ആരോഗ്യ സർവകലാശാല വൈസ് ചാൻസലറായി ഡോ. മോഹനൻ കുന്നുമ്മലിന് പുനർനിയമനം
Friday, October 25, 2024 1:10 AM IST
തിരുവനന്തപുരം: കേരള ആരോഗ്യ സർവകലാശാല വൈസ് ചാൻസലറായി ഡോ. മോഹനൻ കുന്നുമ്മലിന് പുനർ നിയമനം നൽകി ഗവർണർ.
ആരോഗ്യ സർവകലാശാല വിസിയായുള്ള ഡോ. മോഹനന്റെ കാലാവധി നാളെ പൂർത്തിയാക്കാനിരിക്കേയാണ് പുനർനിയമനം. അഞ്ചു വർഷത്തക്കോ 70 വയസ് പൂർത്തിയാക്കുന്നതു വരെയോ ആണ് വിസി സ്ഥാനത്തു തുടരാൻ കഴിയുക.
കേരള സർവകലാശാല വൈസ് ചാൻസലറുടെ ചുമതലയും ഡോ. മോഹനന് നൽകി. കേരള സർവകലാശാല വിസിയുടെ ചുമതലയിലും ഇദ്ദേഹം രണ്ടു വർഷമായി തുടർന്നുവരികയായിരുന്നു. പുതിയ വിസി വരുന്നതു വരെ കേരളയുടെ ചുമതലയിൽ മോഹനൻ തുടരും.
ആരോഗ്യ സർവകലാശാലയിൽ വൈസ് ചാൻസലറെ തെരഞ്ഞെടുക്കാനുള്ള സേർച്ച് കമ്മിറ്റി രൂപീകരിക്കാനുള്ള തീരുമാനം പിൻവലിച്ചാണ് മോഹനൻ കുന്നുമ്മലിനു പുനർനിയമനം നൽകാൻ ചാൻസലർ കൂടിയായ ഗവർണറുടെ തീരുമാനം.