ഇൻസ്റ്റഗ്രാം വീഡിയോ കണ്ടന്‍റ് ക്രിയേറ്ററും ഡ്രോൺ പൈലറ്റുമായ അർജുൻ പകർത്തിയ വിമാനത്താവളത്തിന്‍റെ ആകാശദൃശ്യങ്ങൾ തന്‍റെ ഇൻസ്റ്റഗ്രാം പേജായ മല്ലു ഡോറയിലൂടെ പ്രചരിപ്പിച്ചത് നെടുമ്പാശേരി പോലീസിന്‍റെ ശ്രദ്ധയിൽപ്പെടുകയായിരുന്നു.
തുടർന്ന് ഡ്രോൺ ഉപയോഗിച്ചു ദൃശ്യങ്ങൾ ചിത്രീകരിക്കാനുള്ള അനുമതി ആർക്കെങ്കിലും നൽകിയിട്ടുണ്ടായിരുന്നോ എന്ന് പോലീസ് എയർപോർട്ട് അധികൃതരോട് അന്വേഷിച്ചു. ഇത്തരത്തിൽ ആർക്കും അനുമതി നൽകിയിട്ടില്ലെന്നായിരുന്നു മറുപടി. ഇതോടെ വീഡിയോ പോസ്റ്റ് ചെയ്ത അർജുനെ കണ്ടെത്തി പോലീസ് സ്റ്റേഷനിലേക്ക് വിളിച്ചുവരുത്തുകയായിരുന്നു.
നേവൽ ബേസ്, ഷിപ്പ് യാർഡ്, കൊച്ചി തുറമുഖം, കണ്ടെയ്നർ ടെർമിനൽ, ഹൈക്കോടതി തുടങ്ങിയ അതീവ സുരക്ഷാ മേഖലകളിൽ അനുമതിയില്ലാതെ വ്ലോഗർമാരും വീഡിയോ ഗ്രാഫർമാരും ഇത്തരത്തിൽ ഡ്രോൺ പറത്തി ദൃശ്യങ്ങൾ ചിത്രീകരിക്കുന്നതുമായി ബന്ധപ്പെട്ട കേസുകൾ സ്ഥിരമായി റിപ്പോർട്ട് ചെയ്യപ്പെടുന്നുണ്ട്.