ലണ്ടൻ: വേൾഡ് മലയാളി കൗൺസിൽ യൂറോപ്പ് റീജണിന്‍റെയും യൂറോപ്പ് റീജണിന്‍റെ കീഴിലുള്ള എല്ലാ പ്രൊവിൻസുകളിലേയും പുതിയ ഭാരവാഹികളുടെ പ്രതിജ്ഞാച്ചടങ്ങും ഡോ. ജോബിൻ എസ് കൊട്ടാരത്തിന്‍റെ പ്രവാസികൾ ഭാരതത്തിന്‍റെ അംബാസിഡർമാർ എന്ന വിഷയത്തെക്കുറിച്ചുള്ള പ്രഭാഷണവും പ്രൗഢഗംഭീരമായി. യൂറോപ്പിലെ അനുഗ്രഹീതഗായകനായ സോബിച്ചൻ ചേന്നങ്കരയുടെ പ്രാർഥനഗാനത്തോടെയാണ് ചടങ്ങുകൾ ആരംഭിച്ചത്.
വേൾഡ് മലയാളി കൗൺസിൽ ഗ്ലോബൽ ചെയർമാൻ ഗോപാലപിള്ള യൂറോപ്പ് റീജൺ ഭാരവാഹികൾക്ക് ദൈവനാമത്തിൽ സത്യപ്രതിജ്ഞാ വാചകം ചൊല്ലി കൊടുത്തുകൊണ്ട് 202425 ലേക്കുള്ള യൂറോപ്പ് റീജൺ ഭാരവാഹികളെ ഔദ്യോഗികമായി പ്രഖ്യാപിച്ചു. റീജണിന്‍റെയും പ്രൊവിൻസുകളുടേയും എല്ലാ ഭാരവാഹികൾക്കും അദ്ദേഹം അഭിനന്ദനങ്ങളും ആശംസകളും നേർന്നു.
ജോളി തടത്തിൽ(ചെയർമാൻ), ജോളി എം. പടയാട്ടിൽ(പ്രസിഡന്‍റ്), ബാബു തോട്ടപ്പിള്ളി(ജനറൽ സെക്രട്ടറി), ഷൈബു ജോസഫ്(ട്രഷറർ), സുനിൽ ഫ്രാൻസിസ്(വൈസ് ചെർമാൻ), രാജു കുന്നക്കാട്ട്(വൈസ് പ്രസിഡന്‍റ്), ബൈജു ജോസഫ് എടക്കുന്നത്ത്(വൈസ് പ്രസിഡന്‍റ്) എന്നിവരാണ് യൂറോപ്പ് ജീൺ ഭാരവാഹികൾ.
വേൾഡ് മലയാളി കൗൺസിൽ യൂറോപ്പ് റീജൺ ചെയർമാൻ ജോളി തടത്തിൽ യൂറോപ്പ് റീജണിന്‍റെ കീഴിലുള്ള എല്ലാ പ്രൊവിൻസ് ഭാരവാഹികൾക്കും, പ്രത്യേകിച്ച് യുകെ പ്രൊവിൻസ്, യുകെ നോർത്ത് വെസ്റ്റ് പ്രൊവിൻസ്, അയർലൻഡ് പ്രൊവിൻസ്, ഫ്രങ്ക്ഫർട്ട് പ്രൊവിൻസ്, ജർമൻ പ്രൊവിൻസ് എന്നീ പ്രൊവിൻസുകൾക്ക് ദൈവനാമത്തിൽ സത്യപ്രതിജ്ഞ ചൊല്ലിക്കൊടുത്തു. ഭാരവാഹികളെ ഔദ്യോഗികമായി പ്രഖ്യാപിച്ച് അഭിനന്ദനങ്ങളും ആശംസകളും നേർന്നു.
വേൾഡ് മലയാളി കൗൺസിൽ ഗ്ലോബൽ വൈസ് ചെയർമാനും ഇലക്ഷൻ കമ്മീഷണറുമായ ഗ്രിഗറി മേടയിലിന്‍റെ നേതൃത്വത്തിലായിരുന്നു തെരഞ്ഞെടുപ്പ് നടന്നത്. വേൾഡ് മലയാളി കൗൺസിൽ യൂറോപ്പ് റീജൺ പ്രസിഡന്‍റ് ജോളി എം. പടയാട്ടിൽ എല്ലാവരേയും സ്വാഗതം ചെയ്തു. യൂറോപ്പ് റീജൺ നടത്തി കൊണ്ടിരിക്കുന്ന കലാ സാംസ്കാരികവേദിയുടെ വിജയത്തിനായ അക്ഷീണം പരിശ്രമിച്ചു കൊണ്ടിരിക്കുന്ന യൂറോപ്പ് റീജൺ ജനറൽ സെക്രട്ടറി ബാബു തോട്ടപ്പിള്ളിയുൾപ്പെടെയുള്ളവരെ അദ്ദേഹം അനുസ്മരിച്ചു.
