കടുവാ സാന്നിധ്യം സംശയിക്കുന്ന സ്ഥലങ്ങളില്‍ ഇന്നും പരിശോധന: മന്ത്രി ശശീന്ദ്രന്‍
Tuesday, January 28, 2025 3:14 AM IST
കോഴിക്കോട്: പഞ്ചാരക്കൊല്ലിയില്‍ ഭീതി വിതച്ച കടുവയെ ചത്ത നിലയില്‍ കണ്ടെത്തിയെങ്കിലും കടുവാ സാന്നിധ്യം സംശയിക്കുന്ന വയനാട്ടിലെ മറ്റു സ്ഥലങ്ങളില്‍ വനം വകുപ്പ് പ്രത്യേകസംഘം പരിശോധന തുടരുമെന്ന് മന്ത്രി എ.കെ. ശശീന്ദ്രന്‍. പരിശോധന ഇന്നുകൂടി നടക്കുമെന്ന് മന്ത്രി അറിയിച്ചു.
കടുവാ സാന്നിധ്യം സംശയിക്കുന്ന മറ്റ് സ്ഥലങ്ങളിലും തെരച്ചില്‍ തുടരാനുള്ള പദ്ധതി തയാറാക്കാനും ക്രമീകരണങ്ങള്‍ ഏര്‍പ്പെടുത്താനും ചീഫ് വൈല്‍ഡ്‌ ലൈഫ് വാര്‍ഡനും വയനാട് കളക്ടര്‍ക്കും നിര്‍ദശം നല്‍കിയതായി മന്ത്രി അറിയിച്ചു.
പഞ്ചാരക്കൊല്ലിയില്‍ സംഭവിച്ചതു പോലെയുള്ള വിഷയങ്ങളില്‍ പെട്ടെന്ന് നൂറു ശതമാനം പരിഹാരം പ്രതീക്ഷിക്കരുത്. വനം വകുപ്പ് ഉദ്യോഗസ്ഥര്ക്ക് ജാഗ്രതക്കുറവ് ഉണ്ടായാല്‍ അത് ചൂണ്ടിക്കാണിക്കപ്പെടുകയും ഭരണകൂടം തിരുത്തല്‍ നടത്തുകയും ചെയ്യും.
ഇത്തരം സംഭവങ്ങള്‍ ആവര്‍ത്തിച്ചാല്‍ ജനപ്രതിനിധികളും ഉദ്യോഗസ്ഥരും തമ്മില്‍ ആശയവിനിമയം നടത്തി ജനങ്ങള്‍ക്ക് സമാധാനം ഉറപ്പുവരുത്തുന്ന നടപടികളാണ് കൈക്കൊള്ളുകയെന്നും മന്ത്രി പറഞ്ഞു.