റവന്യു ജില്ല ശാസ്ത്രമേള: കുറവിലങ്ങാട് സബ് ജില്ലയ്ക്ക് ഓവറോൾ

കറുകച്ചാൽ: റവന്യു ജില്ല ശാസ്ത്രമേളയ്ക്ക് തിരശീല വീണു. കുറവിലങ്ങാട് സബ്ജില്ലയ്ക്കും ഈരാറ്റുപേട്ട മുസ്‌ലിം ഗേൾസ് ഹയർസെക്കൻഡറി സ്‌കൂളിനും ഓവറോൾ കിരീടം. ആദ്യദിനത്തിൽ പോയിന്‍റ് പട്ടികയിൽ മുൻപന്തിയിൽ നിന്നിരുന്നതും ഇവരായിരുന്നു.

1206 പോയിന്‍റ് നേടിയാണ് കുറവിലങ്ങാട് സബ്ജില്ല മുന്നിലെത്തിയത്. 411 പോയിന്‍റാണ് സമാപനദിനത്തിൽ ഈരാറ്റുപേട്ട ഗേൾസ് ഹയർ സെക്കൻഡറി സ്‌കൂൾ നേടിയത്. ഉപജില്ലയിൽ രണ്ടാംസ്ഥാനം ചങ്ങനാശേരിക്കാണ്. 1132 പോയിന്‍റാണ് നേടിയത്. മറ്റ് ഉപജില്ലകളായ ഈരാറ്റുപേട്ട -1132, ചങ്ങനാശേരി- 1129, കോട്ടയം ഈസ്റ്റ് -970, ഏറ്റുമാനൂർ -947 എന്നിങ്ങനെയാണ് സ്ഥാനങ്ങൾ.

കോട്ടയം മൗണ്ട് കാർമൽ എച്ച്എസ്എസ് ആണ് സ്കൂൾ വിഭാഗത്തിൽ രണ്ടാമത്. 298 പോയിന്‍റാണ് മൗണ്ട് കാർമൽ നേടിയത്. നസ്രത്ത്ഹിൽ ഡി പോൾ എച്ച്എസ്എസ്- 284, ചങ്ങനാശേരി സെന്‍റ് ജോസഫ്‌സ് ജിഎച്ച്എസ് - 278, കോതനല്ലൂർ ഇമ്മാനുവേൽസ് എച്ച്എസ്എസ് - 212 എന്നിങ്ങനെയാണ് സ്കൂൾ വിഭാഗത്തിൽ നേടിയ പോയിന്‍റുകൾ.

കുഞ്ഞുമനസിലെ വലിയ കണ്ടുപിടിത്തങ്ങള്‍

കറുകച്ചാല്‍: കുഞ്ഞുമനസിലെ വലിയ കണ്ടുപിടിത്തങ്ങള്‍ കാഴ്ചക്കാരില്‍ വിസ്മയമായി. റവന്യു ജില്ലാ ശാസ്ത്രമേളയില്‍ ഇന്നലെ നടന്ന ശാസ്ത്ര പ്രദര്‍ശനം കുട്ടികളുടെ ശാസ്ത്രാവബോധത്തിന്‍റെ പുത്തന്‍ പരീക്ഷണശാലയായിരുന്നു. സാമൂഹിക പരിസ്ഥിതി വിഷയങ്ങളെയും സംഭവ വികാസങ്ങളെയും ആസ്പദമാക്കിയായിരുന്നു സ്റ്റില്‍ മോഡലുകളും പരീക്ഷണങ്ങളും.

വയനാട് ദുരന്തത്തെപ്പറ്റിയുള്ള ചര്‍ച്ചകളും മേളയില്‍ ഇടംപിടിച്ചു. സോളാര്‍ ഹൈബ്രിഡ് കാറായിരുന്നു മേളയിലെ പ്രധാന താരം. സയന്‍സ് എങ്ങനെ മനുഷ്യന് ഉപകാരപ്രദമാക്കി മാറ്റാം എന്നതിന്‍റെ ഉദാഹരണമായിരുന്നു ഓരോ മോഡലും.

പെട്രോള്‍ വേണ്ട; സോളാറില്‍ പ്രവര്‍ത്തിക്കും ഹൈബ്രിഡ് കാര്‍

കറുകച്ചാല്‍: കാഴ്ചക്കാര്‍ക്കു കൗതുകമായി സോളാര്‍ ഹൈബ്രിഡ് കാര്‍. പ്രവിത്താനം സെന്‍റ് മൈക്കിള്‍സ് എച്ച്എസ്എസിലെ വിദ്യാര്‍ഥികളായ ജോസഫിനും മൈക്കിള്‍ ഷാജിയുമാണ് സോളാര്‍ ഹൈബ്രിഡ് കാറിന്‍റെ തേരാളികള്‍. സോളാര്‍ എനര്‍ജിയില്‍ മോട്ടോറിന്‍റെ സഹായത്തോടെ പ്രവര്‍ത്തിക്കുന്ന രീതിയിലാണ് രൂപകല്‍പ്പന.

