ഓണ്ലൈന് തട്ടിപ്പ്: സംസ്ഥാനത്ത് നഷ്ടമായത് 617.59 കോടി
Saturday, June 22, 2024 1:53 AM IST
തിരുവനന്തപുരം: കഴിഞ്ഞ ആറുമാസത്തിനുള്ളില് ഓണ്ലൈന് തട്ടിപ്പിലൂടെ സംസ്ഥാനത്ത് 617. 59 കോടി രൂപ നഷ്ടപ്പെട്ടതായി മുഖ്യമന്ത്രി പിണറായി വിജയന്. ചോദ്യോത്തരവേളയിലാണ് ഈ കണക്ക് മുഖ്യമന്ത്രി അറിയിച്ചത്.
2023 ഡിസംബറില് 54 കോടി നഷ്ടപ്പെട്ടപ്പോള് 2024 ജനുവരിയില് 32 കോടിയും ഇത്തരത്തില് നഷ്ടമായി. ഫെബ്രുവരിയില് 126 കോടി രൂപയാണ് ഇത്തരത്തില് തട്ടിപ്പുസംഘം കരസ്ഥമാക്കിയത്. മാര്ച്ചില് 86 കോടിയും ഏപ്രിലില് 136 കോടിയും നഷ്ടമായി.
മേയ് മാസത്തില് അത് 181 കോടിയായി വര്ധിച്ചു. ഓണ്ലൈന് ലോണ് തട്ടിപ്പുകളെ സംബന്ധിച്ച് വിവരം നല്കാന് പോലീസിന്റെ 9497980900 എന്ന വാട്സ് ആപ് നമ്പറും 1930 എന്ന ടോള്ഫ്രീ നമ്പറും ഉപയോഗിക്കണമെന്നും മുഖ്യമന്ത്രി സഭയില് പറഞ്ഞു.