബൈൽ കണക്‌ഷനുകൾ വിഛേദിച്ചു

കൊല്ലം: ടെലികോം മേഖലയിലെ സുരക്ഷ വർധിപ്പിക്കുന്നതിന്‍റെയും വഞ്ചന, തട്ടിപ്പുകൾ എന്നിവ തടയുന്നതിന്‍റെയും ഭാഗമായി രാജ്യത്താകമാനം 85 ലക്ഷം മൊബൈൽ കണക്‌ഷനുകൾ വിഛേദിച്ചു. ഡിപ്പാർട്ട്മെന്‍റ് ഓഫ് ടെലികമ്യൂണിക്കേഷൻസിന്‍റേതാണ് ഈ നടപടി.

വകുപ്പ് വികസിപ്പിച്ചെടുത്ത ആർട്ടിഫിഷൽ ഇന്‍റലിജൻസ് ഉപകരണം നൽകിയ വിശദമായ വിശകലനത്തിന്‍റെ അടിസ്ഥാനത്തിലാണ് ഇത്രയധികം കണക്‌ഷനുകൾ റദ്ദാക്കിയത്. വ്യാജ രേഖകൾ ഉപയോഗിച്ച് നേടിയ 78.33 ലക്ഷം കണക്‌ഷനുകളും സൈബർ കുറ്റകൃത്യങ്ങളുമായി ബന്ധപ്പെട്ട 6.78 ലക്ഷം കണക്‌ഷനുകളും വിഛേദിക്കപ്പെട്ടവയിൽ ഉൾപ്പെടും.

ഇതിന്‍റെ അടിസ്ഥാനത്തിൽ വ്യാജ കണക്‌ഷനുകൾ ഒഴിവാക്കുന്നതിന് ടെലികോം സേവന ദാതാക്കൾക്ക് വകുപ്പ് പുതിയ മാർഗനിർദേശങ്ങളും നൽകിയിട്ടുണ്ട്. ടെലികോം കമ്പനികൾക്കു വേണ്ടി ഉപയോക്താക്കളെ എൻറോൾ ചെയ്ത് സിം കാർഡുകൾ നൽകുന്ന ഫ്രാഞ്ചൈസികൾ, വിതരണക്കാർ, ഏജന്‍റുമാർ തുടങ്ങി എല്ലാ പോയിന്‍റ് ഒഫ് സെയിൽസ് കേന്ദ്രങ്ങൾക്കും രജിസ്ട്രേഷൻ നിയന്ത്രണങ്ങൾ ബാധകമാണ്. പുതിയ മൊബൈൽ കണക്‌ഷനുകൾ നൽകുന്നത് സുരക്ഷിതവും സുതാര്യവും ആണെന്ന് ഉറപ്പുവരുത്താൻ ലക്ഷ്യമിട്ടുള്ളതാണ് ടെലികോം വകുപ്പിന്‍റെ ഈ നടപടികൾ.

പുതിയ കണക്‌ഷനുകൾ എടുക്കുന്നവർക്ക് ബയോമെട്രിക് വെരിഫിക്കേഷനും മേൽവിലാസ പരിശോധനയും നിർബന്ധമാണ്. ജമ്മു കശ്മീർ, ആസാം എന്നിവിടങ്ങളിൽ പോലീസ് റിപ്പോർട്ടുകൾകൂടി ലഭിച്ചാലേ മൊബൈൽ കണക്‌ഷനുകൾ ലഭ്യമാകുകയുള്ളൂ. വ്യവസ്ഥകൾ ലംഘിച്ച് കണക്‌ഷനുകൾ നൽകിയാൽ ബന്ധപ്പെട്ട പിഒഎസുകളിൽനിന്ന് ടെലികമ്യൂണിക്കേഷൻ വകുപ്പ് പിഴ തുകയും ഈടാക്കും.

തെറ്റായ വിവരങ്ങളിലൂടെയും വഞ്ചനാ പ്രവർത്തനങ്ങൾ വഴിയും കണക്‌ഷനുകൾ നൽകുന്ന പോയിന്‍റ് ഓഫ് സെയിൽസ് കേന്ദ്രങ്ങളെ കരിമ്പട്ടികയിൽ ഉൾപ്പെടുത്തും. ഇത്തരം പിഒഎസ് കേന്ദ്രങ്ങൾ വഴി കണക്‌ഷൻ എടുത്തവർ വീണ്ടും പരിശോധിച്ച് കൃത്യത ഉറപ്പിക്കലിന് വിധേയമാകേണ്ടിയും വരും.

2025 ജനുവരി 31നു ശേഷം കൃത്യമായ വിവരങ്ങൾ ഇല്ലാതെ ഉപഭോക്താക്കളെ എൻറോൾ ചെയ്യുന്നത് പരിശോധനയിൽ പിടികൂടിയാൽ അവയ്ക്ക് ഓരോന്നിനും ബന്ധപ്പെട്ടവരിൽനിന്ന് 10 ലക്ഷം രൂപ വീതം പിഴ ചുമത്തും.

ബൾക്ക് കണക്‌ഷൻ, സ്ഥാപനങ്ങളിലെ കോർപറേറ്റ് ബിസിനസ് കണക്‌ഷൻ എന്നിവ വഴി മൊബൈൽ ഉപയോഗിക്കുന്ന ഉപഭോക്താക്കൾക്കും ഇനി മുതൽ വ്യക്തിഗത കെവൈസി സ്ഥിരീകരണം നിർബന്ധമാണ്.

ഫോണ്‍ ചോർത്തലിൽ അന്‍വറിനെതിരേ അന്വേഷണം

കൊച്ചി: ഫോണ്‍ ചോര്‍ത്തിയെന്ന വെളിപ്പടുത്തലില്‍ പി.വി. അന്‍വര്‍ എംഎല്‍എയ്‌ക്കെതിരേ കേന്ദ്ര ഏജന്‍സികളുടെ അന്വേഷണം വേണമെന്ന ഹര്‍ജിയില്‍ ഹൈക്കോടതി കേന്ദ്ര-സംസ്ഥാന സര്‍ക്കാരുകള്‍ക്ക് നോട്ടീസയച്ചു. സിബിഐ, ഡിആര്‍ഐ, മലപ്പുറം സൈബര്‍ പോലീസ് എന്നീ ഏജന്‍സികൾക്കാണു നോട്ടീസയച്ചത്.

പ്ലാന്‍ററും ബിസിനസുകാരനുമായ കൊല്ലം സ്വദേശി മുരുകേശ് നരേന്ദ്രന്‍റെ ഹര്‍ജിയിലാണ് ജസ്റ്റീസ് കൗസര്‍ എടപ്പഗത്തിന്‍റെ നടപടി. രാഷ്‌ട്രീയക്കാരുടെയടക്കം ഫോണ്‍ ചോര്‍ത്തിയ കാര്യം അന്‍വര്‍ പരസ്യമായി പറഞ്ഞിട്ടും യാതൊരു നടപടിയുമുണ്ടായില്ലെന്നും എംഎല്‍എയുടെ നടപടി ഭരണഘടന അനുശാസിക്കുന്ന സ്വകാര്യതയുടെ ലംഘനമാണെന്നുമാണ് ഹര്‍ജിയില്‍ പറയുന്നത്.

യുവാവിനെ വിവസ്ത്രനാക്കി മർദിച്ചശേഷം വീഡിയോ പകർത്തി പണം തട്ടാൻ ശ്രമം

കാക്കനാട്: ഡേറ്റിംഗ് ആപ് വഴി പരിചയപ്പെട്ട യുവാവിനെ വിവസ്ത്രനാക്കി മർദിച്ചശേഷം വീഡിയോ പകർത്തി പണം തട്ടാൻ ശ്രമിച്ച കേസിൽ ആറംഗ സംഘം പിടിയിൽ.

കോഴിക്കോട് കല്ലായി പൂച്ചങ്ങൽ വീട്ടിൽ അജ്മൽ (23), മലപ്പുറം മമ്പാട് നിലമ്പൂർ കീരിയത്തു വീട്ടിൽ ഫർഹാൻ (23), മലപ്പുറം നിലമ്പൂർ അരിവക്കോട് മേലേപുത്തൻവീട്ടിൽ അനന്തു (22), മലപ്പുറം എടക്കര കാർക്കുയിൽ വീട്ടിൽ മുഹമ്മദ് ഷിബിനു സാലി (23), കണ്ണൂർ ഉരുവച്ചാൽ അടിയോട് വീട്ടിൽ റയസ് (26), കണ്ണൂർ മട്ടന്നൂർ ഫാത്തിമ മൻസിൽ സമദ് (27)എന്നിവരെയാണ് തൃക്കാക്കര പോലീസ് അറസ്റ്റ് ചെയ്തത്. പ്രതികളിൽനിന്നു 10 മൊബൈൽ ഫോണുകളും ഒരു ലാപ്ടോപ്പും പിടിച്ചെടുത്തു.

ഇടപ്പള്ളി സ്വദേശിയായ യുവാവിനെ സ്വകാര്യ ഡേറ്റിംഗ് ആപ് വഴി വലയിലാക്കിയ പ്രതികൾ പടമുകൾ തൊട്ടിയമ്പലത്തിനു സമീപത്തെ ഹോസ്റ്റലിലേക്ക് ബുധനാഴ്ച രാത്രി വിളിച്ചുവരുത്തി മർദിക്കുകയും 50,000 രൂപ വിലവരുന്ന ഫോൺ കൈക്കലാക്കുകയും ചെയ്തു. തുടർന്ന് യുവാവിനെക്കൊണ്ട് താൻ സ്വവർഗാനുരാഗിയാണെന്നു പറയിക്കുന്ന വീഡിയോ പകർത്തി.

