ആലങ്ങാട് : ശുദ്ധജലവിതരണ കുഴൽ വീണ്ടും പൊട്ടിയതോടെ കുടിവെള്ള വിതരണം മുടങ്ങി.
മുപ്പത്തടം ജലശുദ്ധീകരണശാലയിൽ നിന്നു വെള്ളം പമ്പു ചെയ്യുന്ന കുഴലാണു രണ്ടിടത്തായി പൊട്ടിയത്. ആലുവ പറവൂർ റോഡിൽ കോട്ടപ്പുറത്തിനു സമീപവും ആലങ്ങാട് ബ്ലോക്ക്- മാർക്കറ്റ് റോഡിലുമാണു പൈപ്പ് പൊട്ടിയത്.
ഇതോടെ കോട്ടപ്പുറം, കുന്നുംപുറം, ആലങ്ങാട് മാർക്കറ്റ് പരിസരം തുടങ്ങിയ പ്രദേശങ്ങളിൽ രണ്ടുദിവസം ജലവിതരണം മുടങ്ങും. കഴിഞ്ഞദിവസം മറിയപ്പടിക്കു സമീപം പൈപ്പ് പൊട്ടിയതിനു പിന്നാലെയാണ് ഇവിടെ പൊട്ടിയിരിക്കുന്നത്. അടിക്കടി പൈപ്പ് പൊട്ടി ശുദ്ധജലം മുടങ്ങുന്നതും റോഡ് തകരുന്നതും ജനങ്ങളുടെ പ്രതിഷേധത്തിനിടയാക്കിയിട്ടുണ്ട്.