‘മഞ്ഞുമ്മല്‍ ബോയ്‌സ് ’നിര്‍മാതാക്കള്‍ക്കെതിരേ കേസെടുത്തു : Deepika.com Kerala News |

Click here for detailed news of all items

‘മഞ്ഞുമ്മല്‍ ബോയ്‌സ് ’നിര്‍മാതാക്കള്‍ക്കെതിരേ കേസെടുത്തു

Thursday, April 25, 2024 1:42 AM IST

കൊച്ചി: കോടതി ഉത്തരവിനെത്തുടര്‍ന്ന് ‘മഞ്ഞുമ്മല്‍ ബോയ്‌സ്’ സിനിമയുടെ നിർമാതാക്കള്‍ക്കെതിരേ പോലീസ് കേസെടുത്തു. പറവ ഫിലിംസിന്‍റെ ഉടമകളായ ഷോണ്‍ ആന്‍റണി, നടന്‍ സൗബിന്‍ ഷാഹിര്‍, സൗബിന്‍റെ പിതാവ് ബാബു ഷാഹിര്‍ എന്നിവര്‍ക്കെതിരേ മരട് പോലീസാണ് എറണാകുളം ഒന്നാം ക്ലാസ് മജിസ്‌ട്രേറ്റ് കോടതി ഉത്തരവ് പ്രകാരം കേസെടുത്തത്.

സിനിമയ്ക്കായി ഏഴു കോടി മുടക്കിയെന്നും മുടക്കുമുതലോ ലാഭവിഹിതമോ നല്‍കിയില്ലെന്നും കാണിച്ച് അരൂര്‍ സ്വദേശി സിറാജ് നല്‍കിയ പരാതിയിലാണു കേസ്. ക്രിമിനല്‍ ഗൂഢാലോചന, വിശ്വാസവഞ്ചന, വ്യാജരേഖ ചമയ്ക്കല്‍ എന്നീ വകുപ്പുകളാണ് ചുമത്തിയിട്ടുള്ളത്.

പ്രതികളുടെ മൊഴി വരുംദിവസങ്ങളില്‍ പോലീസ് രേഖപ്പെടുത്തും. സിനിമാ നിർമാണവുമായി ബന്ധപ്പെട്ട ബാങ്ക് അക്കൗണ്ടുകളും മുഴുവന്‍ രേഖകളും പരിശോധിച്ച് തുടര്‍നടപടി സ്വീകരിക്കുമെന്ന് മരട് പോലീസ് പറഞ്ഞു.

നേരത്തേ പറവ ഫിലിംസിന്‍റെയും പാര്‍ട്ണര്‍ ഷോണ്‍ ആന്‍റണിയുടെയും ബാങ്ക് അക്കൗണ്ടുകള്‍ കോടതി മരവിപ്പിച്ചിരുന്നു. 40 ശതമാനം ലാഭവിഹിതം വാഗ്ദാനം ചെയ്തു നിർമാതാക്കള്‍ പണം കൈപ്പറ്റിയശേഷം ലാഭവിഹിതമോ മുടക്കുമുതലോ നല്‍കാതെ കബളിപ്പിച്ചെന്നാണു സിറാജിന്‍റെ പരാതി.

2022 നവംബറിലാണ് കരാര്‍പ്രകാരം സിറാജ് പണം കൈമാറിയത്. ആദ്യം 5.99 കോടിയും പിന്നീട് 50 ലക്ഷവും നല്‍കി. 51 ലക്ഷം രൂപയാണ് ഒടുവില്‍ കൈമാറിയത്. സിനിമയുടെ ലാഭത്തില്‍നിന്ന് 40 കോടി രൂപ നല്‍കിയില്ലെന്നാണ് ആരോപണം.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.