ഒരു ലക്ഷം രൂപ നൽകിയില്ലെങ്കിൽ ദൃശ്യങ്ങളും ഫോണിലെ മറ്റു കാര്യങ്ങളും വാട്സ് ആപ് വഴി പ്രചരിപ്പിക്കുമെന്ന് ഭീഷണിപ്പെടുത്തി. പണം നൽകാമെന്നു സമ്മതിച്ചപ്പോൾ യുവാവിനെ വിട്ടയച്ച പ്രതികൾ പണം പ്രതീക്ഷിച്ച് ഹോസ്റ്റലിൽ തന്നെ താമസം തുടരുകയായിരുന്നു. വീട്ടിലെത്തിയ യുവാവ് അച്ഛനോടു സംഭവം പറഞ്ഞതോടെ കുടുംബം തൃക്കാക്കര അസിസ്റ്റന്‍റ് പോലീസ് കമ്മീഷണർ പി.വി. ബേബിക്ക് പരാതി നൽകുകയായിരുന്നു.

തൃക്കാക്കര പോലീസ് പടമുഗൾ ഭാഗത്തു നടത്തിയ അന്വേഷണത്തിൽ പ്രതികൾ സഞ്ചരിച്ച ഐ 20 കാർ കണ്ടെത്തി. തുടർന്നു സമീപത്തെ ഹോസ്റ്റലിൽനിന്ന് ആറു പ്രതികളെയും പിടികൂടി. തൃക്കാക്കര ഇൻസ്പെക്ടർ എ.കെ. സുധീറിന്‍റെ നേതൃത്വത്തിൽ എസ്ഐമാരായ വി.ബി. അനസ്, വി. ബൈജു, സീനിയർ സിവിൽ പോലീസ് ഓഫീസർമാരായ സിനാജ്, സുജിത്ത് എന്നിവരടങ്ങുന്ന സംഘമാണു പ്രതികളെ അറസ്റ്റ് ചെയ്തത്.

കത്തോലിക്ക-യാക്കോബായ സംയുക്ത മാർഗരേഖയുമായി ദൈവശാസ്ത്ര കമ്മീഷന്‍ യോഗം

കോട്ടയം: ആശുപത്രികളിലും ഉന്നതവിദ്യാഭ്യാസ സ്ഥാപനങ്ങളിലും ഇരുസഭകളിലേയും വിശ്വാസികള്‍ക്ക് അജപാലന ശുശ്രൂഷ നൽകുന്നതിലുള്ള സംയുക്ത മാര്‍ഗരേഖ മാങ്ങാനം സ്പിരിച്വാലിറ്റി സെന്‍ററില്‍ നടന്ന കത്തോലിക്ക-യാക്കോബായ സുറിയാനി ഓര്‍ത്തഡോക്‌സ് ദൈവശാസ്ത സംവാദ കമ്മീഷന്‍ യോഗത്തില്‍ അവതരിപ്പിക്കുകയും ഇരുസഭകളിലെ യും സുന്നഹദോസിന്‍റെ അംഗീകാരത്തിനായി സമര്‍പ്പിക്കാനും തീരുമാനിക്കുകയും ചെയ്തു.

ആശുപത്രികളില്‍ ഇരുസഭകളിലേയും രോഗികള്‍ക്ക് അത്യാവശ്യ സന്ദര്‍ഭങ്ങളില്‍ രോഗീലേപനം (രോഗികളുടെ തൈലാഭിഷേകം) കുമ്പസാരം, വിശുദ്ധ കുര്‍ബാന അവരുടെ സഭയിലെ വൈദികരില്‍നിന്ന് ലഭ്യമാക്കുവാനുള്ള സാഹചര്യങ്ങള്‍ ഉണ്ടാക്കുവാനും അപ്രകാരം സാധിക്കാതെ വരുന്ന സന്ദര്‍ഭങ്ങളില്‍ ഇതരസഭയിലെ വൈദികരില്‍നിന്നും തടസം കൂടാതെ ലഭ്യമാക്കുവാനുള്ള ക്രമീകരണങ്ങളാണു മാര്‍ഗരേഖയിലുള്ളത്.

ഉന്നത വിദ്യാഭ്യാസ സ്ഥാപനങ്ങളില്‍ ഇരുസഭകളിലേയും വിദ്യാര്‍ഥി-വിദ്യാര്‍ഥിനികള്‍ക്ക് അവരവരുടെ സഭയിലെ അജപാലന ശുശ്രൂഷ ലഭിക്കുന്നതിനുള്ള ക്രമീകരണങ്ങളും മാര്‍ഗരേഖയില്‍ പറയുന്നുണ്ട്.

ഡിജിറ്റല്‍ ലോകത്ത് വിശ്വാസജീവിതത്തിലെ വെല്ലുവിളികളും, സാധ്യതകളും എന്ന വിഷയത്തെക്കുറിച്ച് ഡീക്കന്‍ ഡോ. അനീഷ് കെ. ജോയി, റവ.ഡോ. അഗസ്റ്റിന്‍ കടേപ്പറമ്പില്‍ എന്നിവരും കേരളത്തില്‍നിന്നുള്ള വിദേശ കുടിയേറ്റത്തിന്‍റെ പ്രത്യാഘാതങ്ങളും അജപാലന വെല്ലുവിളികളും എന്നീ വിഷയങ്ങളിൽ ഫാ. ജെറി കുര്യന്‍ എന്നിവരും പ്രബന്ധങ്ങള്‍ അവതരിപ്പിച്ചു.

റവ.ഡോ. ഫിലിപ്പ് നെല്‍പ്പുരപ്പറമ്പില്‍ അജപാലന സംയുക്ത മാര്‍ഗരേഖ അവതരിപ്പിച്ചു. ഇരുസഭകളും ഇതുവരെ ഉണ്ടാക്കിയ സംയുക്ത ഉടമ്പടികളുടെ അവലോകനവും ഈ ഉടമ്പടികള്‍ ഇരുസഭകളും പൂര്‍ണമായും നടപ്പാക്കുന്നുവെന്ന് ഉറപ്പ് വരുത്താനുള്ള തീരുമാനങ്ങളും ഉണ്ടായി.

വത്തിക്കാനിലെ സഭാ ഐക്യകാര്യാലയത്തിന്‍റെ സെക്രട്ടറി ആര്‍ച്ച്ബിഷപ് ഫ്‌ളാവിയോ പാച്ചേ, യാക്കോബായ സഭാ എക്യുമെനിക്കല്‍ ഓഫീസ് പ്രസിഡന്‍റ് ഡോ. കുര്യാക്കോസ് മാര്‍ തെയോഫിലോസ് മെത്രാപ്പോലീത്ത എന്നിവര്‍ സമ്മേളനത്തില്‍ അധ്യക്ഷത വഹിച്ചു.

കത്തോലിക്ക സഭയെ പ്രതിനിധീകരിച്ച് ബിഷപ് മാര്‍ ജോസഫ് കല്ലറങ്ങാട്ട്, ബിഷപ് തോമസ് മാര്‍ കൂറിലോസ്, ബിഷപ് ഡോ. സെല്‍വിസ്റ്റര്‍ പൊന്നുമുത്തന്‍, റവ.ഡോ. ജേക്കബ് തെക്കേപറമ്പില്‍, റവ.ഡോ. അഗസ്റ്റിന്‍ കടേപ്പറമ്പില്‍, റവ.ഡോ. ഫിലിപ്പ് നെല്‍പ്പുരപ്പറമ്പില്‍, ഫാ. ഹയാസിന്ത് ഡെസ്റ്റിവെല്ലെ തുടങ്ങിയവര്‍ പങ്കെടുത്തു.

യാക്കോബായ സഭയെ പ്രതിനിധീകരിച്ച് ഡോ. മാര്‍ അന്തിമോസ് മാത്യൂസ് മെത്രാപ്പോലീത്ത, ഡോ. ആദായി ജേക്കബ് കോര്‍എപ്പിസ്‌കോപ്പ, ഡോ. കുര്യാക്കോസ് കോര്‍എപ്പിസ്‌കോപ്പ മൂലയില്‍, ഫാ. ഡാനിയല്‍ തട്ടാറയില്‍, ഫാ. ജെറി കുര്യന്‍, റവ.ഡോ. ഗ്രിഗര്‍ ആര്‍. കൊള്ളന്നൂര്‍, ഫാ. പി.എം. ബിജു, റവ.ഡോ. സലീബ റമ്പാന്‍, ഡീക്കന്‍ ഡോ. അനീഷ് കെ. ജോയ് എന്നിവര്‍ പങ്കെടുത്തു.

ഉമ്മൻചാണ്ടി സ്മാരക പുരസ്കാരം നൽകും

തൃശൂർ: ലഹരിവിമുക്ത കേരളത്തിനുവേണ്ടി സമഗ്രസംഭാവന നൽകിയ രാഷ്‌ട്രീയ, സാംസ്കാരികരംഗത്തെ വ്യക്തികളെ വർഷംതോറും കണ്ടെത്തി ഉമ്മൻ ചാണ്ടി സ്മാരക പുരസ്കാരം എന്ന പേരിൽ പുരസ്കാരം നൽകാൻ മദ്യവിമോചനമഹാസഖ്യം സംസ്ഥാന കമ്മിറ്റി യോഗം തീരുമാനിച്ചു. വരുന്ന മേയ്മാസത്തിൽ മലപ്പുറം വെളിയംകോട് നടത്തുന്ന സംസ്ഥാനസമ്മേളനത്തോടനുബന്ധിച്ചാണ് ജേതാവിനെ കണ്ടെത്തി പുരസ്കാരം നൽകുക.

തൃശൂർ കുരിയച്ചിറ ഗാന്ധിമന്ദിരത്തിൽ ചേർന്ന സംസ്ഥാന കമ്മിറ്റി യോഗം രക്ഷാധികാരി സി.ഐ. അബ്ദുൾ ജബ്ബാർ ഉദ്ഘാടനം ചെയ്തു. സംസ്ഥാനപ്രസിഡന്‍റ് ഇ.എ. ജോസഫ് അധ്യക്ഷത വഹിച്ചു. ഈ വർഷത്തെ പുരസ്കാരജേതാവിനെ കണ്ടെത്തുവാൻ സി.ഐ. അബ്ദുൾ ജബ്ബാർ ചെയർമാനായി ഒന്പതംഗ കമ്മിറ്റിയെയും യോഗം തെരഞ്ഞെടുത്തു.

