ന്യൂയോർക്ക്: ഫൊക്കാന സാഹിത്യ ആചാര്യ പുരസ്കാരം പ്രഫ. കോശി തലയ്ക്കലിന്. ഫൊക്കാന കണ്‍വന്‍ഷനോട് അനുബന്ധിച്ച് നല്‍കുന്ന പുരസ്‌കാരങ്ങളില്‍ സാഹിത്യ ആചാര്യ അവാര്‍ഡാണ് അമേരിക്കന്‍ മലയാളികള്‍ക്ക് അഭിമാനമായ കോശി തലയ്ക്കലിന് സമ്മാനിക്കുന്നത്.
31 വര്‍ഷം മലയാള അധ്യാപകൻ, സ്തുത്യര്‍ഹമായ മലയാള സാഹിത്യ പ്രവര്‍ത്തനം, അനേക വര്‍ഷങ്ങളിലെ ഫൊക്കാനയുടെ സാഹിത്യ പുരസ്‌കാരങ്ങളുടെ ജഡ്ജിംഗ് പാനല്‍ ചെയര്‍മാൻ, അനേകം കൃതികളുടെ രചയിതാവ് എന്നിവ പരിഗണിച്ചാണ് കോശി തലയ്ക്കലിന് പുരസ്കാരം നല്‍കുന്നതെന്ന് ഫൊക്കാന ഭാരവാഹികള്‍ അറിയിച്ചു.
1982ല് രൂപികരിച്ചതു മുതല്‍ മലയാള ഭാഷയെ പ്രോല്സാഹിക്കുന്ന ഫൊക്കാനയ്ക്ക് കോശി തലയ്ക്കലിന് ഈ പുരസ്കാരം സമ്മാനിക്കുന്നതില്‍ അഭിമാനമുണ്ടെന്ന് ഫൊക്കാന പ്രസിഡന്‍റ് ഡോ. ബാബു സ്റ്റീഫന്‍ പറഞ്ഞു.
ജൂലൈ 18 മുതല്‍ 20 വരെ നോര്‍ത്ത് ബെഥെസ്ഡയിലെ മോണ്ട്‌ഗോമറി കൗണ്ടി കോണ്‍ഫറന്‍സ് സെന്‍ററില്‍ (Bethesda North Marriott Hotel & Conference Center, 5701 Marinelli Rd, Rockville, MD 20852) നടക്കുന്ന ത്രിദിന കണ്‍വന്‍ഷനില്‍ വച്ച് പുരസ്കാരം സമ്മാനിക്കുമെന്ന് ഫൊക്കാന പ്രസിഡന്‍റ് ഡോ. ബാബു സ്റ്റീഫന്‍ പറഞ്ഞു.
അധ്യാപകനും ഗ്രന്ഥകാരനും ക്രിസ്തീയഗാന രചയിതാവും പ്രഭാഷകനുമാണ് കോശി തലയ്ക്കല്‍. കുന്നം ഗവ. ഹൈസ്‌കൂള്‍, തിരുവല്ല മാര്‍ത്തോമ്മാ കോളജ്, പത്തനംതിട്ട കാതോലിക്കേറ്റ് കോളജ്, ചങ്ങനാശേരി എസ്ബി കോളജ് എന്നിവിടങ്ങളില്‍ നിന്ന് വിദ്യാഭ്യാസം നേടി.
മാവേലിക്കര ബിഷപ് മൂര്‍ കോളജിൽ 1968 മുതല്‍ അധ്യാപകൻ. 1999ല് വകുപ്പ് അധ്യക്ഷനായി വിരമിച്ചു. 1996 മുതല്‍ അമേരിക്കയിലെ ഏറ്റവും വലിയ ക്രിസ്തീയ റേഡിയോ നെറ്റ്‌വര്‍ക്കായ ഫാമിലി റേഡിയോയില്‍ മലയാള വിഭാഗം കൈകാര്യം ചെയ്തു.
ഫൊക്കാനയുടെ ‘ഗുരു’ പുരസ്കാരം, ലിറ്റററി അസോസിയേഷന് ഓഫ് നോര്‍ത്ത് അമേരിക്കയുടെ(ലാന) ലൂമിനറി അവാര്‍ഡ്, സിഎസ്ഐ ദക്ഷിണകേരള മഹായിടവകയുടെ മോശവത്സലം ശാസ്ത്രിയാര്‍ പുരസ്കാരം, ക്രിസ്തീയഗാനരചനയ്ക്കുള്ള പ്രഥമ എം.ഇ. ചെറിയാന്‍ അവാര്‍ഡ്, ക്രൈസ്തവസാഹിത്യ അക്കാദമി അവാര്‍ഡ്, ഗാനങ്ങള്‍ക്കുള്ള അബുദാബി മാര്‍ത്തോമ്മ യുവജനസഖ്യം അവാര്‍ഡ് എന്നിവ ലഭിച്ചിട്ടുണ്ട്. സാമൂഹിക സാംസ്‌കാരിക സേവനത്തിന് ഫിലാഡല്‍ഫിയ സിറ്റി കൗണ്‍സില്‍ പ്രശംസാപ്രതം നല്‍കി ആദരിച്ചു.
പള്ളി, ബഡവാഗ്‌നി (നോവലുകൾ), വെളിച്ചം ഉറങ്ങുന്ന പാതകൾ (ചെറുകഥകൾ), ഡിംഗ്ഡോംഗ്, മൈനയും മാലാഖയും (ബാലസാഹിത്യം), ക്രിസ്മസ്‌കരൾ (വിവര്‍ത്തനം), കാലാന്തരം (കവിതകൾ), ആത്മസങ്കീര്‍ത്തനം (ഗാനങ്ങൾ), പ്രശാന്തയാമങ്ങൾ (ലേഖനം), ഗാനങ്ങളുടെ കദനവഴികള്‍ കഥാവഴികൾ (അനുഭവങ്ങള്‍), കഥപറയുന്ന കീര്‍ത്തനങ്ങൾ (കീര്‍ത്തനചരിത്രം), ആത്മീയബിന്ദുക്കൾ (ലേഖനം), പഞ്ചവര്‍ണ്ണ കഥകൾ (കഥകൾ), കുരിശിലെ മൊഴികൾ (ലേഖനം) എന്നിവയാണ് കൃതികൾ. സാഹിത്യ ലേഖനങ്ങളുടെ സമാഹാരം ഉടനെ പ്രസിദ്ധീകരിക്കുന്നതാണ്.
|