ഇപ്സ്വിച്ച്: ഒഐസിസി യുകെ ഇപ്സ്വിച്ച് റീജിയണിന്‍റെ ആഭിമുഖ്യത്തിൽ ഇന്ത്യൻ നാഷണൽ കോൺഗ്രസിന്‍റെ 140ാമത് ജന്മദിനാഘോഷവും ക്രിസ്മസ് പുതുവത്സരാഘോഷവും സംയുക്തമായി സംഘടിപ്പിച്ചു.
ഇപ്സ്വിച്ച് മേരി മഗ്‌ധലീൻ പള്ളി ഹാളിൽ വച്ചാണ് പരിപാടി സംഘടിപ്പിച്ചത്. അന്തരിച്ച മുൻ പ്രധാനമന്ത്രി ഡോ. മൻമോഹൻ സിംഗിന്‍റെ ഓർമകൾക്ക് മുന്നിൽ പ്രണാമം അർപ്പിച്ചാണ് ചടങ്ങുകൾക്ക് തുടക്കം കുറിച്ചത്.
കോൺഗ്രസ്‌ പാർട്ടിയുടെ പാതാകകളും ത്രിവർണ ബലൂണുകളും ക്രിസ്മസ് അലങ്കാരങ്ങളും കൊണ്ട് സമൃദ്ധമായി അലങ്കരിച്ച വേദിയിൽ, തിങ്ങിനിറഞ്ഞ സദസിനെ സാക്ഷിയാക്കി ഒഐസിസി യുകെ നാഷണൽ പ്രസിഡന്‍റ് ഷൈനു ക്ലെയർ മാത്യൂസ് ചടങ്ങ് ഉദ്ഘാടനം ചെയ്തു.
മുഖ്യാതിഥിയായി പങ്കെടുത്ത കേംബ്രിഡ്ജ് മേയർ ബൈജു തിട്ടാല "കോൺഗ്രസ്‌ പാർട്ടിയുടെ ചരിത്രം' എന്ന വിഷയത്തെ ആസ്പദമാക്കി മുഖ്യപ്രഭാഷണം നടത്തി. ഒഐസിസി യുകെ ഇപ്സ്വിച്ച് റീജിയൺ പ്രസിഡന്‍റ് ബാബു മാങ്കുഴിയിൽ അധ്യക്ഷത വഹിച്ചു.
ഒഐസിസി യുകെ നാഷണൽ ജോയിന്‍റ് സെക്രട്ടറി കെ.ജി. ജയരാജ്‌ ആമുഖവും റീജിയൺ ജനറൽ സെക്രട്ടറി അഡ്വ. സി.പി. സൈജേഷ് സ്വാഗതവും ആശംസിച്ചു. ഒഐസിസി യുകെ നാഷണൽ കമ്മിറ്റിയെ പ്രതിനിധീകരിച്ച് നാഷണൽ വക്താവ് റോമി കുര്യാക്കോസ്, കമ്മിറ്റി അംഗം ബേബി ലൂക്കോസ് തുടങ്ങിയവർ പ്രസംഗിച്ചു.
തുടർന്ന്, ചടങ്ങിൽ പങ്കെടുത്ത അതിഥികളും നാഷണൽ ഇപ്സ്വിച്ച് റീജിയൺ കമ്മിറ്റി ഭാരവാഹികളും ചേർന്നു ജന്മദിനം ആഘോഷിക്കുന്ന കോൺഗ്രസ്‌ പാർട്ടിക്ക് ആശംസാവാചകം നേർന്നുകൊണ്ടുള്ള കേക്ക് മുറിച്ചു സന്തോഷം പങ്കിട്ടു.
ക്രിസ്മസ് പുതുവത്സര ആശംസകൾ നേർന്നുകൊണ്ട് സംസാരിച്ച ഷൈനു ക്ലെയർ മാത്യൂസ്, കോൺഗ്രസ്‌ പാർട്ടി ഇന്ത്യ രാജ്യത്തിന്‌ നൽകിയ മഹത് സംഭാവനകളും ഇന്നത്തെ ഇന്ത്യ രൂപപ്പെടുത്തുന്നതിൽ കോൺഗ്രസ്‌ വഹിച്ച പങ്കും എടുത്തു പറഞ്ഞു.
ആഘോഷങ്ങൾക്കായി ഒരുക്കിയ കലാവിരുന്നുകളും ഫ്‌ളൈറ്റോസ് ഡാൻസ് കമ്പനിയിലെ കൊച്ചു മിടുക്കർ അവതരിപ്പിച്ച ഡാൻസ് ഷോ, കേരള ബീറ്റ്സ് യുകെയുടെ കലാകാരന്മാർ അണിയിച്ചൊരുക്കിയ സംഗീത വിരുന്ന്, ഡിജെ, ഇപ്സ്വിച്ച് റീജിയണിലെ കലാകാരന്മാർ അവതരിപ്പിച്ച ഗാനങ്ങൾ, മിമിക്രി തുടങ്ങിയവ ആഘോഷരാവ് അവിസ്മരണീയമാക്കി.
ആഘോഷങ്ങളോടനുന്ധിച്ചു നടന്ന റാഫിൾ നറുക്കെടുപ്പിൽ സമ്മാനങ്ങൾ കരസ്ഥമാക്കിയ ഭാഗ്യശാലികൾക്കുള്ള സമ്മാനദാനം അതിഥികളും പരിപാടിയുടെ സ്പോൺസർമാരും ചേർന്നു നിർവഹിച്ചു.
പരിപാടിയുടെ സ്പോൺസർമാരായ ടിഫിൻ ബോക്സ്‌ റസ്റ്റോറന്‍റ്, മറിയും ടൂർസ് & ട്രാവലേഴ്‌സ്, വൈസ് മോർട്ട്ഗേജ് & പ്രൊട്ടക്ഷൻ, സമ്മാനങ്ങൾ സ്പോൺസർ ചെയ്ത കേരള സ്റ്റോർസ് എന്നിവരോടുള്ള നന്ദി റീജിയൺ പ്രസിഡന്‍റ് ബാബു മാങ്കുഴിയിൽ രേഖപ്പെടുത്തി.
റീജിയൺ കമ്മിറ്റി അംഗങ്ങൾ ചേർന്നു തയാറാക്കിയ വിഭവസമൃദ്ധമായ സ്നേഹവിരുന്നും പുലർച്ച വരെ നീണ്ടുനിന്ന ഡിജെയോടും കൂടി പരിപാടിക്ക് സമാപനം കുറിച്ചു.
നാഷണൽ ജോയിന്‍റ് സെക്രട്ടറിമാരായ കെ.ജി. ജയരാജ്‌, വിഷ്ണു പ്രതാപ്, ഇപ്സ്വിച്ച് യൂണിറ്റ് ഭാരവാഹികളായ അഡ്വ. സി.പി. സൈജേഷ്, ജെനിഷ് ലൂക്ക, ജിജോ സെബാസ്റ്റ്യൻ, നിഷ ജെനിഷ്, ജോസ് ഗീവർഗീസ്, നിഷ ജയരാജ്‌, ജിൻസ് വർഗീസ്,
ജോൺസൺ സിറിയക്, ബിജു ജോൺ, ആന്റു എസ്തപ്പാൻ, ജയ്മോൻ ജോസ്, ജെയ്സൺ പിണക്കാട്ട്, ബാബു മത്തായി തുടങ്ങിയവരാണ് പരിപാടികൾക്ക് നേതൃത്വം വഹിച്ചത്.
|