71 ഫയർഫോഴ്സ് ഡ്രൈവർമാർ ഇനി സ്റ്റേഷനുകളിലേക്ക് : Deepika.com Kerala News |

Click here for detailed news of all items

71 ഫയർഫോഴ്സ് ഡ്രൈവർമാർ ഇനി സ്റ്റേഷനുകളിലേക്ക്

Thursday, March 28, 2024 12:04 AM IST

തൃശൂർ: ഫയർ ആൻഡ് റെസ്ക്യൂ സർവീസസ് അക്കാദമിയിൽ ഡ്രൈവർ തസ്തികയിൽ പരിശീലനം പൂർത്തിയാക്കിയ 71 ഉദ്യോഗസ്ഥർ ഇനി സർവീസിന്‍റെ ഭാഗം.

വിയ്യൂർ ഫയർ ആൻഡ് റെസ്ക്യൂ സർവീസസ് അക്കാദമിയിൽ നടന്ന പാസിംഗ് ഔട്ട് ചടങ്ങിൽ ഡയറക്ടർ ജനറൽ കെ. പത്മകുമാർ സല്യൂട്ട് സ്വീകരിച്ചു. അക്കാദമി അസിസ്റ്റന്‍റ് ഡയറക്ടർ എ.എസ്. ജോഗി പരിശീലനാർഥികൾക്ക് സത്യപ്രതിജ്ഞ ചൊല്ലിക്കൊടുത്തു.

അഗ്നിസുരക്ഷ, ഫയർ ഫൈറ്റിംഗ്, ഇൻഡസ്ട്രിയൽ ഫയർ സേഫ്റ്റി, മൗണ്ടെയ്ൻ റെസ്ക്യൂ, വെള്ളത്തിനടിയിലെ രക്ഷാപ്രവർത്തനം, വെള്ളപ്പൊക്ക രക്ഷാപ്രവർത്തനം, സ്വയംരക്ഷാ, വിവിധ രാസ അപകടങ്ങൾ കൈകാര്യം ചെയ്യുന്നതിനുള്ള പ്രാവീണ്യം, പ്രഥമ ശുശ്രൂഷ ഉൾപ്പെടെ നാലു മാസത്തെ അടിസ്ഥാന പരിശീലനം ലഭ്യമാക്കി.

കമാൻഡോ പരിശീലനം ഉൾപ്പെടെ രക്ഷാ ഉപകരണങ്ങൾ ലഭിക്കാത്ത സമയത്ത് ഇംപ്രവൈസ്ഡ് രക്ഷാ ഉപകരണങ്ങളുടെ നിർമാണവും പ്രായോഗിക പരിശീലനവും, 300 ഡിഗ്രി താപനിലയിലുള്ള രക്ഷാപ്രവർത്തനങ്ങൾ തുടങ്ങി വിവിധ വിഷയങ്ങളിലെ പ്രായോഗിക പരിശീലനവും നൽകി.

പ്ലസ് ടു അടിസ്ഥാന യോഗ്യതയായ ഫയർ ആൻഡ് റെസ്ക്യൂ ഓഫീസർ (ഡ്രൈവർ) തസ്തികയിൽ ആറു ബിരുദാനന്തര ബിരുദധാരികളും 25 ബിരുദധാരികളും ഒന്പത് ബിടെക് ബിരുദധാരികളും ആറ് ഡിപ്ലോമക്കാരും ഐടിഐ യോഗ്യതയുള്ള നാലുപേരും ഉൾപ്പെടുന്നു.

പരിപാടിയിൽ ടെക്നിക്കൽ ഡയറക്ടർ എം. നൗഷാദ്, ഡയറക്ടർ അഡ്മിനിസ്ട്രേഷൻ അരുണ്‍ അൽഫോണ്‍സ്, അക്കാദമി ഡയറക്ടർ എം.ജി. രാജേഷ്, അസിസ്റ്റന്‍റ് ഡയറക്ടർമാരായ റെനി ലൂക്കോസ്, എസ്.എൽ. ദിലീപ് തുടങ്ങിയവർ പങ്കെടുത്തു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.