കൊച്ചിയിൽ വിമാനങ്ങൾക്ക് വീണ്ടും ബോംബ് ഭീഷണി
Wednesday, October 23, 2024 2:16 AM IST
നെടുമ്പാശേരി: കൊച്ചി രാജ്യാന്തര വിമാനത്താവളത്തിൽനിന്നുള്ള രണ്ടു വിമാനങ്ങൾക്ക് ഇന്നലെ ബോംബ് ഭീഷണി സന്ദേശം എത്തി. ലണ്ടനിലേക്കു പോയ എയർ ഇന്ത്യ, ബംഗളൂരുവിലേക്കു പോയ ഇൻഡിഗോ വിമാനങ്ങൾക്കാണു ട്വിറ്ററിലൂടെ ഭീഷണി സന്ദേശം ലഭിച്ചത്.
ഉച്ചകഴിഞ്ഞ് 3.04നാണ് എഐ 149 നമ്പർ കൊച്ചി - ലണ്ടൻ വിമാനത്തിന് ഭീഷണി സന്ദേശം ലഭിച്ചത്. ഈ വിമാനം 12.06 ന് നെടുമ്പാശേരിയിൽനിന്നും യാത്രയായിരുന്നു. ഇതിനുശേഷം 4.04 ന് 6ഇ 196 നമ്പർ കൊച്ചി - ബംഗളൂരു വിമാനത്തിന് അടുത്ത സന്ദേശം എത്തുകയായിരുന്നു.
ഈ വിമാനം 12.13 ന് പുറപ്പെട്ടിരുന്നു. വൈകുന്നേരം 4.16 ന് സുരക്ഷിതമായി ബംഗളൂരുവിൽ പറന്നിറങ്ങുകയും ചെയ്തു. ഭീഷണി സന്ദേശത്തെത്തുടർന്ന് ബിടിഎസി അടിയന്തര യോഗം ചേർന്നു സന്ദേശം വ്യാജമാണെന്ന് വിലയിരുത്തി. കേസ് രജിസ്റ്റർ ചെയ്ത് അന്വേഷണം ആരംഭിച്ചു.