വയനാട് ഉരുൾപൊട്ടൽ ദുരന്തവുമായി ബന്ധപ്പെട്ട ചർച്ചയും നിയമസഭയിലുണ്ടാകും. ഇത് എന്നു വേണമെന്ന കാര്യത്തിലും കാര്യോപദേശക സമിതിയിലാകും അന്തിമ തീരുമാനമെടുക്കുക. ഉപധനാഭ്യർഥനകൾക്കായും ഒരു ദിവസം മാറ്റിവയ്ക്കേണ്ടിവരും. 16നു നിയമസഭാ സമ്മേളനം അവസാനിപ്പിക്കുന്നതും ആലോചനയിലുണ്ട്.
സഭാതലത്തെ പ്രക്ഷുബ്ധമാക്കാൻ വിവാദ വിഷയങ്ങൾ ഏറെയാണ്. എഡിജിപി എം.ആർ. അജിത്കുമാറിനെതിരായ ഭരണപക്ഷ എംഎൽഎ പി.വി. അൻവറിന്‍റെ വെളിപ്പെടുത്തലുകൾ, ആർഎസ്എസ് ദേശീയ നേതാക്കളുമായുള്ള എഡിജിപിയുടെ കൂടിക്കാഴ്ച, ഭരണമുന്നണിയിൽനിന്നും പാർട്ടിയിൽനിന്നും ആവശ്യമുയർന്നിട്ടും എഡിജിപിയെ ക്രമസമാധാന ചുമതലയിൽനിന്നു മാറ്റാത്തത് അടക്കം വിഷയങ്ങൾ സഭയിൽ പ്രതിപക്ഷം ഉന്നയിക്കും.
അൻവറിന്‍റെ ആരോപണങ്ങൾ അന്വേഷിക്കുന്ന ഡിജിപിയുടെ നേതൃത്വത്തിലുള്ള സമിതിയുടെ റിപ്പോർട്ട് സഭാ സമ്മേളനത്തിനിടെ നൽകിയാൽ അതും സഭയുടെ മേശപ്പുറത്തു വയ്ക്കേണ്ടിവരും.