2019 ജനുവരിയിലാണ് സിഎംആര്എല്ലില് ആദായനികുതി വകുപ്പ് റെയ്ഡ് നടത്തി ചെലവുകള് പെരുപ്പിച്ചുകാട്ടി 132.82 കോടി രൂപയുടെ ക്രമക്കേട് നടത്തിയെന്നു കണ്ടെത്തിയത്. വീണാ വിജയന്റെ എക്സാലോജിക് കമ്പനിക്ക് 1.72 കോടി നല്കിയതും വിവിധ അന്വേഷണങ്ങളില് വെളിപ്പെട്ടിരുന്നു. ഇതിന്റെ അടിസ്ഥാനത്തിലാണ് എഫ്ഐആര് രജിസ്റ്റര് ചെയ്യണമെന്ന് ആവശ്യപ്പെട്ടത്.
നിയമപ്രകാരമുള്ള കുറ്റകൃത്യം കണ്ടെത്തിയാല് ആര്ക്കും സമന്സ് അയയ്ക്കാനുള്ള അധികാരം തങ്ങള്ക്കുണ്ടെന്ന് ഇഡി സത്യവാങ്മൂലത്തില് പറയുന്നു. ഷെഡ്യൂള്ഡ് കുറ്റകൃത്യം ഇല്ലാത്തതിനാല് ഇഡിക്ക് അന്വേഷണം നടത്താനാകില്ലെന്നായിരുന്നു ഹര്ജിക്കാരുടെ വാദം.
ചോദ്യം ചെയ്യാന് ഹാജരാകണമെന്നാവശ്യപ്പെട്ട് സമന്സ് അയച്ചതിനു പിന്നാലെ ഇസിഐആര് റദ്ദാക്കണമെന്നാവശ്യപ്പെടുന്നത് അപക്വമാണ്. സമന്സ് അയച്ചതിലൂടെ ഹര്ജിക്കാര് കുറ്റക്കാരാണെന്നല്ല അര്ഥം.
സമന്സ് ഒഴിവാക്കാന് ആര്ക്കും കഴിയില്ല. ആഭ്യന്തര രേഖയായതിനാല് ഇസിഐആര് റദ്ദാക്കണമെന്ന് ആവശ്യപ്പെടാനാകില്ല. സെറ്റില്മെന്റ് കമ്മീഷണറുടെ ഉത്തരവ് രഹസ്യസ്വഭാവമുള്ളതാണെന്ന വാദം തെറ്റാണെന്നും ഇഡി കോടതിയെ അറിയിച്ചു.