ജനറൽ സെക്രട്ടറി കെ.എ. മഞ്ജുഷ, ഖജാൻജി അബ്ദുൾ റഷീദ്, സെക്രട്ടറി കമറുദീൻ വെളിയംകോട്, നിർവാഹകസമിതി അംഗങ്ങളായ എൻ. കുമാരദാസ് ആലപ്പുഴ, ഹരി വെള്ളാനി പാലക്കാട്, പോൾ ചെവിടൻ, തോമസ് കരിപ്പായി, ബേബി കണ്ണംപടത്തി എന്നിവർ പ്രസംഗിച്ചു.

അഴിമതി നടത്താന്‍ സിപിഎം വൈദ്യുതി മന്ത്രിയെ നോക്കുകുത്തിയാക്കുന്നു: രമേശ് ചെന്നിത്തല

കോഴിക്കോട്: മണിയാർ വൈദ്യുത പദ്ധതി കരാർ കാർബൊറാണ്ടം ഗ്രൂപ്പിന്‍റെ താത്പര്യത്തിന് അനുകൂലമായി നീട്ടിനൽകാനുള്ള സർക്കാർ നീക്കത്തിൽ വ്യവസായ മന്ത്രിക്കു മറുപടിയുമായി രമേശ് ചെന്നിത്തല. 30 വർഷത്തേക്കുള്ള ബിഒടി കരാർ ആണ് കാർബൊറാണ്ടം കമ്പനിക്കു നൽകിയത്.

കമ്പനിക്കു കരാർ നീട്ടിനൽകുന്നത് അഴിമതിയാണ്. ധാരണാപത്രം പാലിച്ചിട്ടില്ല. കെഎസ്ഇബിക്കു പദ്ധതി കൈമാറണം എന്ന് വൈദ്യുതി ബോർഡ്‌ നൽകിയ കത്തിന്‍റെ പകർപ്പുണ്ടെന്നും ചെന്നിത്തല പറഞ്ഞു. താന്‍ കാര്യങ്ങള്‍ പഠിച്ചിട്ടാണു പറയുന്നത്. ഇതുമായി ബന്ധപ്പെട്ട എല്ലാരേഖകളുമുണ്ട്.

എന്തെങ്കിലും തെറ്റുണ്ടെങ്കില്‍ അതു പറയാന്‍ വ്യവസായ മന്ത്രിയെ വെല്ലുവിളിക്കുന്നുവെന്നും ചെന്നിത്തല വാര്‍ത്താസമ്മേളനത്തില്‍ പറഞ്ഞു. 30 വർഷം കഴിയുമ്പോൾ മണിയാർ പദ്ധതി സർക്കാരിനു കൈമാറണം എന്നാണു ധാരണ. ഡിസംബർ 30ന് 30 വർഷം പൂർത്തിയാകും.

21 ദിവസം മുൻപ് ഇതിനു കമ്പനിക്കു നോട്ടീസ് കൊടുക്കണം. ആ നോട്ടീസ് സർക്കാർ കൊടുത്തിട്ടില്ല. ഈ കമ്പനിക്ക് 25 വർഷംകൂടി കൊടുക്കുന്നത് അഴിമതിയാണെന്നു ചെന്നിത്തല വിമർശിച്ചു. കോടികളുടെ അഴിമതിയാണ് നടക്കുന്നത്. കമ്പനിയുമായുള്ള 91ലെ കരാറിൽ, കരാർ പുതുക്കിക്കൊടുക്കാം എന്ന് പറഞ്ഞിട്ടില്ല.

വെള്ളപ്പൊക്കമുണ്ടായ സമയത്ത് ഒരു നാശനഷ്ടവും കമ്പനിക്ക് ഉണ്ടായിട്ടില്ല. നാശനഷ്ടം ഉണ്ടായെങ്കിൽ ഇൻഷ്വറൻസ് ഇല്ലേ, അത് ഈടാക്കാമല്ലോയെന്നും ചെന്നിത്തല പറഞ്ഞു. വ്യവസായ മന്ത്രിയും മുഖ്യമന്ത്രിയും വൈദ്യുത മന്ത്രിയെ നോക്കുത്തിയാക്കിയിരിക്കുകയാണ്.

മുഖ്യമന്ത്രിയും വ്യവസായ മന്ത്രിയും പറയുന്നിടത്ത് ഒപ്പിട്ടു കൊടുക്കുന്ന വൈദ്യുതി മന്ത്രി ആ സ്ഥാനത്ത് തുടരണോയെന്ന് ചെന്നിത്തല ചോദിച്ചു. വ്യവസായ മന്ത്രി സ്വകാര്യ കമ്പനിക്ക് കൊള്ളലാഭം ഉണ്ടാക്കാൻ കൂട്ടുനിൽക്കുന്നു. കേരളത്തിൽ 12 ജല പദ്ധതികൾ പ്രവർത്തിക്കുന്നുണ്ട്.

മണിയാറിൽ കരാർ നീട്ടിക്കൊടുത്താൽ മറ്റുള്ളവർക്കും നീട്ടിക്കൊടുക്കേണ്ടി വരുമെന്നും ചെന്നിത്തല മുന്നറിയിപ്പ് നല്‍കി.

മണിയാർ കരാർ നീട്ടുന്നത് കെഎസ്ഇബി എതിർത്തെന്നു രേഖകൾ

കോഴിക്കോട്: മണിയാർ കരാർ കാർബൊറാണ്ടം ഗ്രൂപ്പിന്‍റെ താത്പര്യത്തിന് അനുകൂലമായി നീട്ടിനൽകാനുള്ള സർക്കാർ നീക്കം കെഎസ്ഇബിയുടെ എതിർപ്പ് മറികടന്നെന്നു രേഖകൾ.

കരാർ നീട്ടണമെന്ന കമ്പനിയുടെ വാദങ്ങളിൽ കഴമ്പില്ലെന്നും പ്രളയകാലത്ത് ഉത്പാദന നഷ്ടമെന്ന വാദം നിലനിൽക്കുന്നതല്ലെന്നും കരാർ പുതുക്കുന്നത് സർക്കാർ താത്പര്യത്തിനു വിരുദ്ധമെന്നും കെഎസ്ഇബി നിലപാടെടുത്തിരുന്നു.

ഇത് സംബന്ധിച്ച് സംസ്ഥാന സർക്കാരിന് കെഎസ്ഇബി സമർപ്പിച്ച റിപ്പോർട്ടാണു പുറത്ത് വന്നത്. പ്രളയകാലത്തും മണിയാറിൽ സാധാരണ ഉത്പാദനം ഉണ്ടായെന്നാണ് കെഎസ്ഇബിയുടെ റിപ്പോർട്ട്. കാർബൊറണ്ടം കമ്പനിയുമായി കരാർ നിലവിൽ വന്നത് 1991 മേയ്‌ 18നാണ്. 2024ൽ പദ്ധതി തിരിച്ചു സമർപ്പിക്കണമെന്നാണ് കരാർ.

പദ്ധതിയിൽ കമ്പനി നിക്ഷേപം നടത്തിയതിന്‍റെ രേഖകൾ ഒന്നും കെഎസ്ഇബിക്ക് നൽകിയില്ല.കെഎസ്ഇബിയുടെ അനുമതി വാങ്ങാതെ പദ്ധതിയിൽ അധിക നിക്ഷേപം നടത്താൻ കരാർ പ്രകാരം സാധിക്കില്ല.

അങ്ങനെ ചെയ്താൽ അതു കരാർ വ്യവസ്ഥയുടെ ലംഘനമാണ്. ഈ കരാർ നീട്ടിനൽകിയാൽ ബിഒടി വ്യവസ്ഥയിൽ നിർമിച്ച മറ്റ് കമ്പനികൾ ഇതേ ആവശ്യം ഭാവിയിൽ ഉന്നയിക്കുമെന്നു കെഎസ്ഇബി സർക്കാരിനു സമർപ്പിച്ച റിപ്പോർട്ടിൽ മുന്നറിയിപ്പു നൽകുന്നു.

മണിയാറിൽ 2018 ലെ പ്രളയത്തിൽ ഉത്പാദന നഷ്ടം ഉണ്ടായിട്ടില്ലെന്നും 2019 സെപ്റ്റംബർ, ഒക്‌ടോബർ മാസങ്ങളിൽ മാത്രം നേരിയ നഷ്ടം ഉണ്ടായെന്നും റിപ്പോർട്ട് പറയുന്നു. കരാർ കാലാവധി കാലത്തെ നഷ്ടത്തിനു സർക്കാരിന് ബാധ്യതയില്ലെന്നാണ് കെഎസ്ഇബി നിലപാട്. കരാർ അനുസരിച്ച് ഇൻഷ്വറൻസ് സംരക്ഷണമുണ്ട്.

നഷ്ടം നികത്താൻ സർക്കാരിന് ഒരു ഉത്തരവാദിത്തവും ഇല്ലെന്നും കെഎസ്ഇബി ചൂണ്ടിക്കാട്ടുന്നു.

സർവകലാശാലകളെ കാവിവത്കരിക്കാനുള്ള നടപടി ഗവർണർ അവസാനിപ്പിക്കണം: ടി.പി. രാമകൃഷ്ണൻ

തിരുവനന്തപുരം: സർവകലാശാലകളുടെ സ്വയംഭരണവും ജനാധിപത്യവും തകർത്തു കാവിവത്കരിക്കാനുള്ള നടപടികൾ ഗവർണർ ആരിഫ് മുഹമ്മദ് ഖാൻ അടിയന്തരമായി അവസാനിപ്പിക്കണമെന്ന് എൽഡിഎഫ് കണ്‍വീനർ ടി.പി.രാമകൃഷ്ണൻ.