ഒരേസമയം പെട്രോളിലും സോളാറിലും പ്രവര്‍ത്തിക്കാന്‍ കഴിയുമെന്നതാണ് പ്രധാന പ്രത്യേകത. പള്‍സര്‍ ബൈക്കിന്‍റെ എന്‍ജിനാണ് ഇതിനായി ഉപയോഗിച്ചിരിക്കുന്നത്. യാത്രയ്ക്കിടയില്‍ ബാറ്ററിയുടെ ചാര്‍ജ് തീര്‍ന്നാല്‍ എന്‍ജിന്‍റെ സഹായത്തോടെ യാത്ര തുടരും. എന്‍ജിന്‍ പ്രവര്‍ത്തിക്കുമ്പോള്‍ ബാറ്ററി വീണ്ടും ചാര്‍ജാകുകയും ചെയ്യുന്നു.

റോബോട്ടിനെ വരുതിയിലാക്കി ദേവദത്തും ഋഷികേശും

കറുകച്ചാല്‍: എഐ സാങ്കേതികവിദ്യ ഉപയോഗപ്പെടുത്തി റോബോട്ടിനെ നിര്‍മിച്ചു വിദ്യാര്‍ഥി സംഘം. ചേര്‍പ്പുങ്കല്‍ ഹോളിക്രോസ് സ്‌കൂളിലെ വിദ്യാര്‍ഥികളായ ദേവദത്തും ഋഷികേശുമാണ് റോബോട്ടുമായെത്തി താരങ്ങളായി മാറിയത്.

എച്ച്എസ്എസ് വിഭാഗം സയന്‍സ് വര്‍ക്കിംഗ് മോഡലിലായിരുന്നു റോബോട്ടിനെ അവതരിപ്പിച്ചത്. സംസാരിക്കാനും ആളെ കണ്ടാല്‍ തിരിച്ചറിയാനും സാധിക്കുന്ന രീതിയിലാണ് നിര്‍മാണം.

ട്രാഷ് കളക്ടറുമായി കോട്ടയം ഹോളി ഫാമിലി എച്ച്എസ്എസ്

കറുകച്ചാല്‍: തിരുവനന്തപുരം ആമയിഴഞ്ചാന്‍ തോട്ടിലെ മാലിന്യങ്ങള്‍ക്കിടയില്‍പ്പെട്ടു മരണപ്പെട്ട ജോയിയെ ഓര്‍മിപ്പിച്ച് ട്രാഷ് കളക്ടറുമായി കോട്ടയം ഹോളി ഫാമിലി എച്ച്എസ്എസിലെ വിദ്യാര്‍ഥികള്‍.

മാലിന്യം വലിച്ചെറിഞ്ഞിട്ടു ജോയിക്കുവേണ്ടി കണ്ണീരൊഴുക്കാന്‍ നമുക്കെന്തവകാശം എന്ന ചോദ്യത്തോടെയാണ് വിദ്യാര്‍ഥികളായ എസ്.എച്ച്. റോഹനും എയ്ഞ്ചല്‍ ഡാനിയേലും ട്രാഷ് കളക്ടര്‍ അവതരിപ്പിച്ചത്. ജോയിക്കു സംഭവിച്ചത് വേറാര്‍ക്കും സംഭവിക്കാതിരിക്കാന്‍ ട്രാഷ് കളക്ടറിന്‍റെ ഉപയോഗം വഴി സാധിക്കുമെന്നും വിദ്യാര്‍ഥികള്‍ പറഞ്ഞു.

അഗ്രോ ബേസ്ഡ് ഫെന്‍സിംഗ് മാതൃകയുമായി ക്രിസ്തുജ്യോതി

കറുകച്ചാല്‍: കൃഷിയിടങ്ങളില്‍ അതിക്രമിച്ചെത്തി വിളകളും കൃഷിയും നശിപ്പിക്കുന്ന കാട്ടാനകളെയും കാട്ടുപന്നിയെയും തുരത്താന്‍ ആധുനിക അഗ്രോ ബേസ്ഡ് ഫെന്‍സിംഗ് മാതൃകയുമായി വിദ്യാര്‍ഥികള്‍.

ചെത്തിപ്പുഴ ക്രിസ്തു ജ്യോതി എച്ച്എസ്എസിലെ വിദ്യാര്‍ഥികളായ ഡേവിസ് തോമസും അഭിജിത്തുമാണ് അഗ്രോ ബേസ്ഡ് ഫെന്‍സിംഗ് വികസിപ്പിച്ചെടുത്തത്. ഭാരത്തെയും ശബ്ദത്തെയും അടിസ്ഥാനമാക്കിയാണ് ഫെന്‍സിംഗ് പ്രവർത്തിക്കുന്നത്.