തെരച്ചിലിന് 40 സംഘങ്ങൾ
Saturday, August 3, 2024 2:03 AM IST
കൽപ്പറ്റ: മുണ്ടക്കൈ-ചൂരൽമല മേഖലയിൽ ഇന്നലെ മുതൽ 40 സംഘങ്ങളാണ് തെരച്ചിൽ നടത്തുന്നത്. ഉരുൾപൊട്ടിയ മേഖലയെ ആറ് സോണുകളായി തിരിച്ചാണ് തെരച്ചിൽ ആരംഭിച്ചത്. വ്യാഴാഴ്ച നടന്ന മന്ത്രിസഭാ ഉപസമിതി തീരുമാനം അനുസരിച്ചാണിത്.
അട്ടമലയും ആറന്മലയും ചേർന്നതാണ് ആദ്യസോണ്. മുണ്ടക്കൈ, പുഞ്ചിരിമട്ടം, വെള്ളാർമല വില്ലേജ് റോഡ്, ജിവിഎച്ച്എസ്എസ് വെള്ളാർമല, പുഴയുടെ അടിവാരം എന്നിവയാണ് മറ്റു സോണുകൾ. പട്ടാളം, എൻഡിആർഎഫ്, ഡിഎസ്ജി, കോസ്റ്റ് ഗാർഡ്, നേവി, എംഇജി ഉൾപ്പെടെയുള്ള സംയുക്ത സംഘമാണ് തെരച്ചിൽ നടത്തുന്നത്. ഓരോ ടീമിലും മൂന്നു നാട്ടുകാരും ഒരു വനം വകുപ്പ് ജീവനക്കാരനുമുണ്ട്.
ചാലിയാറിലും മൂന്നു സംഘങ്ങൾ
ഇതിനു പുറമേ ഇന്നലെ ചാലിയാർ കേന്ദ്രീകരിച്ചും ഒരേസമയം മൂന്നു രീതിയിൽ തെരച്ചിൽ ആരംഭിച്ചു. 40 കിലോമീറ്ററിൽ ചാലിയാറിന്‍റെ പരിധിയിൽ വരുന്ന എട്ട് പോലീസ് സ്റ്റേഷന്‍റെ പുഴ ഭാഗങ്ങളിൽ പോലീസും നീന്തൽ വിദഗ്ധരായ നാട്ടുകാരും ചേർന്നാണ് തെരച്ചിൽ നടത്തിയത്.
ഹെലികോപ്റ്റർ ഉപയോഗിച്ച് പോലീസ് സമാന്തരമായി തെരഞ്ഞു. ഇതോടൊപ്പം കോസ്റ്റ്ഗാർഡും നേവിയും വനംവകുപ്പും ചേർന്ന് പുഴയുടെ അരികുകളും മൃതദേഹങ്ങൾ തങ്ങാൻ സാധ്യതയുള്ള ഇടങ്ങൾ കേന്ദ്രീകരിച്ചും തെരച്ചിൽ നടത്തി. 25 ആംബുലൻസ് ആണ് ബെയ്‌ലി പാലം കടന്നു മുണ്ടക്കൈയിലേക്ക് ഒരു ദിവസം കടത്തിവിടുക.
25 ആംബുലൻസുകളാണ് മേപ്പാടി പോളിടെക്നിക് കാന്പസിൽ പാർക്ക് ചെയ്യും. ഓരോ ആംബുലൻസിനും ജില്ലാ കളക്ടർ പ്രത്യേക പാസ് നൽകും. മൃതദേഹങ്ങൾ കണ്ടെത്താനായി ഡൽഹിയിൽനിന്നു ഡ്രോണ് ബേസ്ഡ് റഡാർ ഇന്നെത്തും. നിലവിൽ ആറ് നായ്ക്കളാണ് തെരച്ചിലിൽ സഹായിക്കുന്നത്. തമിഴ്നാട്ടിൽനിന്നു നാലു കഡാവർ നായ്കൾ കൂടി പുറപ്പെട്ടിട്ടുണ്ട്.
കഡാവര്‍ നായ എത്തി
എടക്കര (മലപ്പുറം): മുണ്ടക്കൈ ഉരുള്‍പൊട്ടലില്‍ ചാലിയാറിലൂടെ ഒഴുകിയെത്തി മണ്ണിനടിയില്‍ പുതഞ്ഞ മൃതദേഹങ്ങള്‍ കണ്ടെത്താന്‍ കഡാവര്‍ നായയും. ഇടുക്കിയില്‍നിന്നാണ് എയ്ഞ്ചല്‍ എന്ന കഡാവര്‍ നായയെ ഇന്നലെ ഇരുട്ടുകുത്തിയിലെത്തിച്ചത്.
മണ്ണിനടിയില്‍ പുതഞ്ഞ മൃതദേഹങ്ങള്‍ മണത്ത് കണ്ടെത്താന്‍ പ്രത്യേക പരിശീലനം നേടിയ കേരളത്തിലെ നായ്ക്കളിലൊന്നാണ് എയ്ഞ്ചല്‍. ഇന്നലെ രാവിലെ ഏഴു മണിയോടെയാണ് എയ്ഞ്ചലുമായി നാലംഗ പോലീസ് സംഘം ഇരുട്ടുകുത്തിയിലെത്തിയത്. തുടര്‍ന്ന് ചാലിയാറിന്‍റെ ഇരുട്ടുകുത്തി മുതല്‍ മാളകം വരെയുള്ള തീരങ്ങളില്‍ സംഘം നായയുമായി പരിശോധന നടത്തി. വൈകുന്നേരം വരെ പരിശോധന തുടര്‍ന്നെങ്കിലും ഒന്നും കണ്ടെത്താന്‍ എയ്ഞ്ചലിനായില്ല.
2022ല്‍ തൊടുപുഴ കുടയത്തൂരിലുണ്ടായ ഉരുള്‍പൊട്ടല്‍ ദുരന്തത്തില്‍ മണ്ണിനടിയില്‍പെട്ട രണ്ട് മൃതദേഹങ്ങള്‍ കണ്ടെത്തിയത് എയ്ഞ്ചലായിരുന്നു.
ടിജോ, ടിനു ടിജു, അഖില്‍, പ്രിന്‍സ് എന്നീ സിപിഒമാരടങ്ങിയ സംഘമാണ് എയ്ഞ്ചലുമായെത്തിയത്. കഡാവര്‍ നായ്ക്കള്‍ എല്ലാത്തരം കേസുകളിലും 95 ശതമാനം കൃത്യത നല്‍കുന്നതായി തെളിയിച്ചിട്ടുണ്ട്. വിദേശരാജ്യങ്ങളില്‍ കുറ്റാന്വേഷണരംഗത്ത് അവിഭാജ്യഘടകങ്ങളായി കഡാവര്‍ നായ്ക്കള്‍ മാറിയിട്ടുണ്ട്.