സർവകലാശാലകളുടെ ജനാധിപത്യത്തിന്‍റെയും സ്വയംഭരണത്തിന്‍റെയും ഭാഗമായാണു സിൻഡിക്കറ്റുകൾ രൂപീകരിക്കപ്പെട്ടിട്ടുള്ളത്. ഇതിന്‍റെ തുടർച്ചയായാണ് അവർക്കു നൽകിയിട്ടുള്ള അധികാരങ്ങൾ.

സിൻഡിക്കറ്റ് തീരുമാനങ്ങൾ നടപ്പിലാക്കേണ്ട ഉത്തരവാദിത്വം വൈസ് ചാൻസലർക്കുണ്ട്. എന്നാൽ ഗവർണറുടെ കാവിവത്കരണ അജണ്ടയുടെ ഭാഗമായി പിൻവാതിൽ നിയമനം നേടിയ വൈസ് ചാൻസലർമാർ സംഘപരിവാർ അജണ്ടകൾ മാത്രമേ നടപ്പിലാക്കൂവെന്ന സമീപനമാണു സ്വീകരിക്കുന്നത്.

കേന്ദ്ര സർക്കാരിന്‍റെ താത്പര്യപ്രകാരം ഗവർണർ നടത്തിക്കൊണ്ടിരിക്കുന്ന നിലപാടുകളെ സംബന്ധിച്ച് യുഡിഎഫ് അഭിപ്രായം വ്യക്തമാക്കണമെന്നും ടി.പി.രാമകൃഷ്ണൻ പറഞ്ഞു.

തൊണ്ണൂറ്റഞ്ചിന്‍റെ മധുരം പങ്കുവച്ച് ടി. പദ്മനാഭൻ

പയ്യന്നൂർ: കഥകളുടെ തമ്പുരാൻ ടി. പദ്മനാഭന്‍റെ 95-ാം ജന്മദിനം ആഘോഷിച്ചു. പോത്താംകണ്ടം ആനന്ദഭവനത്തിൽ സ്വാമി കൃഷ്ണാനന്ദ ഭാരതിയുടെ നേതൃത്വത്തിലാണ് ജന്മദിനാഘോഷം സംഘടിപ്പിച്ചത്.

സംഗീത സംവിധായകരായ വിദ്യാധരൻ, എം. ജയചന്ദ്രൻ, ഇന്ത്യൻ കലകൾ, സംസ്കാരങ്ങൾ എന്നിവയെക്കുറിച്ച് പഠനം നടത്തുന്ന ഡോ. റോക്സാനെ കമയാനി, എഴുത്തുകാരൻ ആലങ്കോട് ലീലാകൃഷ്ണൻ, കെ.ജി. വേണുഗോപാൽ, സിനിമാനടി ഷീല തുടങ്ങിയവർ പിറന്നാൾ ആഘോഷത്തിൽ ആശംസകൾ നേരാൻ എത്തിയിരുന്നു.

ചെറുതാഴം ചന്ദ്രനും സംഘവും അവതരിപ്പിച്ച ചെണ്ട മേളം, കുറിച്ചി നടേശന്‍റെയും സംഘത്തിന്‍റെയും അർജുന നൃത്തം, ടി.എം. പ്രേംനാഥിന്‍റെ മയൂര നൃത്തം എന്നിവയും അരങ്ങേറി. കേക്ക് മുറിക്കലും പിറന്നാൾ സദ്യയും ആഘോഷത്തിന്‍റെ ഭാഗമായി ഒരുക്കിയിരുന്നു.

ടി. പദ്മനാഭന്‍റെ ജീവിതം പുതുതലമുറയ്ക്കു സാധനാപാഠം: ശ്രീധരൻ പിള്ള

കണ്ണൂർ: കഥാകൃത്ത് ടി. പദ്മനാഭന്‍റെ സാഹിത്യ ജീവിതം വിസ്മയകരമാണെന്നും അദ്ദേഹത്തിന്‍റെ ജീവിതത്തിലെ ഒരുപാടു കാര്യങ്ങൾ പുതുതലമുറയ്ക്കു സാധനാപാഠമാണെന്നും ഗോവ ഗവർണർ പി.എസ്.ശ്രീധരൻ പിള്ള.

ടി.പദ്മനാഭന്‍റെ 95-ാം ജന്മദിനത്തിൽ കണ്ണൂർ പൊടിക്കുണ്ടിലെ വീട്ടിലെത്തി പിറന്നാൾ ആശംസകൾ നേർന്ന ശേഷം മാധ്യമങ്ങളോടു സംസാരിക്കുകയായിരുന്നു അദ്ദേഹം. എല്ലാ മേഖലകളെക്കുറിച്ചും സമഗ്രമായി പഠിച്ചാണു ടി.പദ്മനാഭൻ ഇപ്പോഴും സംസാരിക്കുന്നതെന്ന് അദ്ദേഹം പറഞ്ഞു.

ഷഷ്ഠിപൂർത്തിയും സപ്തതിയും അശീതിയും ഒന്നും തന്നെ താൻ ഇതുവരെ ആഘോഷിച്ചിട്ടില്ലെന്ന് ടി.പദ്മനാഭൻ പറഞ്ഞു. പോത്താംകണ്ടം ആനന്ദ ഭവനത്തിലെ സ്വാമി കൃഷ്ണാനന്ദഭാരതിയാണ് 90 വയസു മുതൽ തന്‍റെ ജന്മദിനം ആഘോഷിക്കുന്നതെന്നും അദ്ദേഹം കൂട്ടിച്ചേർത്തു.

കേരള വന നിയമ ഭേദഗതി ബില്‍ 2024 ജനദ്രോഹപരം: ഇന്‍ഫാം

കൊച്ചി: കേരള വനംവകുപ്പിന്‍റെ വന നിയമ ഭേദഗതി ബില്‍ 2024 ജനദ്രോഹപരവും ജനങ്ങളുടെ ജീവിക്കാനുള്ള അവകാശത്തിന്മേലുള്ള കടന്നുകയറ്റവുമാണെന്ന് ഇന്‍ഫാം ദേശീയ രക്ഷാധികാരി മാര്‍ റെമീജിയോസ് ഇഞ്ചനാനിയില്‍. ഇന്‍ഫാം ദേശീയ എക്‌സിക്യൂട്ടീവ് മീറ്റിംഗ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.

1961ലെ കേരള ഫോറസ്റ്റ് ആക്ടില്‍ പറഞ്ഞിരിക്കുന്ന നിയമത്തിന്‍റെ പല വിഭാഗങ്ങളിലും അടിമുടി മാറ്റങ്ങള്‍ വരുത്തി ഫോറസ്റ്റ് ഉദ്യോഗസ്ഥര്‍ക്ക് വാറന്‍റോ മജിസ്‌ട്രേറ്റിന്‍റെ ഉത്തരവോ ഇല്ലാതെ അധികാര ദുര്‍വിനിയോഗം നടത്താനും ജനങ്ങളെ പീഡിപ്പിക്കാനുമുള്ള സ്വാതന്ത്ര്യമാണ് പുതിയ ബില്ലില്‍ കൊടുത്തിരിക്കുന്നതെന്ന് ഇന്‍ഫാം ദേശീയ ചെയര്‍മാന്‍ ഫാ. തോമസ് മറ്റമുണ്ടയില്‍ പറഞ്ഞു.

നിലവിലുള്ള ഫോറസ്റ്റ് ആക്ടിലെ സെക്ഷന്‍ 52ലും 63ലും ആണ് പ്രധാനമായും പുതിയ ഭേദഗതികള്‍ വരുത്തിയിരിക്കുന്നത്. ഈ ഭേദഗതികള്‍ പിന്‍വലിക്കാന്‍ തയാറായില്ലെങ്കില്‍ ശക്തമായ സമരപരിപാടികളായി രംഗത്തിറങ്ങുമെന്ന് ഇന്‍ഫാം സംസ്ഥാന പ്രസിഡന്‍റ് ജോസ് ഇടപ്പാട്ട് പറഞ്ഞു.

ഇന്‍ഫാം ദേശീയ ഡയറക്ടര്‍ ഫാ. ജോസഫ് ചെറുകരക്കുന്നേല്‍, സെക്രട്ടറി സണ്ണി അരഞ്ഞാണിപുത്തന്‍പുരയില്‍, ദേശീയ കമ്മിറ്റി അംഗങ്ങളായ മാത്യു മാമ്പറമ്പില്‍, ജോയി തെങ്ങുംകുടി, സി.യു. ജോണ്‍, ട്രഷറര്‍ ജെയ്‌സണ്‍ ചെംബ്ലായില്‍, ഇന്‍ഫാം കേരള സംസ്ഥാന ഡയറക്ടര്‍ ഫാ. ജോര്‍ജ് പൊട്ടയ്ക്കല്‍, സംസ്ഥാന കോഓര്‍ഡിനേറ്റര്‍ ഫാ. ജോസ് മോനിപ്പള്ളി തുടങ്ങിയവര്‍ പ്രസംഗിച്ചു.

രാജഗിരി സ്പ്ലെൻഡോറെ സമാപിച്ചു

കളമശേരി: രാജഗിരി കോളജ് ഓഫ് സോഷ്യൽ സയൻസസിൽ ( ഓട്ടോണമസ്) പത്താമത് അന്താരാഷ്‌ട്ര ബിരുദ കലോത്സവം (സ്‌പ്ലെൻഡോറെ -2024) സമാപിച്ചു. ഇരിങ്ങാലക്കുട ക്രൈസ്റ്റ് കോളജ് ഓവറോൾ ചാമ്പ്യന്മാരായി. തേവര സേക്രഡ് ഹാർട്ട് കോളജാണു റണ്ണറപ്പ്.

രാജ്യത്തിനകത്തുനിന്നും പുറത്തുനിന്നുമായി 900ത്തോളം വിദ്യാർഥികൾ പങ്കെടുത്തു. മൂന്നു ലക്ഷത്തിലധികം രൂപയായിരുന്നു സ്പ്ലെൻഡോറെ 2024ലെ സമ്മാനത്തുക. സമാപനദിനമായ ഇന്നലെ 1500 വിദ്യാർഥികളുടെ നൃത്തവും ഡിജെയും ഉണ്ടായിരുന്നു.

