ന്യൂയോർക്ക്: ന്യൂയോർക്കിലെ കലാസ്വാദകരുടെ മുൻപിൽ കാഴ്ചയുടെ വിസ്മയം തീർക്കാൻ 'സ്വാമി അയ്യപ്പൻ' നൃത്ത സംഗീത നാടകം അരങ്ങേറുന്നു. ബ്രോഡ്വേ ഷോകളെ വെല്ലുന്ന ദീപ സജ്ജീകരണവും, രംഗ സംവിധാനങ്ങളും 'സ്വാമി അയ്യപ്പനെ' നാളിതുവരെ അമേരിക്കൻ മലയാളികൾ കണ്ട നാടകങ്ങളിൽ നിന്ന് വ്യത്യസ്ഥമാക്കും.
മഹിമയുടെ ധനശേഖരണാർത്ഥം ഒക്ടോബർ 21 ശനിയാഴ്ചയാണ് ന്യൂയോർക്കിൽ ലോംഗ് ഐലന്‍റിലെ പോർട്ട് വാഷിംഗ്ടണിലുള്ള ജെന്നി റിംസ്കി തിയേറ്ററിൽ സ്വാമി അയ്യപ്പൻ അരങ്ങേറുന്നത്. ചടങ്ങിൽ പ്രശസ്ത തെന്നിന്ത്യൻ ചലച്ചിത്ര താരം മന്യ മുഖ്യാഥിതി ആയിരിക്കും.
നിരവധി സാമൂഹിക ചരിത്ര നാടകങ്ങളും, ടെലിഫിലിമുകളും സംവിധാനം ചെയ്ത അമേരിക്കൻ മലയാളികൾക്ക് സുപരിചിതനായ പ്രശസ്ത ഗായകൻ ശബരിനാഥ് നായരാണ് സ്വാമി അയ്യപ്പൻ നാടകം സംവിധാനം ചെയ്തു അരങ്ങിൽ എത്തിക്കുന്നത്. കഴിഞ്ഞ ജുലൈ മാസം ഡിട്രോയിറ്റിൽ കഐച്ച്എൻ എ കണ്‍വൻഷഹിൽ അവതരിപ്പിച്ച് പ്രേക്ഷക ഹൃദയങ്ങളുടെ മുക്തകണ്ഠ പ്രശംസ പിടിച്ചു പറ്റിയ നാടകമാണ് 'സ്വാമി അയ്യപ്പൻ.' നാല്പത്തഞ്ചിൽ പരം കലാകാരന്മാരെ അണിനിരത്തി അത്യാധുനിക സാങ്കേതിക വിദ്യയുടെ അകന്പടിയോടെയാണ് സംവിധായകൻ ശബരിനാഥ് സ്വാമി അയ്യപ്പനെ അണിയിച്ചൊരുക്കുന്നത്.
നയനാനന്ദകരമായ നൃത്തങ്ങളും സംഗീതവും നാടകത്തിന്‍റെ മാറ്റു വർദ്ധിപ്പിക്കുന്നു. നിരവധി വേദികളിൽ കമനീയ നൃത്തരൂപങ്ങൾ ആവിഷ്കരിച്ചിട്ടുള്ള സ്മിത ഹരിദാസ് ആണ് നൃത്ത സംവിധായിക. പാർഥസാരഥി പിള്ള , കൃഷ്ണരാജ് മോഹൻ, ബാഹുലേയൻ രാഘവൻ, രവി നായർ, കിരണ്‍ പിള്ള, ഹരിലാൽ നായർ, സ്മിത ഹരിദാസ്, പ്രിൻസി സന്ദീപ്, ചിത്ര നായർ, ബിന്ദു സുന്ദരം, ദിവ്യാ രതീഷ്, സുരേഷ് ഷണ്മുഖം, വിനോദ് പ്രീത്, രാധ മുകുന്ദൻ, ജയപ്രകാശ് നായർ, സൂരജ് പറന്പത്, ഡോ. ഉണ്ണികൃഷ്ണൻ തന്പി, ഡോ. ജയകുമാർ മേനോൻ, രാംദാസ് കൊച്ചുപറന്പിൽ, ആനന്ദൻ ഭാസ്കരൻ, അർപ്പിത വിനോദ്, നിതിൻ കെയാർകെ, നേഹൽ നായർ എന്നിവർ പ്രധാന വേഷത്തിൽ എത്തുന്ന നാടകത്തിൽ നിരവധി പ്രമുഖ നർത്തകികളും പങ്കെടുക്കുന്നു.
സ്വാമി അയ്യപ്പൻ നാടകത്തിനു പുറമെ പ്രശസ്ത ഗായിക അനിത കൃഷ്ണയുടെ മ്യൂസിക് മെലഡിയും, നൂപുര ഡാൻസ് അക്കാദമിയുടെ നൃത്തരൂപങ്ങളും പരിപാടിക്ക് കൊഴുപ്പേകും. പ്രവേശനം പാസ് മൂലം നിയന്ത്രിച്ചിരിക്കുന്നു.
വിശദ വിവരങ്ങൾക്കും പാസ്സുകൾക്കും ബന്ധപ്പെടുക: രവി നായർ 516 589 3822, വിനോദ് കെയാർകെ 516 633 5208, സുരേഷ് ഷണ്മുഖം 917 971 0871.
റിപ്പോർട്ട്: മൊയ്തീൻ പുത്തൻചിറ