കൊച്ചി: ലോക മലയാളി പ്രവാസി സംഘടനയായ വേൾഡ് മലയാളി ഫെഡറേഷന്‍റെ നാലാമത് ദ്വിവത്സര ഗ്ലോബൽ കൺവൻഷൻ മന്ത്രി റോഷി അഗസ്റ്റിൻ ഉദ്ഘടനം ചെയ്യും.
തായ്‌ലൻഡ് ബാങ്കോക്കിൽ വച്ച് ഈ മാസം 27, 28 തീയതികളിൽ നടക്കുന്ന കൺവെൻഷനിൽ 164 രാജ്യങ്ങളിൽ നിന്നായി 400 ഓളം പ്രതിനിധികൾ പങ്കെടുക്കുമെന്ന് കൊച്ചിയിൽ നടന്ന പത്രസമ്മേളനത്തിൽ വേൾഡ് മലയാളി ഫെഡറേഷൻ ഗ്ലോബൽ ചെയർമാൻ ഡോ. പ്രിൻസ് പള്ളിക്കുന്നേൽ അറിയിച്ചു.
ഫെഡറേഷന്‍റെ ചരിത്രത്തിലെ ഏറ്റവും മികവാർന്ന ആഗോള സമ്മേളനത്തിനായിരിക്കും ബാങ്കോക്കിലെ അംബാസഡർ ഹോട്ടൽ വേദിയാവുക എന്ന് അദ്ദേഹം കൂട്ടിച്ചേർത്തു.
സമ്മേളനത്തിൽ എംഎൽഎമാരായ മോൻസ് ജോസഫ്, ഷാഫി പറമ്പിൽ, റോജി എം. ജോൺ, വേൾഡ് മലയാളി ഫെഡറേഷന്‍റെ ഗ്ലോബൽ പാട്രൺ ജനാബ് സയ്യിദ് മുനവ്വറലി ശിഹാബ് തങ്ങൾ തുടങ്ങിയവരും നിരവധി വ്യവസായ പ്രമുഖരും കലാകാരന്മാരും പങ്കെടുക്കും.
"സന്നദ്ധ സേവനം സാമൂഹ്യ ക്ഷേമത്തിന്‌' എന്ന ആപ്‌ത വാക്യത്തിലൂന്നിയാണ്‌ ഗ്ലോബല്‍ കണ്‍വന്‍ഷന്‍ നടക്കുക. ബിസിനസ്‌ മീറ്റ്‌, മീഡിയ കോണ്‍ഫറന്‍സ്‌, പ്രവാസി ഉച്ചകോടി, "വോയിസ് ഓഫ് വുമൺ സഹ' വനിതാ പ്രോഗ്രാം, വിവിധ മേഖലകളിൽ പ്രശസ്തരായ വ്യക്തികൾക്കുള്ള ആദരവ്, കലാപരിപാടികള്‍ തുടങ്ങിയവ കണ്‍വന്‍ഷന്‍റെ ഭാഗമായി നടക്കുമെന്ന്‌ ഡോ. പ്രിൻസ് പള്ളിക്കുന്നേൽ അറിയിച്ചു.
ഇസാഫ് ഗ്രൂപ്പ് ഓഫ് സോഷ്യൽ എന്‍റർപ്രൈസസിന്‍റെ സ്ഥാപകൻ കെ. പോൾ തോമസ്, ഡോ. മുരളി തുമ്മാരുക്കുടി, പ്രമുഖ വ്യവസായിയും വേൾഡ് മലയാളി ഫെഡറേഷന്‍റെ പാട്രെണും കൂടിയായ ഡോ. സിദ്ദിഖ് അഹമദ്, കവിയും മലയാളം മിഷൻ ഡയറക്ടറുമായ മുരുകൻ കാട്ടാക്കട എന്നിവർ സമ്മേളനത്തിൽ പങ്കെടുക്കും.