സിഎംഐ സേക്രഡ് ഹാർട്ട് പ്രൊവിൻഷ്യലും കോളജ് മാനേജരുമായ ഫാ. ബെന്നി നൽക്കര കലോത്സവം ഉദ്ഘാടനം ചെയ്തു. സമാപനച്ചടങ്ങിൽ കോളജ് അഡ്മിനിസ്ട്രേറ്റർ ഫാ. റിന്‍റിൽ മാത്യു, അസിസ്റ്റന്‍റ് ഡയറക്ടർ റവ. ഡോ. ഷിന്‍റോ ജോസഫ്, സ്റ്റുഡന്‍റ്സ് അഫയേഴ്സ് ഡീൻ ഡോ. ആൻ ബേബി എന്നിവർ പ്രസംഗിച്ചു.

വയ്ക്കാൻ അരിയില്ലാത്തതുകൊണ്ടാ സാറെ, മോഷ്ടിച്ചെന്നു പറയരുതേ...

തൃശൂർ: “വയ്ക്കാനരിയില്ലാത്തതുകൊണ്ട് നാഴിയരി ഇന്ന് സ്കൂളിൽനിന്ന് ഞാൻ എടുത്തു സാറെ, മോഷ്ടിച്ചു എന്നു പറയരുത്’’. ശമ്പളത്തിന്‍റെ കാര്യം എന്തായി എന്നു ചോദിക്കാൻ വിളിക്കാറുള്ള ഒരു സ്കൂൾപാചകത്തൊഴിലാളി അവരുടെ യൂണിയന്‍റെ (എഐടിയുസി) സംസ്ഥാന ജനറൽ സെക്രട്ടറി പി.ജി. മോഹനനോടു നടത്തിയ ദയനീയ വെളിപ്പെടുത്തലാണിത്.

ഒരിക്കൽപ്പോലും ശന്പളം കൃത്യമായി കിട്ടാത്ത സ്കൂൾ പാചകത്തൊഴിലാളിക്ക് ഒക്‌ടോബർ, നവംബർ മാസങ്ങളിലെ ശമ്പളം ഡിസംബർ പകുതിയായിട്ടും കിട്ടിയിട്ടില്ല. സെപ്റ്റംബറിൽ ഓണാവധിയായതിനാൽ 14 ദിവസത്തെ ശന്പളംമാത്രമേ കിട്ടിയിരുന്നുള്ളൂ, അതും ആയിരം രൂപ പിടിച്ചുവച്ചാണു നല്കിയത്.

ഒരു മാസത്തെ ശമ്പളംപോലും മുടങ്ങിയാൽ പട്ടിണിയെ അഭിമുഖീകരിക്കേണ്ടവിധം യാതൊരു സമ്പാദ്യവും കൈമുതലായി ഇല്ലാത്തവരാണു രണ്ടുമാസത്തിലധികമായി ശന്പളമില്ലാത്ത അവസ്ഥ നേരിടുന്നത്. അരി വാങ്ങാനും വീട്ടുവാടക കൊടുക്കാനും കുട്ടികൾക്കു ഫീസ് കൊടുക്കാനും തുടങ്ങി ജോലിക്കുപോകാൻ ബസ് കൂലി കൊടുക്കാൻപോലും പണമില്ലാതെ കഷ്ടപ്പെടുകയാണവർ.

സംസ്ഥാനത്തെ സ്കൂൾ പാചകത്തൊഴിലാളികൾക്ക് യഥാസമയം ശമ്പളം കൊടുക്കുന്ന ഏർപ്പാട് സർക്കാർ അവസാനിപ്പിച്ചിട്ടു മൂന്നു വർഷം പിന്നിടുകയാണ്. മാസങ്ങളുടെ കുടിശികയാകുമ്പോൾ ഒരു മാസത്തെ ശമ്പളം അനുവദിക്കും. കേന്ദ്ര മാൻഡേറ്ററി വിഹിതമെന്നു പറഞ്ഞ് അതിൽനിന്നു വീണ്ടും ആയിരം രൂപ പിടിച്ചുവയ്ക്കും. മൂന്നു വർഷമായി ഇതാണു പാചകത്തൊഴിലാളികളുടെ ശമ്പളവിതരണത്തിന്‍റെ രീതി.

നിവേദനങ്ങളും പ്രതിഷേധസമരങ്ങളും യാചനാസമരവും ഉൾപ്പെടെ തൊഴിലാളികളുടെ ആവലാതികളും മുറവിളികളൊന്നും കേരള സർക്കാർ വകയ്ക്കുന്നില്ലെന്നാണു തൊഴിലാളികളുടെ ആക്ഷേപം.

മുൻസർക്കാരുകൾ തൊഴിലാളികളുടെ വേതനത്തിൽ അമ്പതു രൂപവീതം പ്രതിവർഷം ബജറ്റിലൂടെ വർധിപ്പിച്ചുനൽകിയിരുന്ന പതിവ് ഇപ്പോൾ ഇല്ല. പാചകത്തൊഴിലാളികളുടെ വേതനം വർധിപ്പിച്ചിട്ട് നാലു വർഷമായി. മാത്രമല്ല, മിനിമം വേതനത്തിന്‍റെ പരിധിയിൽനിന്ന് ഒഴിവാക്കുകയും ചെയ്തു.

തമിഴ്നാട്ടിൽ പാചകത്തൊഴിലാളികളെ സർക്കാർജീവനക്കാരായി അംഗീകരിച്ച് അവർക്കു പെൻഷനും മറ്റ് ആനുകൂല്യങ്ങളും നൽകുന്നുണ്ടെന്നു തൊഴിലാളികൾ ചൂണ്ടിക്കാട്ടി.

മുല്ലപ്പെരിയാര്‍ 130 അടിയിലേക്ക്

കുമളി: മുല്ലപ്പെരിയാര്‍ അണക്കെട്ടിലെ ജലനിരപ്പ് 130 അടിയിലേക്ക് കുതിക്കുന്നു. സെക്കന്‍ഡില്‍ 22100 ഘനയടി വെള്ളമാണ് അണക്കെട്ടിലേക്കൊഴുകിയെത്തുന്നത്. ഇന്നലെ വൈകുന്നേരം നാലിന് 124.5 അടിയാണ് ജലനിരപ്പ്. രാവിലെ 120.6 അടിയായിരുന്ന ജലനിരപ്പ് ഒന്‍പത് മണിക്കൂറില്‍ നാലടി ഉയര്‍ന്നു.

അണക്കെട്ട് പ്രദേശത്ത് കഴിഞ്ഞ രാത്രിയും പകലും നിര്‍ത്താതെ കനത്ത മഴയാണ്. അണക്കെട്ടില്‍ 101 മില്ലിമീറ്ററും തേക്കടിയില്‍ 108.2 മില്ലീമീറ്ററുമാണ് മഴ പെയ്തത്. ഇന്നലെ രാവിലെ സെക്കന്‍ഡില്‍ 3153 ഘനയടി വെള്ളമാണ് അണക്കെട്ടിലേക്കൊഴുകിയിരുന്നത്.

തമിഴ്‌നാട്ടിലേക്ക് സെക്കന്‍ഡില്‍ 105 ഘന അടി വെള്ളം കൊണ്ടുപോകുന്നുണ്ട്. ജലനിരപ്പ് 124 പിന്നിടുമ്പോള്‍ റിസര്‍വോയറിന്‍റെ വ്യാപ്തി വര്‍ധിക്കുന്നതിനാല്‍ ജധനിരപ്പ് ഉയരുന്നതില്‍ താമസം ഉണ്ടാകും. താമസിയാതെ ന്യൂന മര്‍ദം രണ്ടാമതും പ്രതീക്ഷിക്കുന്നതിനാല്‍ അനുവദനീയ സംഭരണ ശേഷിയായ 142 ലെത്താന്‍ വൈകില്ലെന്നാണ് തമിഴ്‌നാടിന്‍റെ കണക്ക് കൂട്ടല്‍.

മഴ ജനുവരി വരെ; ഏപ്രില്‍ ചുട്ടുപൊള്ളും

റെജി ജോസഫ്

കോട്ടയം: അറബിക്കടലില്‍ ചുഴലിക്കാറ്റുകള്‍ പതിവായതോടെ ജനുവരി വരെ മഴ തുടരാമെന്ന് കാലാവസ്ഥാ നിരീക്ഷണകേന്ദ്രം. ഏറെ ജില്ലകളിലും മഞ്ഞുകാലം ഇല്ലാതായെന്നു മാത്രമല്ല നവംബര്‍ ഡിസംബര്‍ മാസങ്ങള്‍ മഴക്കാലം ഏറ്റെടുത്തു.

കഴിഞ്ഞ മൂന്നു വര്‍ഷമായി ഒന്‍പതു മാസവും മഴ പെയ്യുന്ന സംസ്ഥാനമായി കേരളം കേരളം മാറിയതായി സെന്‍റര്‍ ഫോര്‍ സയന്‍സ് ആന്‍ഡ് എന്‍വയണ്‍മെന്‍റിന്‍റെ റിപ്പോര്‍ട്ട് വ്യക്തമാക്കുന്നു. അടുത്ത ഫെബ്രുവരി മുതല്‍ ഏപ്രില്‍ വരെ മുന്‍വര്‍ഷത്തെക്കാള്‍ കഠിനമായ ചൂടില്‍ കേരളം പൊള്ളുമെന്നാണ് മുന്നറിയിപ്പ്.

