ഉപതെരഞ്ഞെടുപ്പില്‍ നടക്കുന്നത് സൗന്ദര്യമത്സരമല്ലെന്ന് പി.കെ. സൈനബ
1465183
Wednesday, October 30, 2024 7:47 AM IST
നിലമ്പൂര്‍: വയനാട് ഉപതെരഞ്ഞെടുപ്പില്‍ നടക്കുന്നത് സൗന്ദര്യ മത്സരമല്ലെന്ന് സിപിഎം സംസ്ഥാന കമ്മിറ്റി അംഗം പി.കെ. സൈനബ. വയനാട് മണ്ഡലം എല്‍ഡിഎഫ് സ്ഥാനാര്‍ഥി സത്യന്‍ മൊകേരിയുടെ നിലമ്പൂരിലെ തെരഞ്ഞെടുപ്പ് കമ്മിറ്റി ഓഫീസ് ഉദ്ഘാടനം ചെയ്തു പ്രസംഗിക്കുകയായിരുന്നു അവര്‍.
വയനാട്ടിലെ ജനങ്ങളുടെ പ്രശ്നങ്ങളല്ല യുഡിഎഫ് പറയുന്നത്. പ്രിയങ്ക ഗാന്ധിയും ഇന്ദിരാ ഗാന്ധിയും തമ്മിലുള്ള സാദൃശ്യമാണ് പറയുന്നത്. ഇത് സൗന്ദര്യ മത്സരമല്ലെന്നും ജനങ്ങളുടെ പ്രശ്നങ്ങള്‍ ഉയര്‍ത്തി പിടിച്ചാണ് വോട്ട് തേടേണ്ടതെന്നും അവര്‍ പറഞ്ഞു.
സിപിഐ നിലമ്പൂര്‍ മണ്ഡലം സെക്രട്ടറി എം. മുജീബ്റഹ്മാന്‍ അധ്യക്ഷത വഹിച്ചു. മുന്‍ എംഎല്‍എ ആര്‍. ലതാദേവി, സിപിഐ സംസ്ഥാന കമ്മിറ്റി അംഗം രഘുവരന്‍, സിപിഎം നിലമ്പൂര്‍ ഏരിയാ സെക്രട്ടറി ഇ. പദ്മാക്ഷന്‍, കക്കാടന്‍ റഹീം, ജോര്‍ജ് തോമസ്, സ്കറിയ ക്നാംതോപ്പില്‍, പരുന്തന്‍ നൗഷാദ്, പി.എം. ബഷീര്‍, വി. ശ്രീധരന്‍ തുടങ്ങിയവര്‍ പ്രസംഗിച്ചു.