ഡോ. ജോബിൻ എസ്. കൊട്ടാരത്തിന്‍റെ പ്രവാസികൾ ഭാരതത്തിന്‍റെ അംബാസിഡർമാർ എന്ന പ്രഭാഷണം വിജ്ഞാനപ്രദവും ചിന്താദീപ്തവുമായിരുന്നു. കേരളത്തിലെ സാംസ്കാരികരംഗത്തുണ്ടായ മുന്നേറ്റം മലയാളിയുടെ ആത്മവിശ്വാസത്തെ വർധിപ്പിച്ചുവെന്നും, അതാണ് വിദേശരാജ്യങ്ങളിൽ ജീവിതവിജയം നേടി ഭാരതത്തിന്‍റെ സാമൂഹ്യ, സാംസ്കാരിക അംബാസിഡർമാരാകുവാൻ അവരെ സഹായിക്കുന്നതെന്നും അദ്ദേഹം പറഞ്ഞു. നൂറിലധികം ഐഎഎസ്, ഐഎഫ്എസ്, ഐപിഎസ് പ്രതിഭകളെ ഭാരതത്തിനു സമ്മാനിച്ച അബ്സൊലൂട്ട്ഐഎഎസ് അക്കാദമിയുടെ ചെയർമാൻ കൂടിയായ ഡോ. ജോബിൻ എസ് . കൊട്ടാരം അൻപതിലധികം മോട്ടിവേഷനൽ ഗ്രന്ഥങ്ങൾ രചിച്ചിട്ടുണ്ട്.
വേൾഡ് മലയാളി കൗൺസിൽ യൂറോപ്പ് റീജൺ ട്രഷറർ ഷൈബു ജോസഫ് കൃതജ്ഞത പറഞ്ഞു. യുകെയിലെ വിദ്യാർഥിനിയായ അന്നാ ടോമാണ് ഈ കലാസാംസ്കാരികവേദി മോഡറേറ്റ് ചെയ്തത്.
എല്ലാ മാസത്തിന്‍റേയും അവസാനത്തെ ശനിയാഴ്ച നടക്കുന്ന ഈ കലാസാംസ്കാരികവേദിയിൽ എല്ലാ പ്രവാസികൾക്കും അവർ താമസിക്കുന്ന രാജ്യങ്ങളിൽനിന്നു കൊണ്ടുതന്നെ ഇതിൽ പങ്കെടുക്കുവാനും അവരുടെ കലാസൃഷ്ടികൾ അവതരിപ്പിക്കുവാനും ആശയവിനിമയങ്ങൾ നടത്തുവാനും അവസരം ഉണ്ടായിരിക്കുന്നതാണ്.
രണ്ടുമണിക്കൂർ നീണ്ടുനിൽക്കുന്ന ഈ സാംസ്കാരിക സമ്മേളനത്തിന്‍റെ ആദ്യത്തെ ഒരുമണിക്കൂർ പ്രവാസികൾ അഭിമുഖീകരിക്കുന്ന പ്രശ്നങ്ങളെക്കുറിച്ചാണ് ചർച്ച ചെയ്യപ്പെടുക. ഇതിൽ തെരഞ്ഞെടുത്ത വിഷയങ്ങളെ ആധികാരികമായി പ്രതികരിക്കുവാൻ കഴിയുന്ന ഉദ്യോഗകസ്ഥരോ, മന്ത്രിമാരോ പങ്കെടുക്കുന്ന ചർച്ചയായിരിക്കും നടക്കുക. അടുത്ത കലാ സാംസ്കാരികവേദി നടക്കുന്ന മാർച്ച് 30ന് എല്ലാ പ്രവാസി മലയാളികളേയും ഈ കലാസാംസ്കാരിക കൂട്ടായ്മയിലേക്ക് വേൾഡ്മലയാളി കൗൺസിൽ യൂറോപ്പ് റീജൺ സ്വാഗതം ചെയ്യുന്നു.
|