കഴിഞ്ഞ വര്‍ഷം പാലക്കാട്ടും കോട്ടയത്തും രേഖപ്പെടുത്തിയ 40 ഡിഗ്രിയേക്കാള്‍ ഒരു ഡിഗ്രിവരെ അധികം ചൂട് കേരളത്തിലുണ്ടാകാം. മഴക്കെടുതിയില്‍ ഇക്കൊല്ലം രാജ്യത്ത് ഏറ്റവുമധികം മരണവും ഉരുള്‍പൊട്ടലുമുണ്ടായ സംസ്ഥാനം കേരളമാണ്. ആദ്യ ഒന്‍പതു മാസങ്ങളില്‍ മഴക്കെടുതിയില്‍ സംസ്ഥാനത്ത് മരിച്ചത് 550 പേരാണ്.

അതിതീവ്ര കാലാവസ്ഥാ പ്രത്യാഘാതം ഇനിയങ്ങോട്ട് കേരളത്തില്‍ പതിവു സംഭവമായി മാറും. ആഗോള ശരാശരിയിലും കൂടിയ താപവര്‍ധനയാണ് ഇന്ത്യന്‍ സമുദ്രമേഖലയില്‍ സംഭവിച്ചിരിക്കുന്നത്. ഇത് സമുദ്ര ജല താപനത്തിലും വര്‍ധന സൃഷ്ടിച്ചതിനൊപ്പം ചുഴലിക്കാറ്റും കടലേറ്റവും തീരശോഷണവും വര്‍ധിക്കാനിടയാക്കി.

ഒന്‍പതു ജില്ലകളിലായി കേരളതീരം അതിരിടുന്ന അറബിക്കടലിന്‍റെ ഉപരിതല ഊഷ്മാവ് 28 ഡിഗ്രിയിലെത്തി. കാലവര്‍ഷ സീസണിലും 26 ഡിഗ്രിയാണ് കടല്‍ താപം. അതുകൊണ്ടുതന്നെ കേരളതീരത്ത് കാലം തെറ്റിയ അതി തീവ്ര ചുഴലിക്കാറ്റുകളുടെയും കടല്‍ക്ഷോഭങ്ങളുടെയും എണ്ണത്തില്‍ വര്‍ധനയുണ്ടാകും.

സംസ്ഥാനത്ത് കാറ്റ്, മഴ, മണ്ണിടിച്ചില്‍, പ്രളയം എന്നിവയുടെ എണ്ണം വര്‍ധിക്കുന്നതില്‍ മാത്രമല്ല പെയ്ത്തിന്‍റെ ഘടനയിലും മാറ്റങ്ങളുണ്ടാകുന്നു. കാലാവസ്ഥാ മാറ്റം സംസ്ഥാനത്തിന്‍റെ സാമ്പത്തിക-ഉത്പാദന മേഖലയില്‍ പ്രതിസന്ധിയുണ്ടാക്കും.

രാജ്യാന്തര ചലച്ചിത്രമേളയ്ക്കു തിരിതെളിഞ്ഞു

തിരുവനന്തപുരം: സംസ്ഥാന ചലച്ചിത്ര അക്കാദമി സംഘടിപ്പിക്കുന്ന 29-ാമത് കേരള രാജ്യാന്തര ചലച്ചിത്ര മേളയ്ക്ക് (ഐഎഫ്എഫ്‌കെ) തിരിതെളിഞ്ഞു. തിരുവനന്തപുരം നിശാഗന്ധി ഓഡിറ്റോറിയത്തില്‍ നടന്ന ചടങ്ങില്‍ മുഖ്യമന്ത്രി പിണറായി വിജയന്‍ മേള ഉദ്ഘാടനം ചെയ്തു.

സിനിമാ ആസ്വാദകരുടെയും സിനിമാ രംഗത്തേക്ക് എത്തിപ്പെടാന്‍ ആഗ്രഹിക്കുന്നവരുടെയും സിനിമാ പ്രവര്‍ത്തകരുടെയും സംഗമവേദിയാണ് ചലച്ചിത്ര മേളയെന്നു മുഖ്യമന്ത്രി പറഞ്ഞു. പുതിയ കാലഘട്ടത്തില്‍ സിനിമാ രംഗത്തേക്കു കോര്‍പറേറ്റുകള്‍ കടന്നുവരുന്നുണ്ട്. ഒരു വ്യവസായമെന്ന നിലയില്‍ അതു സ്വാഭാവികമാണ്.

പക്ഷേ, അതിനുമപ്പുറം കോര്‍പറേറ്റ് താത്പര്യങ്ങള്‍ക്കനുസൃതമായ പ്ലാറ്റ്‌ഫോമുകള്‍ സൃഷ്ടിക്കപ്പെടുന്നു. അവര്‍ക്ക് അനുയോജ്യമായ രീതിയില്‍ സിനിമകള്‍ സൃഷ്ടിക്കപ്പെടാന്‍ സമ്മര്‍ദമുണ്ടാകുന്നു. ഇക്കാര്യങ്ങള്‍ ഗൗരവത്തോടെ കാണണമെന്ന് മുഖ്യമന്ത്രി പറഞ്ഞു.

ഹോങ്കോംഗില്‍നിന്നുള്ള സംവിധായിക ആന്‍ ഹുയിക്ക് മുഖ്യമന്ത്രി രാജ്യാന്തര ചലച്ചിത്രമേളയുടെ ഭാഗമായുള്ള ലൈഫ്‌ടൈം അച്ചീവ്‌മെന്‍റ് പുരസ്‌കാരം സമ്മാനിച്ചു. 10 ലക്ഷം രൂപയും ശില്‍പ്പവുമടങ്ങുന്നതാണ് അവാര്‍ഡ്.

ശബാന ആസ്മിയെ പൊന്നാട അണിയിച്ചും പ്രശസ്തിപത്രം നല്‍കിയും ചടങ്ങില്‍ മുഖ്യമന്ത്രി ആദരിച്ചു. ബോളിവുഡിന്‍റെ മുഖ്യധാരയിലും സമാന്തര സിനിമാലോകത്തും നാടകരംഗത്തും ഒരുപോലെ തിളങ്ങി നില്‍ക്കുന്ന ശബാന ആസ്മി അഭിനയജീവിതത്തില്‍ 50 വര്‍ഷം തികയ്ക്കുന്ന വേളയിലാണ് ഐഎഫ്എഫ്‌കെയുടെ ആദരം.

ദിലീപിനെതിരേ മൊഴി നല്‍കിയ സംവിധായകന്‍ ബാലചന്ദ്രകുമാര്‍ അന്തരിച്ചു

ചെങ്ങന്നൂര്‍: സംവിധായകന്‍ പി. ബാലചന്ദ്രകുമാര്‍ (52) അന്തരിച്ചു. ഹൃദയസംബന്ധമായ അസുഖങ്ങളെത്തുടര്‍ന്ന് ഏറെ നാളായി ചികിത്സയില്‍ കഴിയുകയായിരുന്നു. ചെങ്ങന്നൂരിലെ കല്ലിശേരി ഡോ. കെ.എം. ചെറിയാന്‍ ഹോസ്പിറ്റലില്‍ ഇന്നലെ രാവിലെ 5:45 നായിരുന്നു അന്ത്യം. മൃതദേഹം തിരുവനന്തപുരത്തേക്ക് കൊണ്ടുപോകും.

കുറേക്കാലമായി വൃക്ക സംബന്ധമായ രോഗത്തെ തുടര്‍ന്ന് ചികിത്സയിലായിരുന്നു. തുടര്‍ച്ചയായുള്ള ഹൃദയാഘാതവും ബാലചന്ദ്രകുമാറിനെ പിന്തുടര്‍ന്നിരുന്നു. രോഗാവസ്ഥയിലും നടിയെ ആക്രമിച്ച കേസില്‍ വിചാരണയ്ക്കായും തുടര്‍ച്ചയായി ബാലചന്ദ്രകുമാര്‍ കോടതിയില്‍ ഹാജരായിരുന്നു. ഭാര്യ ഷീല, മകന്‍ പങ്ക്ജ് കൃഷ്ണ, സംസ്‌കാരം പിന്നീട്.

നടി ആക്രമിക്കപ്പെട്ട കേസില്‍ ദിലീപിനെതിരേ ബാലചന്ദ്രകുമാര്‍ നടത്തിയ വെളിപ്പെടുത്തലുകള്‍ കേസില്‍ വലിയ വഴിത്തിരിവായിരുന്നു സൃഷ്ടിച്ചത്. തുടരന്വേഷണത്തിലേക്ക് കടന്നതും അദ്ദേഹത്തിന്‍റെ വെളിപ്പെടുത്തലിന്‍റെ പശ്ചാത്തലത്തിലായിരുന്നു.

ബാചലന്ദ്രകുമാറിന്‍റെ വെളിപ്പെടുത്തലിന് പിന്നാലെയാണ് വധഗൂഢാലോചന, തെളിവുനശിപ്പിക്കല്‍ അടക്കമുള്ള കുറ്റങ്ങള്‍ കേസില്‍ ദിലീപിനെതിരേ ചുമത്തിയത്. കേസ് അന്വേഷിച്ച ഉദ്യോഗസ്ഥരെ അപായപ്പെടുത്താനുള്ള ഗൂഢാലോചന നടന്നെന്ന അദ്ദേഹത്തിന്‍റെ വെളിപ്പെടുത്തലും വലിയ ചര്‍ച്ചയായിരന്നു.

മണിയാർ പദ്ധതി കെഎസ്ഇബി ഏറ്റെടുക്കണം: പി.ജെ. ജോസഫ്

കോട്ടയം: പത്തനംതിട്ട മണിയാർ ജലവൈദ്യുത പദ്ധതിയുടെ കരാർ സ്വകാര്യ കമ്പനിക്കു പുതുക്കി നല്കാതെ ഏറ്റെടുക്കാൻ കെഎസ്ഇബി തയാറാകണമെന്നു കേരളാ കോൺഗ്രസ് ചെയർമാൻ പി.ജെ. ജോസഫ്. കാർബൊറണ്ടം യൂണിവേഴ്സൽ കമ്പനിയുമായുള്ള കെഎസ്ഇബിയുടെ കരാർ ഈ മാസം അവസാനിക്കുകയാണ്.

