നളിനി നെറ്റോ നാളെ ചുമതലയേൽക്കും : Deepika.com Kerala News |

തിരുവനന്തപുരം: സംസ്ഥാനത്തിന്‍റെ നാലാം വനിതാ ചീഫ് സെക്രട്ടറിയായി നളിനി നെറ്റോ നാളെ ചുമതലയേൽക്കും. എസ്.എം. വിജയാനന്ദ് വിരമിക്കുന്ന ഒഴിവിൽ സംസ്ഥാന ചീഫ് സെക്രട്ടറിയായി ആഭ്യന്തര വകുപ്പ് അഡീഷണൽ ചീഫ് സെക്രട്ടറി നളിനി നെറ്റോയെ നിയമിക്കാൻ ഇന്നലെ ചേർന്ന മന്ത്രിസഭായോഗം തീരുമാനിച്ചു.

പത്മ രാമചന്ദ്രനും നീല ഗംഗാധരനും ലിസി ജേക്കബിനുമാണ് ഈ പദവിയിലിരുന്ന വനിതകൾ. സംസ്ഥാനത്തെ 42-ാമത്തെ ചീഫ്സെക്രട്ടറിയാകും നളിനി നെറ്റോ. നാളെയാണു വിജയാനന്ദ് വിരമിക്കുന്നത്.

1981 ബാച്ച് ഐഎഎസ് ഉദ്യോഗസ്ഥയായ നളിനി നെറ്റോ തിരുവനന്തപുരം ജില്ലാ കളക്ടർ, സംസ്ഥാന ടൂറിസം ഡയറക്ടർ, നികുതി, സഹകരണ, രജിസ്ട്രേഷൻ, ജലസേചനം, ഗതാഗതം തുടങ്ങിയ വകുപ്പുകളിൽ സെക്രട്ടറി എന്നീ നിലകളിൽ പ്രവർത്തിച്ചിട്ടുണ്ട്. ഒമ്പതു വർഷം സംസ്ഥാനത്തെ മുഖ്യ തെരഞ്ഞെടുപ്പ് ഓഫീസറായിരുന്നു നളിനി നെറ്റോ. 2006, 2011 വർഷങ്ങളിലെ നിയമസഭാ തെരഞ്ഞെടുപ്പുകളും 2009, 2014 വർഷങ്ങളിലെ ലോക്സഭാ തെരഞ്ഞെടുപ്പുകളും നളിനി നെറ്റോ മുഖ്യ തെരഞ്ഞെടുപ്പ് ഓഫീസറായിരിക്കെയാണു നടന്നത്. 2015ൽ ആഭ്യന്തര വകുപ്പ് അഡീഷണൽ ചീഫ് സെക്രട്ടറിയായി. പിണറായി വിജയൻ സർക്കാർ അധികാരമേറ്റശേഷം മുഖ്യമന്ത്രിയുടെ പ്രിൻസിപ്പൽ സെക്രട്ടറിയുടെ അധികച്ചുമതലയും വഹിക്കുന്നു.

രസതന്ത്രത്തിൽ ബിരുദാനന്തര ബിരുദം നേടിയ നളിനി ഒരു വർഷം തിരുവനന്തപുരം ഓൾ സെയിന്‍റ്സ് കോളജിൽ അധ്യാപികയായിരുന്നു. തിരുവനന്തപുരം സ്വദേശിയാണ്. വിജിലൻസ് ഡയറക്ടറായി വിരമിച്ച ഡെസ്മണ്ട് നെറ്റോ ആണ് ഭർത്താവ്. ഏക മകൾ അനിഷ നെറ്റോ ലണ്ടനിൽ കംപാരറ്റീവ് ലിറ്ററേച്ചറിൽ പിഎച്ച്ഡി ചെയ്യുന്നു.

നളിനിയുടെ പിതൃസഹോദരീ പുത്രി ഗിരിജ വൈദ്യനാഥനാണ് ഇപ്പോൾ തമിഴ്നാട് ചീഫ് സെക്രട്ടറി. അടുത്ത ബന്ധുക്കൾ അയൽ സംസ്ഥാനങ്ങളുടെ ചീഫ് സെക്രട്ടറിമാരായി എത്തുന്നു എന്ന അപൂർവതയുമുണ്ട്.