സ്മാര്‍ട് സിറ്റി പദ്ധതി അവസാനിപ്പിക്കാനുള്ള തീരുമാനം ദുരൂഹം: പ്രതിപക്ഷ നേതാവ്
Friday, December 6, 2024 2:07 AM IST
തിരുവനന്തപുരം: സ്മാര്‍ട് സിറ്റി പദ്ധതി അവസാനിപ്പിക്കാനുള്ള സര്‍ക്കാര്‍ തീരുമാനം ദുരൂഹമെന്നു പ്രതിപക്ഷ നേതാവ് വി.ഡി. സതീശന്‍. ആരുമായും ചര്‍ച്ച ചെയ്യാതെ സ്മാര്‍ട് സിറ്റി പദ്ധതി അവസാനിപ്പിക്കാന്‍ മന്ത്രിസഭ ചേര്‍ന്നു തീരുമാനിച്ചത് വിചിത്രമായ നടപടിയാണ്. 9000 പേര്‍ക്ക് ജോലി നല്‍കുമെന്ന് ഉറപ്പു നല്‍കിയ ഒരു സംരംഭമാണ് അട്ടിമറിക്കപ്പെടുന്നത്.
ടീ കോമിനു നഷ്ടപരിഹാരം കൊടുക്കുമെന്നു പറഞ്ഞാല്‍ സര്‍ക്കാരിന്‍റെ ഭാഗത്തു നിന്നും വീഴ്ചയുണ്ടായെന്നാണ് അതിന്‍റെ അര്‍ഥം. 2016 ഫെബ്രുവരി 20ന് ഉമ്മന്‍ ചാണ്ടി സര്‍ക്കാരിന്‍റെ കാലത്ത് സ്മാര്‍ട്ട് സിറ്റിയുടെ ഒന്നാം ഘട്ടം ഉദ്ഘാടനം ചെയ്യപ്പെട്ടതാണ്. അഞ്ചു വര്‍ഷം കൊണ്ടാണ് ആറര ലക്ഷം സ്‌ക്വയര്‍ ഫീറ്റ് ഐടി ടവര്‍ നിര്‍മിച്ച് ഉദ്ഘാടനം ചെയ്തത്.
അതിനുശേഷം കഴിഞ്ഞ എട്ടു വര്‍ഷവും സര്‍ക്കാര്‍ അവിടെ എന്താണ് ചെയ്തതെന്ന് അന്വേഷിക്കണം. അവിടെ എന്താണ് നടക്കുന്നതെന്നു മുഖ്യമന്ത്രിയോ വ്യവസായ മന്ത്രിയോ അന്വേഷിച്ചോ എന്നറിയില്ല.
എട്ടു വര്‍ഷത്തിനു ശേഷം ടീകോമിനു നഷ്ടപരിഹാരം നല്‍കാന്‍ സര്‍ക്കാര്‍ തീരുമാനിച്ചതിനു പിന്നില്‍ ദുരൂഹതയുണ്ട്. കോടിക്കണക്കിനു രൂപ വിലയുള്ള 248 ഏക്കര്‍ ഭൂമി സ്വന്തക്കാര്‍ക്കും ഇഷ്ടക്കാര്‍ക്കും നല്‍കാനുള്ള ഗൂഢനീക്കമാണ് സര്‍ക്കാര്‍ തീരുമാനത്തിന് പിന്നില്‍. ഭൂമി കച്ചവടമാണ് സര്‍ക്കാര്‍ ലക്ഷ്യമിടുന്നത്.
എന്തുകൊണ്ടാണ് പദ്ധതി വഴിയില്‍ ഉപേക്ഷിച്ച് പോകുന്നത്? ആരാണ് പെര്‍ഫോം ചെയ്യാത്തത്? പെര്‍ഫോം ചെയ്യാത്തത് ടീം കോം ആണെങ്കില്‍ എന്തിനാണ് അവര്‍ക്ക് നഷ്ടപരിഹാരം നല്‍കുന്നത് തുടങ്ങിയ ചോദ്യങ്ങള്‍ക്ക് ഉത്തരമില്ല. പദ്ധതി എന്തുകൊണ്ടാണ് പരാജയപ്പെട്ടതെന്ന് കേരളത്തിലെ ജനങ്ങളോട് പറയാനുള്ള ഉത്തരവാദിത്വം സര്‍ക്കാരിനുണ്ട്.
മന്ത്രിസഭാ യോഗം ചേര്‍ന്ന് പദ്ധതിയില്‍നിന്നും പിന്‍മാറാനും ടീകോമിന് നഷ്ടപരിഹാരം നല്‍കാനും തീരുമാനിച്ചത് എന്തിന്‍റെ അടിസ്ഥാനത്തിലാണെന്ന് മുഖ്യമന്ത്രി ജനങ്ങളോട് പറയണം. പദ്ധതിയുടെ ഒന്നാം ഘട്ടം ഉദ്ഘാടനം ചെയ്തപ്പോള്‍ അത് ബഹിഷ്‌ക്കരിച്ചവരാണ് എട്ടു വര്‍ഷം കഴിഞ്ഞപ്പോള്‍ പദ്ധതിയില്‍നിന്നും പിന്‍മാറുന്നത്. ഇതിനുപിന്നില്‍ ഗൂഢനീക്കങ്ങളും അഴിമതിയുമുണ്ട്.
2011ല്‍ എഗ്രിമെന്‍റ് വച്ചത് വി.എസ്. അച്യുതാനന്ദന്‍ സര്‍ക്കാരിന്‍റെ കാലത്താണ്. എഗ്രിമെന്‍റ് വച്ചവര്‍ തന്നെയാണ് 13 വര്‍ഷം കഴിഞ്ഞപ്പോള്‍ ടീകോം ഒന്നും ചെയ്തില്ലെന്നു പറയുന്നത്. എട്ടു വര്‍ഷമായി ഇതേക്കുറിച്ച് ആരും ഒന്നും മിണ്ടിയില്ല.
കമ്പനിയില്‍ 16 ശതമാനമാണ് സര്‍ക്കാരിന്‍റെ ഓഹരി. എന്ത് ചര്‍ച്ചയുടെ അടിസ്ഥാനത്തിലാണ് ഇത്രയും വലിയ ഒരു പദ്ധതി അവസാനിപ്പിക്കുന്നതെന്ന് സര്‍ക്കാര്‍ വ്യക്തമാക്കണം. അവസാനിപ്പിക്കുകയാണെന്നു കത്ത് നല്‍കിയ കമ്പനിക്ക് എന്തിനാണ് സര്‍ക്കാര്‍ നഷ്ടപരിഹാരം നല്‍കുന്നത്.
മന്ത്രിസഭാ യോഗത്തില്‍ പദ്ധതി അവസാനിപ്പിക്കാനും കമ്പനിക്ക് നഷ‌്ടപരിഹരം നല്‍കി ഭൂമി ഇഷ്ടക്കാര്‍ക്ക് നല്‍കാനുമുള്ള തീരുമാനം കേരളത്തില്‍ നടക്കില്ലെന്നും സതീശന്‍ പറഞ്ഞു.