വ്യാജഗർഭത്തിന്‍റെ പേരിൽ 17 തവണയായി തട്ടിയതു 98 ലക്ഷം

Wednesday, February 28, 2024 12:23 PM IST

ഗർഭിണിയാണെന്ന് അഭിനയിച്ചു സർക്കാരിൽനിന്നു പ്രസവാനുകൂല്യമായി 98 ലക്ഷം രൂപ തട്ടിയെടുത്ത അന്പതുകാരിക്ക് ഒരുവർഷവും ആറു മാസവും തടവുശിക്ഷ. ഇറ്റലിക്കാരിയായ ബാർബറ ലോലെ ആണു വ്യാജഗർഭം പേറി തട്ടിപ്പു നടത്തിയത്.

ഒരു തവണയായിരുന്നില്ല ഇവരുടെ തട്ടിപ്പ്. 24 വർഷത്തിനുള്ളിൽ 17 തവണയാണ് ഇവർ ഗർഭിണിയാണെന്നു പറഞ്ഞ് അനർഹമായി ആനുകൂല്യങ്ങൾ പറ്റിയത്.‌ പണം പറ്റുന്നതിനു പുറമേ വ്യാജഗർഭത്തിന്‍റെ പേരിൽ ജോലിയിൽനിന്ന് ഇവർ സ്ഥിരമായി ലീവെടുക്കുകയും ചെയ്തിരുന്നു.

ഗർഭിണിയാണെന്നു നടിച്ചശേഷം 12 തവണ ഗർഭം അലസിയെന്നും അഞ്ചു കുട്ടികളുണ്ടെന്നും ഇവർ അധികൃതരെ വിശ്വസിപ്പിച്ചു. റോമിലെ ഒരു ക്ലിനിക്കിൽനിന്നു ബാർബറ ഇതിന്‍റെ വ്യാജരേഖകൾ സംഘടിപ്പിച്ചിരുന്നു.

കഴിഞ്ഞ ഡിസംബറിലാണ് ബാർബറ തന്‍റെ അവസാനത്തെ കുഞ്ഞിനു ജന്മം നൽകി എന്ന് അവകാശപ്പെട്ടത്. എന്നാൽ, അതിനു മുൻപേ ഇവരുടെ തുടർച്ചയായ ഗർഭധാരണത്തെക്കുറിച്ചു സംശയങ്ങൾ ഉയർന്നിരുന്നു.

ഇതേത്തുടർന്നു പോലീസ് നിരീക്ഷണവും തുടങ്ങിയിരുന്നു. ബാർബറ പറഞ്ഞ ഗർഭധാരണസമയത്തൊന്നും അവർ കുഞ്ഞുങ്ങളുടെ വിവരങ്ങൾ രജിസ്റ്റർ ചെയ്തിട്ടില്ലെന്നു വ്യക്തമായതോടെയാണ് ഇറ്റാലിയൻ കോടതി ശിക്ഷിച്ചത്.

ഗർഭിണിയാണെന്നു തോന്നിപ്പിക്കുന്നതിനായി വയറിൽ തലയണ കെട്ടിവച്ചാണു ബാർബറ സ്ഥിരമായി നടന്നിരുന്നതെന്നു പോലീസ് പറയുന്നു. ബാർബറ ഗർഭിണിയല്ലെന്നു തനിക്ക് അറിയാമായിരുന്നെന്ന് അവളുടെ പങ്കാളിയായ ഡേവിഡ് പിസിനാറ്റോ പിന്നീടു പോലീസിനോടു സമ്മതിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.