ന്യൂയോര്‍ക്ക്: വേള്‍ഡ് അയ്യപ്പ സേവാ ട്രസ്റിന്റെ ആഭിമുഖ്യത്തില്‍ ന്യൂയോര്‍ക്ക് വെസ്റ് ചെസ്റര്‍ അയ്യപ്പ ക്ഷേത്രത്തില്‍ നടന്നുവന്ന മണ്ഡലകാല പൂജയ്ക്ക് ഭക്തി നിര്‍ഭരമായ പരിസമാപ്തി. അയ്യപ്പ സാന്നിധ്യം വിളയാടിയ മുഹുര്‍ത്തത്തിന് ചിട്ടയായ ആരാധനാക്രമവും, താന്ത്രിക വിധിയും സമ്മേളിച്ചു ഭക്തിയുടെ പരിപൂര്‍ണ പരിവേഷത്തോടെ അനുവര്‍ത്തിച്ചപ്പോള്‍ ആ മുഹുര്‍ത്തം ആധ്യാത്മിക മുഹൂര്‍ത്തമായി മാറി.
ഗുരു സ്വാമി പാര്‍ത്ഥസാരഥി പിള്ളയുടെയും ക്ഷേത്ര മേല്‍ശാന്തി ശ്രീ മനോജ് നമ്പൂതിരിയുടെയും വാസ്റിന്റെ ഭാരവാഹികളുടെയും നേതൃത്വത്തില്‍ നടന്ന മണ്ഡല പൂജ ഭക്തി സാന്ദ്രമായ അന്തരീക്ഷം സൃഷ്ടിച്ചു. ഇരുമുടിയേന്തിയ അയ്യപ്പന്മാര്‍ ക്ഷേത്രത്തില്‍ പ്രവേശിച്ചപ്പോള്‍ നിറപറയും നിലവിളക്കും താലപ്പൊലിയുമായി വാസ്റിന്റെ മഹിളാ വിഭാഗവും സ്വീകരണച്ചടങ്ങുകള്‍ക്ക് മാറ്റുകൂട്ടി.
സെക്രട്ടറി പത്മജാ പ്രേം , ചെയര്‍മാന്‍ വാസുദേവ് പുളിക്കല്‍, വൈസ് പ്രസിഡന്റ് ജനാര്‍ദനന്‍ ഗോവിന്ദന്‍, ഗണേഷ് നായര്‍, ജോഷി നാരായണന്‍, രാധാകൃഷ്ണന്‍, പി.കെ. രാജാന്‍ നായര്‍, നാരായണന്‍ നായര്‍, രമണി പിള്ള, ഗോപിക്കുട്ടന്‍ നായര്‍, സന്തോഷ് നായര്‍, രവിന്ദ്രന്‍ നായര്‍, സുരേന്ദ്രന്‍ നായര്‍, സുവര്‍ണ, രുക്മിണി നായര്‍, തങ്കമണി പിള്ള, ഓമനാ വാസുദേവ്, ബീനാ പ്രസന്നന്‍, പങ്കജം മേനോന്‍ തുടങ്ങിയവര്‍ വാസ്റിന്റെ സാരഥികളായി ഗുരു സ്വാമിക്കൊപ്പം എല്ലാ ക്രമീകരണങ്ങള്‍ക്കും നേതൃത്വം വഹിച്ചു.
ദീപാരാധനയ്ക്കൊപ്പം കര്‍പ്പൂരാഴിയും കനകക്കണിയും സമര്‍പ്പിച്ചപ്പോള്‍ സന്നിധാനം ആധ്യാത്മിക നിര്‍വൃതിയില്‍ അലിഞ്ഞു. പ്രിയാ ശ്രീകാന്ത് നയിച്ച വാസ്തു ഭജനയില്‍ ഓമന, പദ്മജ, സ്മൃതി സിഥാര്‍ഥ്, ജനാര്‍ദ്ധനന്‍, സെന്തില്‍ തുടങ്ങിയവര്‍ പങ്കെടുത്തു. രുക്മിണി നായരുടെ നേതൃത്വത്തില്‍ നടന്ന അന്നദാനം ഗംഭീരമായി. ഗുരു സ്വാമി പാര്‍ഥസാരഥിപിള്ളയും സംഘവും ഹരിവരാസനം പാടവേ മേല്‍ശാന്തി മനോജ് നമ്പൂതിരി ദീപങ്ങള്‍ ഓരോന്നായി അണച്ച് ഭഗവാനെ ഉറക്കി നട അടച്ചു.
റിപ്പോര്‍ട്ട്: പാര്‍ത്ഥസാരഥി പിള്ള