ന്യൂയോർക്ക്: തങ്ങളുടെ പ്രവർത്തന മേഖലകളിൽ പ്രതിഭ തെളിയിച്ചവരുമായ എട്ട് ഇന്ത്യൻ അമേരിക്കൻ മലയാളികളെ കേരള സെന്‍റർ 2023ലെ അവാർഡ് ജേതാക്കളായി പ്രഖ്യാപിച്ചു.
ഈ മാസം 28ന് വെെകുന്നേരം 5.30ന് കേരള സെന്‍റർ ഓഡിറ്റോറിയത്തിൽ വച്ച് നടക്കുന്ന 31ാമത് വാർഷിക അവാർഡ്ദാന ചടങ്ങിൽ വച്ച് ഇവരെ ആദരിക്കും. അമേരിക്കയിലെയും കേരളത്തിലെയും സാമൂഹിക, സാംസ്കാരിക, രാഷ്‌ട്രീയ നേതാക്കന്മാർ ഈ അവാർഡ്ദാന ചടങ്ങിൽ പങ്കെടുക്കും.
സമൂഹനന്മയ്ക്ക് വേണ്ടി പ്രവർത്തിക്കുന്ന അമേരിക്കൻ മലയാളികളെ കേരള സെന്‍റർ 1992 മുതൽ എല്ലാ വർഷവും ആദരിക്കുന്നുണ്ട്. നോമിനികളിൽ നിന്ന് ഓരോ കറ്റഗറിയിലെ ഏറ്റവും യോഗ്യരായവരെയാണ് അവാർഡ് കമ്മിറ്റി തെരഞ്ഞെടുക്കുന്നത് എന്ന് കേരള സെന്‍റർ ട്രസ്റ്റി ബോർഡ് ചെയർമാനും അവാർഡ് കമ്മിറ്റി അംഗവുമായ ഡോ. തോമസ് എബ്രഹാം പ്രസ്താവിച്ചു.
സ്വന്തം പ്രവർത്തന രംഗത്ത് പ്രതിഭ തെളിയിക്കുകയും മറ്റുള്ളവർക്ക് നന്മ ചെയ്ത് സമൂഹ പുരോഗതിക്ക് സംഭാവന ചെയ്യുകയും ചെയ്യുന്ന അമേരിക്കൻ മലയാളികളെ ആദരിക്കുന്നതിൽ കേരള സെന്‍ററിന് വളരെ സന്തോഷമുണ്ടെന്നും അവരുടെ മാതൃക മറ്റുള്ളവർക്ക് ഒരു പ്രചോദനമാണെന്നും ഡയറക്ടർ ബോർഡിന്‍റെയും അവാർഡ് കമ്മിറ്റിയുടെയും ചെയർമാനായ ഡോ. മധു ഭാസ്കരൻ പറഞ്ഞു.
ഈ വർഷം ആദരിക്കപ്പെടുന്നവർ: ഡോ. ശ്യാം കൊട്ടിലിൽ (ബാൾട്ടിമോർ, എംഡി) ലൈഫ് ടൈം അച്ചീവ്‌മെന്‍റ് അവാർഡ്, സജീബ് കോയ (പിക്കറിംഗ്, ഒന്‍റാരിയോ, കാനഡ) ബിസിനസ്, ഡോ. അന്ന ജോർജ് (ലോംഗ് ഐലൻഡ്, എൻവെെ) നഴ്സിംഗ്, ഡോ. ഷെൽബി കുട്ടി (ബാൾട്ടിമോർ, എംഡി) മെഡിസിൻ, അജയ് ഘോഷ് (ട്രംബുൾ, സി‌ടി ) മീഡിയ ആൻഡ് ജേർണലിസം, ലതാ
മേനോൻ (മിസാഗ, ഒന്‍റാരിയോ, കാനഡ) ലീഗൽ സർവീസസ്, ജയന്ത് കാമിച്ചേരിൽ (റീഡിഗ്, പിഎ), പ്രവാസി മലയാളം സാഹിത്യം, ഗോപാല പിള്ള (ഡാളസ്, ടിഎക്സ് ) കമ്യൂണിറ്റി സർവീസ്.
ഡോ. മധു ഭാസ്കരൻ ആയിരുന്നു അവാർഡ് കമ്മിറ്റി ചെയർമാൻ. ഡോ. തോമസ് എബ്രഹാം, ഡെയ്സി പി. സ്റ്റീഫൻ, വർക്കി എബ്രഹാം എന്നിവരായിരുന്നു മറ്റു കമ്മിറ്റി അംഗങ്ങൾ.
കഴിഞ്ഞ 31 വർഷങ്ങളിൽ കേരള സെന്‍റർ ആദരിച്ച 170 ഓളം അമേരിക്കൻ മലയാളികൾ കൂടുതൽ ഉയരങ്ങളിൽ എത്തുവാൻ ശ്രമിക്കുന്നതിലും സേവനത്തിന്‍റെ പാതയിലൂടെ മുന്നോട്ട് പോകുന്നതിലും വളരെ സന്തോഷമുണ്ടെന്ന് പ്രസിഡന്‍റ് അലക്സ് എസ്തപ്പാൻ പറഞ്ഞു.
അവാർഡ്ദാന ചടങ്ങിനോടനുബന്ധിച്ച് വൈവിധ്യമാർന്ന കലാ പരിപാടികളും വൈകുന്നേരം അത്താഴ വിരുന്നും ഉണ്ടായിരിക്കും. പുരസ്‌കാര ചടങ്ങിൽ പങ്കെടുക്കുവാൻ എല്ലാവരെയും ക്ഷണിക്കുന്നതായി ഭാരവാഹികൾ അറിയിച്ചു.
സീറ്റ് റിസേർവ് ചെയ്യുവാൻ കേരള സെന്‍ററുമായി ബന്ധപ്പെടുക: ഫോൺ 5163582000, email: kc@keralacenterny.com. കൂടുതൽ വിവരങ്ങൾക്ക്: അലക്സ് കെ. എസ്തപ്പാൻ, പ്രസിഡന്‍റ്: 516
503 9387, തമ്പി തലപ്പിള്ളിൽ, എക്സിക്യൂട്ടീവ് ഡയറക്ടർ: 516 5519868, രാജു തോമസ് സെക്രട്ടറി 516 434 0669.
|