ബർമിംഹാം: ദൈവശാസ്ത്രപരിജ്ഞാനമുള്ള അല്മായർ സഭയ്ക്കു മുതൽക്കൂട്ടാണെന്ന് ഗ്രേറ്റ് ബ്രിട്ടൻ സീറോ മലബാർ രൂപതാധ്യക്ഷൻ മാർ ജോസഫ് സ്രാന്പിക്കൽ. ഗ്രേറ്റ് ബ്രിട്ടൻ സീറോ മലബാർ രൂപതയും തലശേരിയിലുള്ള ആൽഫാ ഇൻസ്റ്റിറ്റ്യൂട്ട് ഓഫ് തിയോളജി ആൻഡ് സയൻസും സംയുക്തമായി സംഘടിപ്പിക്കുന്ന ദൈവശാസ്ത്ര കോഴ്സുകളുടെ ഉദ്ഘാടനം നിർവഹിക്കുകയായിരുന്നു അദ്ദേഹം.
സഭ യുടെ അജപാലനശുശ്രൂഷയിലും സുവിശേഷവത്കരണപ്രവൃത്തികളിലും ഈ അല്മായർക്കു സുപ്രധാനമായ സ്ഥാനമുണ്ടാകുമെന്നും ബിഷപ് പറഞ്ഞു. സഭാവബോധവും ദൈവശാസ്ത്ര ഉൾക്കാഴ്ചകളുമുള്ള അല്മായർ സഭയുടെ ചരിത്രത്തിൽ എല്ലാക്കാലത്തും നിർണായകമായ സംഭാവനകൾ നല്കുകയും സ്വാധീനം ചെലുത്തുകയും ചെയ്തിട്ടുണ്ട്. പ്രബുദ്ധരായ അല്മായസമൂഹം ഗ്രേറ്റ് ബ്രിട്ടൻ സീറോ മലബാർ രൂപതയുടെ സഭൈക്യശുശ്രൂഷയിൽ ക്രിയാത്മകമായി പ്രവർത്തിക്കുമെന്നു പ്രത്യാശിക്കുന്നതായും മാർ സ്രാന്പിക്കൽ പറഞ്ഞു.
ഗ്രേറ്റ് ബ്രിട്ടൻ സീറോ മലബാർ രൂപത വികാരി ജനറാൾ മോണ്. മാത്യു ചൂരപ്പൊയ്കയിൽ അധ്യക്ഷത വഹിച്ചു. ആൽഫാ ഇൻസ്റ്റിറ്റ്യൂട്ട് ഓഫ് തിയോളജി ആൻഡ് സയൻസ് ഡയറക്ടർ റവ. ഡോ. ജോസഫ് പാംപ്ലാനി, കോഴ്സ് ഡയറക്ടർ ഫാ. ജോയി വയലിൽ സിഎസ്ടി, റവ. ഡോ. സെബാസ്റ്റ്യൻ നാമറ്റത്തിൽ, ഡോ. സിസ്റ്റർ മേരി ആൻ സിഎംസി, ഫാ. ഫാൻസുവ പത്തിൽ, തന്പി ജോസ്, സിന്ധു തോമസ് തുടങ്ങിയവർ പ്രസംഗിച്ചു.
വിശുദ്ധ ഗ്രന്ഥം, ആരാധനക്രമം തുടങ്ങി പതിന്നാലു വിഷയങ്ങളും ഹീബ്രു, ഗ്രീക്ക്, സുറിയാനി തുടങ്ങിയ ഭാഷകളും പരിചയപ്പെടുത്തുന്ന ദൈവശാസ്ത്ര കോഴ്സിൽ ഗ്രേറ്റ് ബ്രിട്ടൻ സീറോ മലബാർ രൂപതയുടെ വിവിധ ഭാഗങ്ങളിൽനിന്ന് നൂറോളം അല്മായർ ചേർന്നിട്ടുണ്ട്. ബൽജിയത്തിലെ ലുവൻ യൂണിവേഴ്സിറ്റിയിൽനിന്ന് ദൈവശാസ്ത്രത്തിൽ ഡോക്ടറേറ്റ് നേടിയിട്ടുള്ള ഫാ. ജോസഫ് പാംപ്ലാനിയുടെ നേതൃത്വത്തിൽ റവ. ഡോ. തോമസ് പാറയടിയിൽ എംഎസ്ടി, റവ. ഡോ. മാത്യു ചൂരപ്പൊയ്കയിൽ, റവ. ഡോ. ആന്റണി ചുണ്ടലിക്കാട്ട്, റവ. ഡോ. സെബാസ്റ്റ്യൻ നാമറ്റത്തിൽ, ഡോ. സിസ്റ്റർ മേരി ആൻ സിഎംസി, റവ. ഡോ. ഗരേത്ത് ലേഷോണ്, റവ. ഡോ. ലോനപ്പൻ അരങ്ങാശേരി എംഎസ്ടി, റവ. ഡോ. മാത്യു പിണക്കാട്ട് തുടങ്ങിയവരാണ് ക്ലാസുകൾ നയിക്കുന്നത്.
ഗ്രേറ്റ് ബ്രിട്ടൻ സീറോ മലബാർ രൂപത മതബോധന കമ്മീഷൻ ചെയർമാൻ ഫാ. ജോയി വയലിൽ സിഎസ്ടി കോഴ്സ് ഡയറക്ട്ടറായും അനിറ്റ ഫിലിപ്പ് രജിസ്റ്ററായും സിജി സെബാസ്റ്റ്യൻ വാധ്യാനത്ത് ഫിനാൻസ് ഓഫീസറായും ലിൻസിയ ജോർജ് അക്കാഡമിക് കോഓർഡിനേറ്ററായും പ്രവർത്തിക്കും.
ഡിപ്ലോമ, ബിരുദം, ബിരുദാനന്തരബിരുദം എന്നിങ്ങനെ വിവിധ തലങ്ങളിലുള്ള കോഴ്സിനു വിവിധ യൂണിവേഴ്സിറ്റികളുടെ അംഗീകാരവുമുണ്ട്. ഗ്രേറ്റ് ബ്രിട്ടൻ സീറോ മലബാർ രൂപത നിലവിൽവന്ന ശേഷമുള്ള ആദ്യത്തെ സംരംഭമാണ് ദൈവശാസ്ത്ര പഠന കോഴ്സ്.
|