സമാനതകളില്ലാത്ത ധീരനേതാവ്: മുഖ്യമന്ത്രി
Friday, September 13, 2024 2:27 AM IST
കൊച്ചി: കമ്യൂണിസ്റ്റ് പ്രസ്ഥാനത്തിന്‍റെ സമാനതകളില്ലാത്ത ധീരനേതാവായിരുന്നു സീതാറാം യെച്ചൂരി എന്ന് മുഖ്യമന്ത്രി പിണറായി വിജയന്‍.
അതീവദുഃഖത്തോടെയും ഹൃദയവേദനയോടെയുമാണ് സീതാറാമിന്‍റെ നിര്യാണവാര്‍ത്ത കേള്‍ക്കുന്നത്. വിദ്യാര്‍ഥിപ്രസ്ഥാനത്തില്‍നിന്ന് ഉയര്‍ന്നുവന്ന അദ്ദേഹം ഒമ്പത് വര്‍ഷക്കാലം സിപിഎമ്മിന്‍റെ ജനറല്‍ സെക്രട്ടറിയായി വൈഷമ്യമേറിയ രാഷ്‌ട്രീയഘട്ടങ്ങളിലൂടെ പാര്‍ട്ടിയെ നയിച്ചു.
പാര്‍ട്ടിയുടെ നേതൃപദവികളിലിരുന്ന് കൃത്യമായ നിലപാടുകള്‍ രൂപീകരിച്ചുകൊണ്ട് സിപിഎമ്മിനും ഇടതുപക്ഷത്തിന് പൊതുവിലും ഇന്ത്യന്‍ രാഷ്‌ട്രീയത്തിനാകെത്തന്നെയും മാര്‍ഗനിര്‍ദേശകമാംവിധം സീതാറാം പ്രവര്‍ത്തിച്ചു. രാജ്യവും ജനങ്ങളും ഗുരുതരമായ പ്രതിസന്ധികള്‍ നേരിടുന്ന ഘട്ടത്തില്‍ സീതാറാമിന്‍റെ അഭാവം രാജ്യത്തിനു നികത്താനാകാത്ത നഷ്‌ടമാണെന്നും മുഖ്യമന്ത്രി പറഞ്ഞു.