കൺവൻഷനോട് അനുബന്ധിച്ച് നടക്കുന്ന വനിതാ ഫോറം പരിപാടിയിൽ വോയിസ് ഓഫ് വുമൺ സഹയിൽ ആരോഗ്യ പ്രവർത്തകയും എഴുത്തുകാരിയും സോഷ്യൽ മീഡിയ ഇൻഫ്ലുൻസറുമായ ഡോ. ഫാത്തിമ അസ്‌ല സംസാരിക്കും.
ഭിന്നശേഷി കുഞ്ഞുങ്ങളുടെ മാതാ പിതാക്കൾ നേരിടുന്ന വെല്ലുവിളികളുടെ ശബ്ദമായി വോയിസ് ഓഫ് വുമനിൽ ഡബ്ല്യുഎംഎഫ് ഇറ്റലി കൗൺസിൽ പ്രസിഡന്‍റ് ഡോ. അൻസമ്മ, അഡ്വൈസറി ബോർഡ്‌ അംഗം സിന്ധു സജീവ് (കേരള) എന്നിവർ പ്രബന്ധം അവതരിപ്പിക്കും.
വിവിധമേഖലകളിൽ നിന്നുള്ള മികവുറ്റ വ്യക്തിത്വങ്ങളെ ആദരിക്കൽ ചടങ്ങിൽ കലാ മേഖലയിലെ ശ്രേഷ്ഠ സംഭവനകൾക്ക് വിശ്വകലാശ്രീ പുരസ്‌കാരം സൂര്യ കൃഷ്ണാമൂർത്തിക്ക് നൽകും.
ഇതോടൊപ്പം നടക്കുന്ന സാംസ്‌കാരിക പരിപാടികളിൽ പ്രശസ്ത ഗായകരായ അതുൽ നറുകര, അരുൺ ഗോപൻ അഞ്ജു ജോസഫ്, അവതാരകരായ രാജ്‌ കലേഷ്, മാത്തുക്കുട്ടി, കലാഭവൻ കെ.എസ്. പ്രസാദ്, മെന്‍റലിസ്റ്റ് അൽത്താഫ് ഹാജ എന്നിവരുടെ പരിപാടികൾ ഉണ്ടായിരിക്കും.
ലോകത്തിലെ 164 രാജ്യങ്ങളിൽ താമസിക്കുന്ന പ്രവാസി മലയാളികളുടെ ഉന്നമനത്തിനും ക്ഷേമത്തിനും വേണ്ടി പ്രയത്നിക്കുന്ന വേൾഡ് മലയാളി ഫെഡറേഷന്‍റെ 202425 വർഷങ്ങളിലേക്കുള്ള പുതിയ ഭാരവാഹികൾ കൺവൻഷനിൽ അധികാരമേൽക്കും.
കൊച്ചിയിൽ ഹോട്ടൽ അബാദ് പ്ലാസയിൽ വച്ച് നടന്ന പത്രസമ്മേളനത്തിൽ ഗ്ലോബൽ പ്രസിഡന്‍റ് ഡോ. ജെ രത്നകുമാർ, ഗ്ലോബൽ കോഓർഡിനേറ്റർ പൗലോസ് തേപ്പാല, ഗ്ലോബൽ പബ്ലിക് റിലേഷൻസ് ഫോറം കോഓർഡിനേറ്റർ റഫീഖ് മരക്കാർ, ഗ്ലോബൽ ചാരിറ്റി കോഓർഡിനേറ്റർ വി.എം.സിദ്ധീഖ്, മിഡിൽ ഈസ്റ്റ് റീജിയൻ പ്രസിഡന്‍റ് റിജാസ് ഇബ്റാഹിം, കേരള സ്റ്റേറ്റ് കൗൺസിൽ പ്രസിഡന്‍റ് ടി.ബി.നാസർ എന്നിവർ പങ്കെടുത്തു.
|