തെന്മല : ആദിവാസി വിഭാഗത്തില്‍പെട്ടവരുടെ ആരോഗ്യപരാമായ പുരോഗതി ലക്ഷ്യമിട്ട് സംസ്ഥാന വനം-വന്യജീവി വകുപ്പും ഇന്‍ഡ്യന്‍ മെഡിക്കല്‍ അസോസിയേഷനും സംസ്ഥാന ആരോഗ്യ വകുപ്പും സംയുക്തമായി മെഡിക്കല്‍ ക്യാമ്പ് സംഘടിപ്പിച്ചു. കുളത്തുപ്പുഴ വില്ലുമല ട്രൈബല്‍ എല്‍പി സ്കൂളില്‍ സംഘടിപ്പിച്ച മെഡിക്കല്‍ ക്യാമ്പ് ഇക്കോ ഡെവലപ്മെന്‍റ് ആന്‍റ് ട്രൈബല്‍ വെല്‍ഫെയര്‍ അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ജെ. ജസ്റ്റിന്‍ മോഹന് ഉദ്ഘാടനം ചെയ്തു.
ഇന്‍ഡ്യന്‍ മെഡിക്കല്‍ അസോസിയേഷന്‍ പുനലൂര്‍ യൂണിറ്റ് പ്രസിഡന്‍റ് ഡോ. എസ്. നാരായണന്‍ നായര്‍ അധ്യക്ഷത വഹിച്ചു. ചീഫ് ഫോറസ്റ്റ് കണ്‍സര്‍വേറ്റര്‍ ഡോ. ആര്‍ കമലാഹര്‍, സ്നേഹ ഹസ്തം കണ്‍വീനര്‍ ഡോ. ഹേമാ ഫ്രാന്‍സിസ്, തെന്മല ഡിഎഫ്ഓ. ഷാനവാസ്, തെന്മല ഫോറസ്റ്റ് റെയ്ഞ്ചര്‍ സി. സെല്‍വരാജ്, ആര്യങ്കാവ് റേയിഞ്ച് ഫോറസ്റ്റര്‍ എസ്. സനോജ്, ആദിവാസി മൂപ്പന്‍മാരായ പി. തങ്കപ്പന്‍ കാണി, ബാബു കാണി, രഞ്ജിത്, ശ്യാമള, വില്ലുമല വി.എസ്.എസ്. പ്രസിഡന്‍റ് ശശിധരന്‍ കാണി, തുടങ്ങിയവര്‍ പ്രസംഗിച്ചു.
ജനറല്‍ മെഡിസിന്‍, ശിശുരോഗ, നേത്രരോഗ, ഗൈനക്കോളജി, ഇഎൻടി, ഓര്‍ത്തോ എന്നീ വിഭാഗങ്ങളിലായി വിദഗ്ധ ഡോക്ടര്‍മാരായ നാരായണന്‍, അനില്‍കുമാര്‍, രാജന്‍, അഞ്ജന, ലിബിന്‍, പ്യാരി എന്നിവരുടെ നേതൃത്വത്തില്‍ മുപ്പതംഗ മെഡിക്കല്‍ സംഘം ക്യാമ്പിന് നേതൃത്വം നല്‍കി. ഏതെങ്കിലും തരത്തിലുള്ള രോഗ ലക്ഷണം കണ്ടെത്തുന്നവര്‍ക്ക് ആവശ്യമായ തുടര്‍ ചികിത്സകള്‍ വനം വകുപ്പിന്‍റ സഹകരണത്തോടെ ഉറപ്പാക്കുന്നതിനും പദ്ധതി ലക്ഷ്യമിടുന്നുണ്ട്.