സിബിഎല്ലില്‍ തുഴയെറിയാൻ ചങ്ങനാശേരി ബോട്ട് ക്ലബ്
1479585
Saturday, November 16, 2024 7:31 AM IST
ചങ്ങനാശേരി: ഇന്നാരംഭിക്കുന്ന ചാമ്പ്യന്‍സ് ബോട്ട് ലീഗ് (സിബിഎല്‍ )മത്സരങ്ങളില്‍ ചങ്ങനാശേരി ബോട്ട് ക്ലബ് വലിയദിവാന്‍ജിയില്‍ തുഴയെറിയും. നെഹ്‌റു ട്രോഫിയില് പങ്കെടുത്തവയിൽനിന്ന് യോഗ്യത നേടിയ മറ്റ് എട്ടു ചുണ്ടന്‍ വള്ളങ്ങളുമായാണ് ചങ്ങനാശേരി ബോട്ട് ക്ലബ് ഏറ്റുമുട്ടുന്നത്. താഴത്തങ്ങാടിയിലാണ് ഇന്നത്തെ മത്സരം.
70 വര്‍ഷത്തെ നെഹ്റുട്രോഫിയുടെ ചരിത്രത്തില്‍ ആദ്യമായാണ് ചങ്ങനാശേരിക്കാര്‍ സ്വന്തമായി ഒരു ബോട്ട് ക്ലബിനെ മത്സരിപ്പിച്ച് ചാന്പ്യൻസ് ബോട്ട് ലീഗ് (സിബിഎല്‍) പ്രവേശന നേട്ടം കൈവരിച്ചത്. ചങ്ങനാശേരിയിലെ 90.8 റേഡിയോ മീഡിയ വില്ലേജാണ് ഇതിന് നേതൃത്വം നല്‍കുന്നത്.
നെഹ്റുട്രോഫിയില് പങ്കെടുത്ത് ലഭിച്ച തുക ചങ്ങനാശേരിയിലെ വിവിധ പ്രദേശങ്ങളില്‍ കാന്‍സര്‍ മൂലം കഷ്ടപ്പെടുന്ന സാമ്പത്തിക ബുദ്ധിമുട്ടുള്ളവരുടെ കീമോതെറാപ്പിക്കു വിനിയോഗിക്കാന്‍ കമ്മിറ്റി തീരുമാനിച്ചിട്ടുണ്ട്. നെഹ്‌റു ട്രോഫിയിലെ മികച്ച പ്രകടനം ലോകമെമ്പാടുമുള്ള ചങ്ങനാശേരിക്കാര്‍ക്കു ആവേശമായതിനാല്‍ ലീഗ് മത്സരങ്ങളിലെ മുന്നേറ്റവും ശ്രദ്ധയോടെയാണ് നോക്കികാണുന്നത്.