ഒഡെപെക് ജര്‍മന്‍ ഭാഷാ പരീക്ഷാകേന്ദ്രം അങ്കമാലിയില്‍
Tuesday, December 10, 2024 1:30 AM IST
കൊച്ചി: സംസ്ഥാന തൊഴില്‍വകുപ്പിന്‍റെ കീഴിലുള്ള പൊതുമേഖലാ സ്ഥാപനമായ ഓവര്‍സീസ് ഡെവലപ്‌മെന്‍റ് ആന്‍ഡ് എംപ്ലോയ്‌മെന്‍റ് പ്രമോഷന്‍ കണ്‍സള്‍ട്ടന്‍റിന്‍റെ (ഒഡെപെക്) നേതൃത്വത്തില്‍ ആരംഭിക്കുന്ന സര്‍ക്കാര്‍ അധീനതയിലുള്ള ഇന്ത്യയിലെ ഏറ്റവും വലിയ ജര്‍മന്‍ ഭാഷാ പരീക്ഷാകേന്ദ്രം അങ്കമാലിയില്‍ പ്രവര്‍ത്തനമാരംഭിച്ചു.
അങ്കമാലി സൗത്ത് ഇന്‍കെല്‍ ബിസിനസ് പാര്‍ക്കില്‍ നടന്ന സമ്മേളനത്തില്‍ ജര്‍മന്‍ കോണ്‍സല്‍ ജനറല്‍ അഹിം ബുഹാട്ട് ഉദ്ഘാടനം ചെയ്തു.
ഒഡെപെക് ചെയര്‍മാന്‍ അഡ്വ. കെ.പി. അനില്‍കുമാര്‍ അധ്യക്ഷത വഹിച്ചു. ജര്‍മന്‍ ഗവൺമെന്‍റ് ഏജന്‍സി ഡീഫേ എക്‌സിക്യൂട്ടീവ് ഡയറക‌്ട‌ര്‍ തോസ്റ്റന്‍ കീഫെര്‍, ഒഡെപെക് എംഡി കെ.എ. അനൂപ് തുടങ്ങിയവര്‍ പ്രസംഗിച്ചു.
കേരളത്തില്‍നിന്നു ജര്‍മനിയില്‍ ജോലി തേടിപ്പോകുന്നവര്‍ക്ക് ഏറെ ഉപകാരപ്രദമായിരിക്കും അങ്കമാലിയില്‍ പ്രവര്‍ത്തനമാരംഭിച്ച പരീക്ഷാകേന്ദ്രം. ഇവിടെ പ്രവേശനം ലഭിക്കുന്നവര്‍ക്ക് പഠനം, പരീക്ഷാഫീസ്, വീസ, വിമാന യാത്രാച്ചെലവ് എന്നിവ സര്‍ക്കാര്‍ വഹിക്കുമെന്നും അനില്‍കുമാര്‍ പറഞ്ഞു.