പദ്ധതിയുടെ ഉപകരണങ്ങളും കെട്ടിടങ്ങളും വൈദ്യുതീകരണ സംവിധാനങ്ങളും ഉൾപ്പെടെ ഭൂമി പൂർണമായും കെഎസ്ഇബിക്കു കൈമാറേണ്ടതുണ്ട്. പദ്ധതി ഏറ്റെടുക്കാൻ കെഎസ്ഇബിയും സംസ്ഥാന സർക്കാരും തയാറാകണമെന്ന് ജോസഫ് ആവശ്യപ്പെട്ടു.

ജി.കെ. പിള്ള ഫൗണ്ടേഷൻ അവാർഡ് ശ്രീനിവാസന്

തിരുവനന്തപുരം: മലയാള സിനിമയ്ക്കു നൽകിയ സമഗ്ര സംഭാവനയ്ക്കുള്ള 2024 ലെ ജി.കെ. പിള്ള ഫൗണ്ടഷൻ അവാർഡ് നടൻ ശ്രീനിവാസന്. മികച്ച ചിത്രത്തിനുള്ള അവാർഡിന് വർഷങ്ങൾക്കു ശേഷം എന്ന സിനിമ നേടി.

സൈജു കുറുപ്പാണ് മികച്ച നടൻ (ഭരതനാട്യം), നടി- ചിന്നു ചാന്ദ്നി (വിശേഷം), സംവിധായകൻ- ജിതിൻലാൽ(എആർഎം), തിരക്കഥ- വിനീത് ശ്രീനിവാസൻ (വർഷങ്ങൾക്കു ശേഷം), ഗാനരചന, സംഗീത സംവിധായകൻ, ഗായകൻ എന്നീ പുരസ്കാരങ്ങൾ അമൃത് രാംനാഥ് നേടിയതായി ജൂറി ചെയർമാൻ ബാലു കിരിയത്ത്, അംഗങ്ങളായ ഗിരിജ സേതുനാഥ്, അനിൽകുമാർ എന്നിവർ അറിയിച്ചു.

സംസ്ഥാന പോലീസ് മേധാവി: 25 വർഷം സർവീസുള്ള മുഴുവൻ പേരുടെയും പട്ടിക കേന്ദ്രത്തിനു നൽകും

തിരുവനന്തപുരം: സംസ്ഥാന പോലീസ് മേധാവി സ്ഥാനത്തേക്ക് പരിഗണിക്കാൻ സാധ്യതയുള്ള മുഴുവൻ പേരുടെ പട്ടികയും കേന്ദ്ര സർക്കാരിനു കൈമാറും. ഡിജിപി തസ്തികയിലുള്ളവരാണ് സംസ്ഥാന പോലീസ് മേധാവി സ്ഥാനത്തേക്ക് എത്തുന്നത്.

എന്നാൽ, എഡിജിപി തസ്തികയിലുള്ള 25 വർഷം സർവീസുള്ള എല്ലാ ഐപിഎസുകാരുടെയും പട്ടിക സീനിയോരിറ്റി അടിസ്ഥാനത്തിലാക്കി കേന്ദ്രത്തിന് കൈമാറും. ജൂണ്‍ 30നു നിലവിലെ സംസ്ഥാന പോലീസ് മേധാവി ഷെയ്ക്ക് ദർബേഷ് സാഹിബിന്‍റെ കാലാവധി കഴിയുന്നതോടെയാണ് പുതിയ നിയമനം നടത്തുക.

ഇതിനു മുന്നോടിയായി 25 വർഷം സർവീസ് പൂർത്തിയാക്കിയ മുഴുവൻ പേരുടെയും പട്ടിക കേന്ദ്രത്തിനു നൽകും.

1990 ബാച്ചിലെ നിതിൻ അഗർവാൾ മുതൽ 1999 ബാച്ചിലെ പി.വിജയൻ വരെയുള്ളവർ പട്ടികയിലുണ്ടാകുമെന്നാണു വിവരം.

നാടകശില്പശാല

തൃശൂർ: സ്കൂൾ ഓഫ് ഡ്രാമയുടെ ആഭിമുഖ്യത്തിൽ കേരള സംഗീതനാടക അക്കാദമിയുമായി സഹകരിച്ച് 20 മുതൽ 24 വരെ നാടക ശില്പശാല സംഘടിപ്പിക്കുന്നു. രാവിലെ 7.30 മുതൽ വൈകുന്നേരം ആറുവരെയാണു ശില്പശാല.

അഭിനയം, രംഗവിതാനം, സംവിധാനം, അവതരണശാസ്ത്രം തുടങ്ങിയവയിലാണ് പരിശീലനം നൽകുക. പങ്കെടുക്കുന്നതിനു schoolofdrama@uoc.ac.in എന്ന ഇ മെയിലിൽ രജിസ്റ്റർ ചെയ്യണം.

മുനന്പത്തെ ഭൂമി വഖഫല്ലെന്ന് ഭൂസംരക്ഷണസമിതി

മുനന്പം: വഖഫ് അവകാശവാദം ഉയർന്ന മുനന്പത്തെ ഭൂമി വഖഫല്ലെന്നു തെളിയിക്കുന്ന രേഖകൾ, സർക്കാർ നിയമിച്ച ജുഡീഷൽ കമ്മീഷനു കൈമാറിയെന്ന് ഭൂസംരക്ഷണ സമിതി നേതാക്കൾ അറിയിച്ചു.

മുനമ്പം തീരപ്രദേശത്തെ ജനങ്ങൾ വാങ്ങിയ ഭൂമി മുഹമ്മദ് സിദ്ദിഖ് സേട്ട് ഫറൂഖ് കോളജിന് ഗിഫ്റ്റായി കൊടുത്തതാണെന്നു തെളിയിക്കുന്ന, ഹൈക്കോടതി ഡിവിഷൻ ബെഞ്ചിന്‍റെ 1975 ലെ വിധിപ്പകർപ്പ് ഉൾപ്പെടെയുള്ള രേഖകളാണു കൈമാറിയത്.

ഹൈക്കോടതി വിധിയിൽ വഖഫ് എന്ന വാക്ക് ഒരിടത്തും പരാമർശിച്ചിട്ടില്ലെന്ന് സമിതി നേതാക്കൾ ചൂണ്ടിക്കാട്ടി. ജുഡീഷൽ കമ്മീഷൻ അധ്യക്ഷൻ ജസ്റ്റീസ് സി.എൻ. രാമചന്ദ്രൻനായരുമായി സമിതി നേതാക്കൾ ആശയവിനിമയം നടത്തി.

ഭൂസംരക്ഷണ സമിതി രക്ഷാധികാരി ഫാ. ആന്‍റണി സേവ്യർ തറയിൽ, കൺവീനർ ജോസഫ് ബെന്നി കുറുപ്പശേരി, എസ്എൻഡിപി മുനമ്പം ശാഖാ പ്രസിഡന്‍റ് കെ.എൻ. മുരുകൻ, മുനന്പം വിസിറ്റേഷൻ കോൺവന്‍റ് സുപ്പീരിയർ സിസ്റ്റർ മെറ്റിൽഡ, സെബാസ്റ്റ്യൻ ജോസഫ് തയ്യിൽ, ഫെബി ഔസോ ഒളാട്ടുപുറം എന്നിവർ സംഘത്തിലുണ്ടായിരുന്നു. മുനന്പത്തെ ഭൂമിയുടെ റവന്യു അവകാശങ്ങൾ‌ക്കായി ഭൂസംരക്ഷണ സമിതിയുടെ നേതൃത്വത്തിലുള്ള റിലേ നിരാഹാരസമരം 60 ദിവസം പിന്നിട്ടു.

റിപ്പോർ‌ട്ട് സമയബന്ധിതമായി നൽകും: കമ്മീഷൻ

മുനന്പത്തെ വഖഫ് വിഷയം സംബന്ധിച്ചുള്ള ജുഡീഷൽ കമ്മീഷന്‍റെ അന്വേഷണ‌വും നടപടിക്രമങ്ങളും സമയബന്ധിതമായി പൂർത്തിയാക്കി സർക്കാരിന് റിപ്പോർട്ട് സമർപ്പിക്കുമെന്ന് ജസ്റ്റീസ് സി.എൻ. രാമചന്ദ്രൻ നായർ. മുനമ്പം തീരപ്രദേശം ഉടനടി സന്ദർശിക്കുമെന്നും സ്ഥലവാസികളുമായി കൂടിക്കാഴ്ച നടത്തുമെന്നും അദ്ദേഹം അറിയിച്ചു.

തദേശ ഉപതെരഞ്ഞെടുപ്പിൽ യുഡിഎഫ് വലിയ വിജയം നേടിയെന്നതു തെറ്റായ വാർത്ത: എം.വി. ഗോവിന്ദൻ

തിരുവനന്തപുരം: തദേശസ്വയംഭരണ സ്ഥാപനങ്ങളിലേക്കുള്ള ഉപതെരഞ്ഞെടുപ്പിൽ യുഡിഎഫ് വലിയ വിജയം നേടിയെന്നതു തെറ്റായ വാർത്തയാണെന്നു സിപിഎം സംസ്ഥാന സെക്രട്ടറി എം.വി.ഗോവിന്ദൻ.

തെരഞ്ഞെടുപ്പിൽ ഇടതുമുന്നണിക്കു വലിയ പരാജയം എന്നാണു മാധ്യമങ്ങൾ പ്രചരിപ്പിക്കുന്നത്. ഇതു തെറ്റാണ്. യുഡിഎഫിന് 17 സീറ്റും എൽഡിഎഫിനു 11 സീറ്റും ബിജെപിക്കു മൂന്നു സീറ്റുമാണു ലഭിച്ചത്. അതിൽ മൂന്ന് സീറ്റ് യുഡിഎഫ് അംഗങ്ങൾ മാറിയതിന്‍റെ ഫലമായി ഉപതെരഞ്ഞെടുപ്പു നടന്നതാണ്.

