ഷ്വെൽമ്: ജർമനിയിലെ ഷ്വെൽമിൽ കൊളോണിലെ ഇന്ത്യൻ കമ്യൂണിറ്റിയുടെ കുടുംബകൂട്ടായ്മയുടെ നേതൃത്വത്തിൽ സെന്‍റ് മരിയൻ പാരീഷ് ഹാളിൽ തിരുവോണം ആഘോഷിച്ചു.
അന്നമ്മ പുന്നാൻചിറയുടെ പ്രാർഥനാഗാനത്തോടുകൂടി പരിപാടികൾ ആരംഭിച്ചു. കൂട്ടായ്മയുടെ പ്രസിഡന്‍റ് മേഴ്സി തടത്തിൽ സ്വാഗതം ആശംസിച്ചു. മുഖ്യാതിഥികളായിരുന്ന ഇന്ത്യൻ കമ്യൂണിറ്റി ചാപ്ളെയിൻ ഫാ.ഇഗ്നേഷ്യസ് ചാലിശേരി സിഎംഐ, ഫാ.തോമസ് ചാലിൽ സിഎംഐ, ഫാ.ടോം കൂട്ടുങ്കൽ എംസിബിഎസ്, ഫാ.പൗലോസ് കളപ്പുരയ്ക്കൽ സിഎംഐ, ഫാ.ജോഷി കുന്പിളുമൂട്ടിൽ, ഫാ.ഡോ. ജോസഫ് ചെരുവിൽ, ഫാ.ജോസഫ് ചേലംപറന്പത്ത്, കൂട്ടായ്മ ഭാരവാഹികളായ മേഴ്സി തടത്തിൽ, പുഷ്പ ഇലഞ്ഞിപ്പള്ളി, അമ്മിണി മണമയിൽ എന്നിവർ ചേർന്ന് ഭദ്രദീപം തെളിച്ച് ആഘോഷ പരിപാടികൾ ഉദ്ഘാടനം ചെയ്തു.
സോബിച്ചൻ ചേന്നങ്കരയുടെ നേതൃത്വത്തിൽ തിരുവോണഗാനവും, ജോനാസ്, ശ്രീജ, ഫാ. ടോം, ജോളി തടത്തിൽ, മേഴ്സി, വീണ, സിനി എന്നിവരും ഗാനങ്ങൾ ആലപിച്ചു. സത്യ, സാന്ദ്ര, മീര, സജിനി, ജോഹാന കാരുവള്ളിൽ എന്നിവരുടെ നൃത്തത്തിനു പുറമെ ഷ്വെൽമ് ഗ്രൂപ്പിന്‍റെ സിനിമാറ്റിക് ഡാൻസും അരങ്ങേറി.
തിരുവാതിര നൃത്തം വള്ളംകളി ഈരടികൾ, തിരുവോണ ഗാനങ്ങൾ, സർപ്രൈസ് ഫണ്‍ ഗെയിം എന്നിവ ആഘോഷത്തിനു കൊഴുപ്പേകി. നെൽസണ്‍ തടത്തിൽ, ലിബിൻ കാരുവള്ളിൽ എന്നിവരുടെ നേതൃത്വത്തിൽ കുട്ടികൾക്കായി കുസൃതികളികളും സർപ്രൈസ് ഫണ്‍ ഗെയിസും സംഘടിപ്പിച്ചിരുന്നു.
ഫാ.ജോസഫ് ഓണസന്ദേശം നൽകി. ഫാ.ഇഗ്നേഷ്യസ്, ഫാ.തോമസ് ചാലിൽ, ഫാ.പൗലോസ്, ഫാ. ജോഷി എന്നിവർ ആശംസകൾ നേർന്നു സംസാരിച്ചു.
നാൻസി തടത്തിൽ പരിപാടികൾ മോഡറേറ്റ് ചെയ്തു. മനോഹരമായ പൂക്കളവും ഒരുക്കിയിരുന്നു. വുപ്പർത്താലിലെ ലോട്ടസ് ട്രാവൽസ് സ്പോണ്‍സർ ചെയ്ത ഓണക്കളികൾക്കുള്ള സമ്മാനം സിനിയും ഓമന തോമസ് കോട്ടയ്ക്കമണ്ണിലും ചേർന്ന് സമ്മാനിച്ചു. ഓണസദ്യയോടുകൂടി പരിപാടികൾ സമാപിച്ചു.
റിപ്പോർട്ട്: ജോസ് കുന്പിളുവേലിൽ
|