ഹൂസ്റ്റൺ: മനോജ് കുമാർ പൂപ്പാറയിൽ എന്ന തനി മലയാളി പേര് ഇന്ന് ഹൂസ്റ്റണിലെ അമേരിക്കക്കാരുടെ ഇടയിലും തരംഗമാകുന്നു. ടെക്‌സസിലെ ഫോട്ബെൻഡ് കൗണ്ടിയിൽ പ്രീസിൻക്ട് 3 കോൺസ്റ്റബിൾ ആയി മത്സരിക്കുകയാണ് കേരളത്തിലെ ഒരു പോലീസ് കുടുംബത്തിലെ ഇളമുറക്കാരൻ.
മനോജിന്‍റെ മുത്തച്ഛൻ കേരള പോലീസ് സേന അംഗവും അച്ഛൻ സബ് ഇൻസ്പെക്ടറും ആയിരുന്നു. പോലീസ് ഉദ്യോഗസ്ഥനാവുക എന്ന മനോജിന്‍റെ സ്വപ്നം പൂവണിയിക്കാൻ കേരളത്തിൽ അദ്ദേഹത്തിന് കഴിഞ്ഞില്ല.
അമേരിക്കയിലെത്തി എംബിഎ ബിരുദം നേടുന്നതോടൊപ്പം അദ്ദേഹം ഹാരിസ് കൗണ്ടി ഷെരിഫ് ഡിപ്പാർട്മെന്‍റിൽ ഉദ്യോഗം നേടി തന്‍റെ സ്വപ്നം സാക്ഷാത്കരിച്ചു.
20 വർഷം മുൻപ് അമേരിക്കയിലെത്തിയ കൊച്ചിക്കാരൻ മനോജ് ഹൂസ്റ്റൻ മെട്രോ പോലീസ് സേനയിലെ അംഗമാണ്. കഴിഞ്ഞ ഡിസംബറിൽ സഹഓഫീസറെ കീഴ്പ്പെടുത്തിയ കൊടും കുറ്റവാളിയെ സംഘട്ടനത്തിലൂടെ കീഴ്പ്പെടുത്തിയ മനോജിന് അന്ന് പരിക്കേറ്റിരുന്നു.
മൂന്നു മാസത്തെ ചികിത്സക്കുശേഷമായിരുന്നു വീണ്ടും സനയിൽ ജോലിക്കെത്തിയത്. സഹപ്രവർത്തകനെ രക്ഷിച്ചതിനും ഹൂസ്റ്റൻ പോലീസിന്‍റെ പിടികിട്ടാപ്പുള്ളിയായിരുന്ന കൊടും കുറ്റവാളിയെ പിടികൂടിയതിനും ഹൂസ്റ്റൺ പോലീസിന്‍റെ ഉന്നത ബഹുമതിയായ മെഡൽ ഓഫ് വാലർ അവാർഡിനും അർഹനായിരുന്നു.
മനു പി എന്നു സ്നേഹപൂർവം സഹപ്രവർത്തകർ വിളിക്കുന്ന മനോജ് ഏറ്റവും കൂടുതൽ ഇന്ത്യക്കാർ താമസിക്കുന്ന ഫോട്ബെൻഡ് കൗണ്ടിയിൽ നിന്നാണ് പ്രീസിൻക്ട് 3 കോൺസ്റ്റബിൾ ആയി മത്സരിക്കുന്നത്.
കഴിഞ്ഞ ആഴ്ച സ്റ്റാഫ്‌ഫോർഡിലെ ദേശി റസ്റ്റാറ്റാന്‍റിൽ ഒത്തുചേർന്ന മലയാളി കൂട്ടായ്മ മനോജിന് നിരുപാധിക പിന്തുണ പ്രഖ്യാപിച്ചു. മനോജിന് പിന്തുണയുമായി ഭാര്യ ഹാനി മനോജും മകൻ മാധവ് മനോജും ഒപ്പമുണ്ട്.
സ്റ്റാഫോർഡ് മേയർ കെൻ മാത്യു, കെഎച്ച്എൻഎ പ്രസിഡന്‍റ് ജി.കെ. പിള്ള, ഹൂസ്റ്റൺ ക്നാനായ കമ്യൂണിറ്റി പ്രസിഡന്‍റ് തോമസ് ചെറുകര, മലയാളി അസോസിയേഷൻ പ്രസിഡന്‍റ് ജോജി ജോസഫ്, മാഗ് ട്രസ്റ്റീ ചെയർമാൻ ജോസഫ് ജെയിംസ് അനിൽ ആറന്മുള,
ജീമോൻ റാന്നി, പൊന്നുപിള്ള, ഡാനിയേൽ ചാക്കോ, നൈനാൻ മാത്തുള്ള, തുടങ്ങി 25 പേരുടെ ഒരു കമ്മിറ്റി മനോജിന്‍റെെ വിജയത്തിനായി പ്രവർത്തിക്കാൻ തീരുമാനിച്ചിട്ടുണ്ട്.
ഫോട്ബെൻഡ് കൗണ്ടിയിൽ കൗണ്ടി ജഡ്ജ് കെ. പി. ജോർജ്, മേയർ റോബിൻ ഇലക്കാട്ടു, മേയർ കെൻ മാത്യു, ഡിസ്ട്രിക്ട് ജഡ്ജ് സുരേന്ദ്രൻ പട്ടേൽ, കൗണ്ടി കോർട് ജഡ്ജ് ജൂലി മാത്യു എന്നിവരുൾപ്പടെ നിലവിൽ തെരഞ്ഞെടുക്കപ്പെട്ട ആറു മലയാളികളാണുള്ളത്.
24ന് മിസോറി സിറ്റിയിലെ ഡെസ്ടിനി ഹാളിൽ നടന്ന മനു പി ക്യാമ്പയിൻ കിക്ക് ഓഫിൽ മനോജിന് പിന്തുണയുമായി സമൂഹത്തിന്‍റെ വിവിധ രംഗങ്ങളിൽ നിന്നുള്ളവർ ഒഴുകിയെത്തി.
കറുത്ത വംശജരും ഹിസ്പാനിക് കുടുംബങ്ങളും ഹൂസ്റ്റൺ പോലീസ് സേനയിൽ നിന്ന് ഉന്നത ഉദ്യോഗസ്ഥരും മനോജിന് പിന്തുണയുമായി എത്തിയിരുന്നു. മിസോറി സിറ്റി മേയർ റോബിൻ ഇലക്കാട്ട് മുഖ്യാതിഥിയായിരുന്നു.
ഫോട്ബെൻഡ് ഡെമോക്രാറ്റിക്‌ പാർട്ടി പ്രസിഡന്‍റ് സിന്ത്യ ഗിൻയാർഡ്, ക്യാമ്പയിൻ ചീഫ് ഫെലീഷ്യ ജോൺസൻ, ജി. കെ. പിള്ള, അനിൽ ആറന്മുള, പൊന്നു പിള്ള, തോമസ് ചെറുകര, മുൻ ഹാരിസ് കൗണ്ടി സർജന്‍റ് ഫെർണാണ്ടോ പാലമോറീസ്, എച് പി ഡി ഓഫീസർ ക്ലിഫ് മെയ്‌സ്, ഹാരിസ് കൗണ്ടി കോൺസ്റ്റബിൾ ജോസിലിൻ ജോർജ് എന്നിവരും സംസാരിച്ചു.
മനോജിന്‍റെ എതിരാളി പാക്കിസ്ഥാൻ സ്വദേശിയായ കോൺസ്റ്റബിൾ നബീൽ ഷെയ്ഖ് ആണ്.
|