ആ മൂന്നു സീറ്റ് അവർ തിരിച്ചുപിടിച്ചു. അതും എൽഡിഎഫ് അക്കൗണ്ടിൽ കൂട്ടി. അങ്ങനെയാണു തെരഞ്ഞെടുപ്പു ഫലം പർവതീകരിച്ചു കാണിച്ചതെന്നും എം.വി.ഗോവിന്ദൻ പറഞ്ഞു.

സിസിആർസി: ഗവേണിംഗ് ബോഡിയിലേക്ക്‌ രണ്ട് ശാസ്ത്രജ്ഞർ നിയമിതരായി

കൊച്ചി: കൊച്ചി കാൻസർ റിസർച്ച്‌ സെന്‍റർ (സിസിആർസി) സൊസൈറ്റി ഗവേണിംഗ് ബോഡിയിലേക്ക്‌ ഡോ. എം.വി. പിള്ള, പ്രഫ. ചന്ദ്രഭാസ് നാരായണ എന്നിവരെ സർക്കാർ നിയമിച്ചു.

മെഡിക്കൽ സയന്‍റിസ്റ്റ്, സയന്‍റിസ്റ്റ് എന്നീ വിഭാഗങ്ങളിലാണു നിയമനം. ഡോ. എം.വി. പിള്ള യുഎസിലെ തോമസ് ജെഫേഴ്സൺ സർവകലാശാലയിൽ കൺസൾട്ടന്‍റായും സ്തനാർബുദത്തെക്കുറിച്ചുള്ള ലോകാരോഗ്യസംഘടനാ വിദഗ്ധനായും പ്രവർത്തിക്കുന്നു.

തിരുവനന്തപുരം രാജീവ് ഗാന്ധി സെന്‍റർ ഫോർ ബയോടെക്‌നോളജിയുടെ ഡയറക്ടറായി പ്രവർത്തിക്കുന്ന ഡോ. ചന്ദ്രഭാസ് നാരായണ കാൽ നൂറ്റാണ്ടായി അർബുദ ജനിതകശാസ്ത്ര വിദഗ്ധനാണ്.

ലോക റോബോട്ട് ഒളിമ്പ്യാഡ് : ചരിത്രം സൃഷ്ടിച്ച് കേരള സ്റ്റാര്‍ട്ടപ് യുണീക്ക് വേള്‍ഡ് റോബോട്ടിക്‌സ്

തിരുവനന്തപുരം: തുര്‍ക്കിയില്‍ നടന്ന വേള്‍ഡ് റോബോട്ട് ഒളിമ്പ്യാഡില്‍ (ഡബ്ല്യുആര്‍ഒ-2024) ചരിത്രം സൃഷ്ടിച്ച് എഐ, റോബോട്ടിക്സ്, സ്‌റ്റെം എജ്യുക്കേഷന്‍ എന്നിവയിലെ മുന്‍നിരക്കാരായ യുണീക്ക് വേള്‍ഡ് റോബോട്ടിക്സ് (യുഡബ്ല്യുആര്‍) ഫ്യൂച്ചര്‍ ഇന്നൊവേറ്റേഴ്‌സ് എലിമെന്‍ററി വിഭാഗത്തിലാണ് ടീം വിജയം നേടിയത്.

ഒളിമ്പ്യാഡിന്‍റെ രണ്ട് പതിറ്റാണ്ടിന്‍റെ ചരിത്രത്തില്‍ ആദ്യമായാണ് കേരളത്തില്‍ നിന്ന് ഒരു ടീം ഇന്‍റര്‍നാഷണല്‍ വിഭാഗത്തില്‍ എത്തുന്നതും വിജയിക്കുന്നതും.

മത്സരത്തില്‍ യുഡബ്ല്യുആറിന്‍റെ ടീമായ റെസ്‌ക്യൂ ടെക് അലൈസ് മൂന്നാം സ്ഥാനമാണ് നേടിയത്. 85 രാജ്യങ്ങളില്‍ നിന്നുള്ള 450-ലധികം ടീമുകളുമായി മത്സരിച്ചാണ് ഈ നേട്ടം.

മാളയിലെ ഹോളി ഗ്രേസ് അക്കാദമിയില്‍ നിന്നുള്ള കാത്‌‌ലിന്‍ മേരി ജീസന്‍ (12), ക്ലെയര്‍ റോസ് ജീസന്‍ (9) സഖ്യമാണ് ആഗോള വേദിയില്‍ യുഡബ്ല്യുആറിനെ പ്രതിനിധീകരിച്ചത്. ഇരുവരും സഹോദരിമാരാണ്. ഇന്ത്യയെ പ്രതിനിധീകരിച്ച് ഈ വര്‍ഷം മത്സരവേദിയിലെത്തിയ ഏക ടീമും യുഡബ്ല്യുആറിന്‍റെത് ആയിരുന്നു.

ധനകാര്യ വകുപ്പിൽ 15 താത്കാലിക ഒഴിവുകൾ; ഇന്‍റർവ്യൂ ബോർഡിലെ 12 പേരും ഇടത് അനുകൂലികൾ

തിരുവനന്തപുരം: ധനകാര്യ വകുപ്പിൽ ഓഫീസ് അറ്റൻഡന്‍റ് (ലാസ്റ്റ് ഗ്രേഡ്) തസ്തികയിലെ 15 ഒഴിവുകളിലേക്കു താത്കാലിക നിയമനം നടത്തുന്നു.

തിരുവനന്തപുരം ജില്ലാ എംപ്ലോയ്മെന്‍റ് എക്സ്ചേഞ്ച് വഴി താത്കാലിക നിയമനം നടത്താനാണ് തീരുമാനം. ഇന്‍റർവ്യു ബോർഡിലേക്ക് തെരഞ്ഞെടുത്ത 12 ഉദ്യോഗസ്ഥരും ഭരണാനുകൂല സർവീസ് സംഘടനയിൽ പെട്ടവരാണെന്ന ആരോപണം ഉയർന്നതോടെ നിയമനവും വിവാദത്തിലാകും.

തിരുവനന്തപുരം ജില്ലാ എംപ്ലോയ്മെന്‍റ് ഓഫീസർ നൽകുന്ന പട്ടികയിൽ നിന്നാണ് ഇന്‍റർവ്യൂ നടത്തുക. സിപിഎം പാർട്ടി ഓഫീസിൽ നിന്നു നൽകുന്ന പട്ടികയുടെ അടിസ്ഥാനത്തിൽ പിൻവാതിൽ നിയമനം നൽകുന്നതിനാണ് ഇടതുപക്ഷ സർവീസ് സംഘടനയുമായി ആഭിമുഖ്യം പുലർത്തുന്ന ഉദ്യോഗസ്ഥരെ ഇന്‍റവ്യു ബോർഡിൽ നിയമിച്ചതെന്നാണ് ആരോപണം.

ഓഫീസ് അറ്റൻഡന്‍റുമാരെ തെരഞ്ഞെടുക്കുന്നതിനുള്ള അഭിമുഖം 16 മുതൽ 20 വരെ സെക്രട്ടേറിയറ്റിലെ ദർബാർ ഹാളിൽ നടത്താനാണു തീരുമാനം. രാവിലെ 10.15 മുതൽ ഉച്ചകഴിഞ്ഞു രണ്ടു വരെ അഭിമുഖം നടത്താനാണു തീരുമാനം. ഇതിനായാണ് 12 അംഗ ഇന്‍റർവ്യു ബോർഡ് രൂപീകരിച്ചു.

ലത്തീൻ കത്തോലിക്ക സന്പൂർണ നേതൃ സമ്മേളനം നാളെ

തിരുവനന്തപുരം: ലത്തീൻ കത്തോലിക്കാ സംസ്ഥാനതല ദിനാചരണവും സന്പൂർണ നേതൃ സമ്മേളനവും നാളെ തിരുവനന്തപുരത്തു നടക്കും.

സഭയുടെ നയരൂപീകരണ സമിതിയായ കെആർഎൽസിസിയുടെ നേതൃത്വത്തിൽ നാളെ രാവിലെ 9.30നു വെള്ളയന്പലം ടിഎസ്എസ് ഹാളിൽ നടക്കുന്ന സെമിനാറിൽ 12 രൂപതകളിൽ നിന്നുള്ള പ്രതിനിധികൾ പങ്കെടുക്കുമെന്നു തിരുവനന്തപുരം ലത്തീൻ അതിരൂപത അൽമായ ശുശ്രൂഷ ഡയറക്ടർ ഫാ. മൈക്കിൾ തോമസ് അറിയിച്ചു.

ഉച്ചയ്ക്ക് 1.45ന് സമുദായ സംഘടനയായ കെഎൽസിഎയുടെ സന്പൂർണ സമ്മേളനത്തോട് അനുബന്ധിച്ചുള്ള പതാക പ്രയാണം പാളയം രക്തസാക്ഷി മണ്ഡപത്തിൽ നിന്ന് ആരംഭിക്കും.

2.30ന് സെന്‍റ് ജോസഫ് സ്കൂൾ സമ്മേളന നഗരിയിൽ സമാപിക്കും. സെന്‍റ് ജോസഫ് സ്കൂൾ ഓപ്പണ്‍ എയർ ഓഡിറ്റോറിയത്തിൽ നടക്കുന്ന സന്പൂർണ നേതൃ സമ്മേളനം കെആർഎൽസിസി പ്രസിഡന്‍റ് ബിഷപ് ഡോ. വർഗീസ് ചക്കാലയ്ക്കൽ ഉദ്ഘാടനം ചെയ്യും. കെഎൽസിഎ സംസ്ഥാന പ്രസിഡന്‍റ് അഡ്വ. ഷെറി ജെ. തോമസ് അധ്യക്ഷത വഹിക്കും. തിരുവനന്തപുരം അതിരൂപത ആർച്ച് ബിഷപ് ഡോ. തോമസ് ജെ. നെറ്റോ അനുഗ്രഹ പ്രഭാഷ