ചങ്ങനാശേരി: ചങ്ങനാശേരി അതിരൂപതയുടെ അഞ്ചാമത് ആര്ച്ച് ബിഷപ്പായി നിയമിതനായ മാര് തോമസ് തറയിലിന്റെ സ്ഥാനാരോഹണം 31ന് ചങ്ങനാശേരി സെന്റ് മേരീസ് മെത്രാപ്പോലീത്തന് പള്ളിയില് നടക്കും. ശുശ്രൂഷാ ചടങ്ങുകള്ക്കായി മെത്രാപ്പോലീത്തന്പള്ളി അങ്കണത്തില് വിശാലമായ പന്തല് പൂര്ത്തിയായി വരുന്നു.
രാവിലെ ഒമ്പതിന് ആരംഭിക്കുന്ന സ്ഥാനാരോഹണ ശുശ്രൂഷയ്ക്ക് സീറോമലബാര് സഭ മേജര് ആര്ച്ച് ബിഷപ് മാര് റാഫേല് തട്ടില് മുഖ്യകാര്മികത്വം വഹിക്കും. ആര്ച്ച് ബിഷപ് മാര് ജോസഫ് പെരുന്തോട്ടം, പാലാ ബിഷപ് മാര് ജോസഫ് കല്ലറങ്ങാട്ട് എന്നിവര് സഹകാര്മികരായിരിക്കും. തുടര്ന്ന് മാര് തോമസ് തറയിലിന്റെ മുഖ്യകാര്മികത്വത്തില് വിശുദ്ധ കുര്ബാന അര്പ്പിക്കും.
11.45ന് നടക്കുന്ന പൊതുസമ്മേളനത്തില് സ്ഥാനമൊഴിയുന്ന ആര്ച്ച്ബിഷപ് മാര് ജോസഫ് പെരുന്തോട്ടത്തിന് നന്ദിയും പുതിയ ആര്ച്ച്ബിഷപ് മാര് തോമസ് തറയിലിന് ആശംസകളും നേരും. സിബിസിഐ പ്രസിഡന്റ് ആര്ച്ച്ബിഷപ് മാര് ആന്ഡ്രൂസ് താഴത്ത് അധ്യക്ഷത വഹിക്കും.
കേന്ദ്രമന്ത്രി ജോര്ജ് കുര്യന് ഉദ്ഘാടനം ചെയ്യും. ആര്ച്ച് ബിഷപ് മാര് ജോര്ജ് കോച്ചേരി ദീപം തെളിക്കും. കര്ദിനാള് മാര് ജോര്ജ് ആലഞ്ചേരി അനുഗ്രഹ പ്രഭാഷണം നടത്തും.
തിരുവനന്തപുരം ആര്ച്ച്ബിഷപ് ഡോ.തോമസ് ജെ.നെറ്റോ, മാവേലിക്കര ബിഷപ് ജോഷ്വാ മാര് ഇഗ്നാത്തിയോസ്, ബസേലിയോസ് മാര്ത്തോമ്മാ മാത്യൂസ് തൃതീയന് കാതോലിക്കാബാവ, തിയോഡേഷ്യസ് മാര്തോമ്മാ മെത്രാപ്പോലീത്ത തുടങ്ങിയവര് സന്ദേശങ്ങള് നല്കും.
പ്രതിപക്ഷ നേതാവ് വി.ഡി. സതീശന്, മന്ത്രിമാരായ റോഷി അഗസ്റ്റിന്, വി.എന്.വാസവന്, ജനപ്രതിനിധികള് തുടങ്ങിയവര് ആശംസകള് അര്പ്പിക്കും.
വത്തിക്കാന് പ്രതിനിധി, യൂറോപ്യന് സഭാപ്രതിനിധികള് ഉള്പ്പെടെ അമ്പതില്പ്പരം മെത്രാന്മാര്, വിവിധ മതസാമുദായിക, രാഷ്ട്രീയ നേതാക്കള് തുടങ്ങിയവര് സ്ഥാനാരോഹണ ശുശ്രൂഷകളിലും സമ്മേളനത്തിലും അതിഥികളാകും.