കെസിബിസി പ്രോ-ലൈഫ് സമിതിയുടെ ഭിന്നശേഷി ക്ഷേമപദ്ധതിക്ക് തുടക്കം : Deepika.com Kerala News |

കൊച്ചി: കെസിബിസി പ്രോ-ലൈഫ് സമിതിയുടെ നേതൃത്വത്തില്‍ വലിയ കുടുംബങ്ങളിലെ ഭിന്നശേഷിയുള്ള കുട്ടികൾക്കായി ‘ഹോളി ഫാമിലി എന്‍ഡോവ്മെന്‍റ് ’ പദ്ധതിക്കു തുടക്കമായി. സീറോമലബാര്‍ സഭ കൂരിയ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍ ഉദ്ഘാടനം ചെയ്തു. ഭൂമിയില്‍ ജനിക്കുന്ന ഓരോ കുഞ്ഞും ഈ ലോകത്തിന് വലിയ അനുഗ്രഹവുമായാണു കടന്നുവരുന്നതെന്ന് അദ്ദേഹം പറഞ്ഞു.

സമൂഹത്തിന്‍റെ നിലനില്‍പ്പും പ്രകൃതിയുടെ സംരക്ഷണവും ദൈവം മനുഷ്യരെയാണ് ഏല്‍പ്പിച്ചിരിക്കുന്നത്. ഉദരത്തിലെ കുഞ്ഞിന് പിറക്കുവാനുള്ള സാഹചര്യം ഒരുക്കാന്‍ ഓരോ കുടുംബത്തിനും ചുമതലയുണ്ട്. അതിനു പിന്തുണ നല്‍കാന്‍ സമൂഹത്തിന് ബാധ്യതയുണ്ട്.

ഗര്‍ഭഛിദ്രത്തില്‍നിന്ന് കൗണ്‍സലിംഗ് വഴി നിരവധി കുടുംബങ്ങളെ രക്ഷിക്കാനായതു സന്തോഷകരമാണ്. കൂടുതല്‍ കുട്ടികളുള്ള കുടുംബങ്ങളിലെ കൂട്ടായ്മ വലിയ സന്തോഷത്തിനും ഐശ്വര്യത്തിനും ഇടയാക്കുന്നു. ജീവന്‍റെ സംരക്ഷണത്തിനുവേണ്ടി സമര്‍പ്പണത്തോടെ പ്രവര്‍ത്തിക്കുന്ന പ്രോ-ലൈഫ് ശുശ്രൂഷകരെ അഭിനന്ദിക്കുന്നതായും മാര്‍ വാണിയപ്പുരയ്ക്കല്‍ പറഞ്ഞു.

പ്രഥമ എൻഡോവ്മെന്‍റ് സുനി - ജെനി ദമ്പതികള്‍ക്കു കൈമാറി. ചടങ്ങിൽ സമിതി പ്രസിഡന്‍റ് ജോണ്‍സണ്‍ ചൂരേപറമ്പില്‍ അധ്യക്ഷത വഹിച്ചു. കെസിബിസി ഡെപ്യൂട്ടി സെക്രട്ടറി ഫാ. ജേക്കബ് ജി. പാലയ്ക്കാപ്പിള്ളി, സമിതി സംസ്ഥാന ഡയറക്ടര്‍ റവ. ഡോ. ക്ലീറ്റസ് വര്‍ഗീസ് കതിര്‍പറമ്പില്‍, ജനറല്‍ സെക്രട്ടറി ജെയിംസ് ആഴ്ചങ്ങാടന്‍, ആനിമേറ്റര്‍ സാബു ജോസ്, സെക്രട്ടറി ജെസ്‌ലിന്‍ ജോ തുടങ്ങിയവര്‍ പ്രസംഗിച്ചു.

ജോയിസ് മുക്കുടം കോതമംഗലം, ആന്‍റണി പത്രോസ് തിരുവനന്തപുരം, ചെമ്പുമുക്ക് സ്നേഹനിലയം മാനേജര്‍ സിസ്റ്റര്‍ മേരി, ബേബി ചിറ്റിലപ്പള്ളി കാഞ്ഞിരപ്പള്ളി, ‘ചിറക്’ നാടകത്തിന്‍റെ അഭിനേതാക്കൾ, അണിയറക്കാർ എന്നിവരെ ആദരിച്ചു.