റഷ്യൻ അന്തർവാഹിനി ‘ഉഫ’ കൊച്ചിയിലെത്തി
Wednesday, October 23, 2024 2:15 AM IST
കൊച്ചി: റഷ്യൻ അന്തർവാഹിനി കപ്പൽ ‘ഉഫ’ കൊച്ചി തീരത്ത് നങ്കൂരമിട്ടു. ഇരുരാജ്യങ്ങളുമായുള്ള സമുദ്ര സഹകരണം ശക്തമാക്കുന്നതിന്‍റെ ഭാഗമായാണു അന്തർവാഹിനി ഇന്ത്യയിലെത്തിയത്.
ഇന്ത്യൻ നാവികസേന അധികൃതർ ‘ഉഫ’യ്ക്കു സ്വീകരണമൊരുക്കി. റഷ്യൻ നാവികസേനയുടെ പസഫിക് കപ്പൽപ്പടയുടെ ഭാഗമാണ് ‘ഉഫ’.
ഡീസൽ-ഇലക്ട്രിക് അന്തർവാഹിനിയായ ഉഫ കൊച്ചിയിലെത്തുമെന്ന് നേരത്തേ റഷ്യൻ എംബസി അറിയിച്ചിരുന്നു. ഇന്ത്യയും റഷ്യയും തമ്മിലുള്ള ആഴമായ സൗഹൃദത്തിന്‍റെ പ്രതീകമാണ് അന്തർവാഹിനി കപ്പൽ ‘ഉഫ’ യുടെ വരവെന്ന് പ്രതിരോധ മന്ത്രാലയം എക്‌സിൽ കുറിച്ചു.