ചാലിയാറില്‍നിന്ന് രണ്ടു ശരീരഭാഗങ്ങള്‍ ലഭിച്ചു
Wednesday, August 7, 2024 2:23 AM IST
എടക്കര: വയനാട് ഉരുള്‍പൊട്ടലുമായി ബന്ധപ്പെട്ട് ചാലിയാര്‍ പുഴയില്‍ നടത്തിയ തെരച്ചിലില്‍ ഇന്നലെ ലഭിച്ചതു രണ്ട് ശരീരഭാഗങ്ങള്‍. മുണ്ടേരി കുമ്പളപ്പാറ ഭാഗത്തുനിന്നാണ് അവശിഷ്ടങ്ങള്‍ ലഭിച്ചത്.
ഇതോടെ മലപ്പുറം ജില്ലയില്‍നിന്ന് ആകെ ലഭിച്ച മൃതദേഹങ്ങള്‍ 76ഉം ശരീരഭാഗങ്ങള്‍ 161ഉം ആയി. ആകെ 237 എണ്ണം. 38 പുരുഷന്‍മാരുടെയും 31 സ്ത്രീകളുടെയും മൂന്ന് ആണ്‍കുട്ടികളുടെയും നാലു പെണ്‍കുട്ടികളുടെയും മൃതദേഹങ്ങളാണു ലഭിച്ചത്.
ഇതുവരെ ലഭിച്ച മുഴുവന്‍ മൃതദേഹങ്ങളുടെയും അവശിഷ്ടങ്ങളുടെയും പോസ്റ്റ്മോര്‍ട്ടം പൂര്‍ത്തിയായി. 223 എണ്ണം വയനാട്ടിലേക്ക് കൊണ്ടുപോകുകയും മൂന്നെണ്ണം ബന്ധുക്കള്‍ ഏറ്റെടുക്കുകയും ചെയ്തു. ഏഴ് ശരീര ഭാഗങ്ങള്‍ പൂര്‍ണമായി ഡിഎന്‍എ പരിശോധനയ്ക്ക് അയച്ചിട്ടുണ്ട്. നിലമ്പൂര്‍ ജില്ലാ ആശുപത്രിയില്‍ സൂക്ഷിച്ചിട്ടുള്ള നാല് ശരീരഭാഗങ്ങള്‍ ഉടന്‍ വയനാട്ടിലേക്കു കൊണ്ടുപോകും.
അതേസമയം സംയുക്തസേന നടത്തിയ പരിശോധനയില്‍ ഒരു മൃതദേഹം ഒഴുക്കില്‍പ്പെട്ട കുരങ്ങന്‍റെതാണെന്നു സ്ഥരീകരിച്ചു. ഇത് വനത്തില്‍ മറവ് ചെയ്തു. ഡ്രോണ് ഉപയോഗിച്ചുള്ള പരിശോധനയൊഴിച്ചാല്‍ ചാലിയാറില്‍ ഇന്നലെ കാര്യമായ തെരച്ചില്‍ നടത്തിയില്ല.
വയനാട്ടുനിന്നുള്ള രക്ഷാപ്രവര്‍ത്തകര്‍ ഇന്നലെ സൂചിപ്പാറ വനമേഖലയില്‍ ഹെലികോപ്റ്ററില്‍ തെരച്ചില്‍ നടത്തിയിരുന്നു. പോലീസ്, വനം, ഫയര്‍ ഫോഴ്സ്, തണ്ടര്‍ബോള്‍ട്ട് സേനകളുടെ നേതൃത്വത്തിലുള്ള അറുനൂറ് അംഗ രക്ഷാപ്രവര്‍ത്തകര്‍ ഇന്ന് ചാലിയാറിന്‍റെ വനമേഖലയില്‍ തെരച്ചില്‍ നടത്തും.