കലൂര്‍ സ്റ്റേഡിയത്തിലെ പിച്ച് മോശം അവസ്ഥയില്‍
Sunday, January 12, 2025 1:46 AM IST
കൊച്ചി: കലൂര്‍ അന്താരാഷ്‌ട്ര സ്റ്റേഡിയത്തിലെ പിച്ച് വളരെ മോശം നിലയിലാണെന്ന് കേരള ബ്ലാസ്റ്റേഴ്‌സ് എഫ്‌സി ആശങ്ക അറിയിച്ചു. നാളെ നടക്കാനിരിക്കുന്ന ഐഎസ്എല്‍ മത്സരത്തിനു മുന്നോടിയായി നടത്തിയ പരിശോധനകള്‍ക്കുശേഷമാണ് ബ്ലാസ്റ്റേഴ്‌സ് അധികൃതര്‍ ആശങ്ക വ്യക്തമാക്കിയത്. രാജ്യത്തെ ഏറ്റവും മികച്ച ഗ്രൗണ്ടുകളില്‍ ഒന്നാണ് കലൂര്‍ സ്റ്റേഡിയം. അടുത്തിടെ ഒരു കായികേതര പരിപാടി ഇവിടെ സംഘടിപ്പിച്ചിരുന്നു.
തുടര്‍ന്ന് ഗ്രൗണ്ടിലെ പിച്ച് മോശമായതിൽ ക്ലബും ഐഎസ്എല്‍ അധികൃതരും നിരാശയിലാണ്. കായിക മത്സരങ്ങള്‍ക്കായി തയാറാക്കിയ ഗ്രൗണ്ടില്‍ കായികേതര പരിപാടികള്‍ സംഘടിപ്പിക്കുന്നത് പിച്ച് പൂര്‍ണമായും നശിക്കുന്ന അവസ്ഥയാണുണ്ടാക്കുക. ഇത് അംഗീകരിക്കാനാകില്ല. ഇത്തരമൊരു സാഹചര്യം ഉണ്ടാകുന്നത് തടയുന്നതിനായുള്ള മുന്‍കരുതൽ നടപടികളൊന്നും തന്നെ ഉണ്ടായിട്ടില്ലെന്നും ബ്ലാസ്റ്റേഴ്‌സ് ചൂണ്ടിക്കാട്ടി.
വലിയ തുക ചെലവഴിച്ചാണ് ഗ്രൗണ്ടില്‍ മത്സരയോഗ്യമായ പിച്ച് തയാറാക്കുന്നതും കൃത്യമായ പരിചരണത്തിലൂടെ നിലനിര്‍ത്തുന്നതും. മോശമായാല്‍ പിച്ച് വീണ്ടും തയാറാക്കുന്നതിനും ഏറെ തുക ആവശ്യമാണ്. അതിനാല്‍ ഇത്തരത്തിലുള്ള തീരുമാനങ്ങള്‍ പ്രോത്സാഹിപ്പിക്കപ്പെടാന് പാടില്ലെന്നും ബ്ലാസ്റ്റേഴ്‌സ് അധികൃതര്‍ വ്യക്തമാക്കി. നിലവില്‍ പിച്ച് സജ്ജമാക്കുന്നതിനായി ബ്ലാസ്റ്റേഴ്‌സിന്‍റെ പിച്ച് ടീം ശ്രമിക്കുകയാണെന്നും അധികൃതര്‍ വ്യക്തമാക്കി.