ഫുജൈറ: ഈദ് അൽ ഇത്തിഹാദ് ആഘോഷങ്ങളുടെ ഭാഗമായി കൈരളി കൾച്ചറൽ അസോസിയേഷൻ ഫുജൈറ യൂണിറ്റ് സംഘടിപ്പിക്കുന്ന കൈരളി കേരളോത്സവം ശനിയാഴ്ച വൈകുന്നേരം അഞ്ച് മുതൽ ഫുജൈറ എക്സ്പോ സെന്‍റർ അങ്കണത്തിൽ നടക്കപ്പെടും. അഡ്വ. കെ.പ്രേംകുമാർ എംഎൽഎ, ഹിസ് എക്സലൻസി ഷേക്ക് സയീദ് സെറൂർ സൈഫ് അൽ ശർഖി എന്നിവർ വിശിഷ്ടാതിഥികളായി പങ്കെടുക്കും.
കേരളത്തിന്‍റെ സാംസ്കാരികപ്പെരുമ വിളിച്ചോതുന്ന വൈവിധ്യമാർന്ന കലാപരിപാടികൾ, നൂറിലധികം വനിതകൾ പങ്കെടുക്കുന്ന മെഗാ തിരുവാതിര, ഒപ്പന, അറബിക് ഡാൻസ്, ശാസ്ത്രീയ നൃത്തങ്ങൾ, നാടോടി നൃത്തം, സിനിമാറ്റിക് ഡാൻസ്, നാടൻപാട്ട്, ശിങ്കാരിമേളം,കോൽക്കളി, കളരിപ്പയറ്റ്, യുവഗായകരായ അതുൽ നറുകരയും കൃതികയും നയിക്കുന്ന ഫോക്ക് ഗ്രാഫർ മ്യൂസിക്ക് ബാൻഡിന്‍റെ ഗാനമേള, സാംസ്കാരിക സമ്മേളനം എന്നിവ വിവിധ വേദികളിലായി അരങ്ങേറും.
തെയ്യം, കാവടിയാട്ടം, പുലികളി തുടങ്ങി ഒട്ടേറെ കേരളീയ കലാരൂപങ്ങളും വാദ്യമേളങ്ങളും അണിനിരക്കുന്ന വർണശബളമായ ഘോഷയാത്ര കേരളോത്സവത്തിന് പൂരപ്പൊലിമയേകും. ഉത്സവ നഗരിയിലേക്ക് കടന്നു വരുന്ന പ്രവാസി കലാപ്രതിഭകൾക്ക് കലാപരിപാടികൾ അവതരിപ്പിക്കുവാനുള്ള പ്രത്യേക വേദി കേരളോത്സവത്തിന്‍റെ പ്രത്യേകതയാണ്. രുചിഭേദങ്ങളുടെ കലവറ തീർക്കുന്ന ഭക്ഷണശാലകൾ, പുസ്തക സ്റ്റാളുകൾ തുടങ്ങി വ്യത്യസ്തങ്ങളായ സ്റ്റാളുകൾ കേരളോത്സവത്തിന് സജ്ജമാകും.
മലയാളം മിഷന്‍റെയും നോർക്കയുടെയും പ്രത്യേക സ്റ്റാളുകളും ഉത്സവ നഗറിൽ പ്രവർത്തിക്കുന്നതായിരിക്കും.
കേരളോത്സവം വിജയകരമാക്കുന്നതിന് ആവിശ്യമായ എല്ലാ ഒരുക്കങ്ങളും പൂർത്തികരിച്ച് വരുന്നതായി സംഘാടക സമിതി ജനറൽ കൺവീനർ ഉസ്മാൻ മാങ്ങാട്ടിൽ, ചെയർമാൻ അബ്ദുൾ ഹക്ക്, മീഡിയ കൺവീനർ ഹരിഹരൻ കൈരളി ഫുജൈറ യൂണിറ്റ് സെക്രട്ടറി വിഷ്ണു അജയ്, പ്രസിഡന്‍റ് പ്രദീപ് കുമാർ ,ട്രഷറർ മുഹമ്മദ് നിഷാൻ, സെൻട്രൽ കമ്മറ്റി സെക്രട്ടറി സുജിത്ത് വി.പി,
പ്രസിഡന്‍റ് വിത്സൺ പട്ടാഴി, സന്തോഷ് ഓമല്ലൂർ, ലോക കേരള സഭാംഗങ്ങളായ സൈമൻ സാമുവേൽ, ലെനിൻ ജി.കുഴിവേലി എന്നിവർ അറിയിച്ചു. ഗുഹാതുരത്വമുണർത്തുന്ന കേരളോത്സവത്തിന്‍റെ വർണ വിസ്മയത്തിലേക്ക് എല്ലാവരേയും സഹർഷം സ്വാഗതം ചെയ്യുന്നതായി ഭാരവാഹികൾ പറഞ്ഞു.
|