ദമാം: സൗദി അറേബ്യ ഒട്ടേറെ മാറ്റങ്ങൾക്ക് വിധേയമാക്കുകയാണെന്നും കാലത്തിന് അനുസരിച്ചു മാറ്റങ്ങൾ ഉൾക്കൊണ്ട് അവസരങ്ങൾ മുതലാക്കി മുന്നേറാൻ പ്രവാസികൾ തയാറാകണമെന്നും നവയുഗം സാംസ്ക്കാരികവേദി പ്രവർത്തകയോഗം അഭിപ്രായപ്പെട്ടു.
ഒട്ടേറെ പുതിയ പദ്ധതികളും സംരംഭങ്ങളുമായി അറബ് ലോകത്തെത്തന്നെ ഏറ്റവും വികസിതമായ രാജ്യമാകാനുള്ള കുതിപ്പിലാണ് സൗദി അറേബ്യ. അതിനനുസരിച്ചുള്ള നയങ്ങളിലും സാമൂഹിക നിയമങ്ങളിലും ഒക്കെ മാറ്റം വരുന്നുണ്ട്. ഇതെല്ലാം ശ്രദ്ധാപൂർവം മനസിലാക്കി കഴിവുകൾ വളർത്താൻ പ്രവാസികൾ ശ്രമിക്കണമെന്നും യോഗം ആവശ്യപ്പെട്ടു.
ദമാം റോസ് ഹോട്ടൽ ഓഡിറ്റോറിയത്തിൽ നവയുഗം കേന്ദ്രകമ്മിറ്റി പ്രസിഡന്‍റ് ജമാൽ വില്യാപ്പള്ളിയുടെ അധ്യക്ഷതയിൽ ചേർന്ന പ്രവർത്തകയോഗം നവയുഗം ജനറൽ സെക്രട്ടറി എം.എ.വാഹിദ് കാര്യറ ഉദ്ഘാടനം ചെയ്തു.
നവയുഗത്തിന്‍റെ ഭാവിപരിപാടികളും ക്യാമ്പയിനുകളും അദ്ദേഹം വിശദീകരിച്ചു. തുടർന്ന് നടന്ന ചർച്ചയിൽ വിവിധ മേഖല കമ്മിറ്റികളെയും പോഷക സംഘടനകളെയും പ്രതിനിധീകരിച്ച് പ്രതിനിധികൾ സംസാരിച്ചു.
കൺവെൻഷനിൽ വച്ച് നവയുഗത്തിന്‍റെ 2024ലെ മെമ്പർഷിപ്പ് വിതരണത്തിന്‍റെ ഉദ്ഘാടനം നവയുഗം മീഡിയ കൺവീനർ ബെൻസിമോഹൻ നിർവഹിച്ചു. പുതിയ അംഗങ്ങളായ അനീഷ് മോൻ, പ്രതാപ് എന്നിവർക്ക് മെമ്പർഷിപ്പ് നൽകിക്കൊണ്ടാണ് അദ്ദേഹം ഉദ്ഘാടനം നിർവഹിച്ചത്.
പ്രവർത്തക കൺവെൻഷന് നവയുഗം കേന്ദ്ര സഹഭാരവാഹിയായ ദാസൻ രാഘവൻ സ്വാഗതവും കേന്ദ്ര കമ്മിറ്റി അംഗം ഗോപകുമാർ അമ്പലപ്പുഴ നന്ദിയും പറഞ്ഞു. നവയുഗം നേതാക്കളായ സാജൻ കണിയാപുരം, മഞ്ജു മണിക്കുട്ടൻ, അരുൺ ചാത്തന്നൂർ, പ്രിജി കൊല്ലം, ഉണ്ണി മാധവം, ഷിബുകുമാർ, ബിജു വർക്കി,
സഹീർഷാ, ബിനുകുഞ്ഞു, ഷീബ സാജൻ, മഞ്ജു അശോക്, സംഗീത ടീച്ചർ, തമ്പാൻ നടരാജൻ, ജോസ് കടമ്പനാട്, കൃഷ്ണൻ പ്രേരാമ്പ്ര, സന്തോഷ് ചെങ്ങോലിക്കൽ, ജാബിർ, റഷീദ്, രാജൻ, കോശി തരകൻ, നന്ദകുമാർ, നാസർ, സുനിൽ, വർഗീസ്, ഷാമിൽ നെല്ലിക്കോട് എന്നിവർ കൺവെൻഷന് നേതൃത്വം നൽകി.
|