ലണ്ടൻ: ലണ്ടൻ: ശനിയാഴ്ച റോഥർഹാമിലെ മാൻവേഴ്സ് ലെയിക്കിൽ നടക്കുന്ന യുക്മ കേരളപൂരം വള്ളംകളി മത്സരത്തിന് ആവേശം പകരാൻ ഇത്തവണ സംഗീതത്തിന്‍റെ മാസ്മരിക ലോകമൊരുക്കി ലൈവ് ബാൻഡുമായി ചായ് & കോഡ്‌സ് എത്തുന്നു.
കേരളത്തിന്‍റെ സംഗീത സദസുകളുടെ സുപരിചിത സാന്നിധ്യമായ ഈ അഞ്ച് അംഗ ബാൻഡ് പിന്നണി ഗായകനും സിനിമാ സംഗീത സംവിധായകനുമായ ഗോകുൽ ഹർഷന്‍റെ നേതൃത്വത്തിൽ യുകെയിൽ അരങ്ങേറുകയാണ്.
ലോകോത്തര പ്രതിഭകളുടെ പ്രകടനങ്ങൾ കണ്ട് ശീലിച്ച യുകെ മലയാളികൾക്ക് മറ്റൊരു മറക്കാനാവാത്ത സംഗീതവിരുന്നൊരുക്കാൻ യുക്മയുമായി കൈകോർത്തിരിക്കുന്ന ചായ് & കോഡ്‌സ് കേരള പൂരത്തിനെത്തുന്ന വള്ളംകളി പ്രേമികളുടെ മാറുന്ന ആസ്വാദന നിർവൃതിയെ മറ്റൊരു തലത്തിലേയ്ക്കുയർത്താൻ പോന്ന ഒന്നായിരിക്കും. കൃഷ്ണ (Bass Guitar), എബിൻ (Keyz), പ്രണവ് (Guitars), സജിൻ (Drums) എന്നിവരാണ് ബാൻഡിലെ മറ്റു അംഗങ്ങൾ.
വള്ളംകളിയുടെ പ്രധാന സ്പോൺസേഴ്സ് ലൈഫ് ലൈൻ പ്രൊട്ടക്റ്റ് ലിമിറ്റഡ്, മട്ടാഞ്ചേരി കാറ്ററിംഗ് ടോണ്ടൻ, പോൾ ജോൺ സോളിസിറ്റേഴ്സ്, മലബാർ ഗോൾഡ്, മുത്തൂറ്റ് ഫിനാൻസ്, എൻവെർട്ടിസ് കൺസൽറ്റൻസി ലിമിറ്റഡ്, എസ്ബിഐ യുകെ, ജി.കെ ടെലികോം ലിമിറ്റഡ്, ഏലൂർ കൺസൽറ്റൻസി, മലബാർ ഫുഡ്സ് ലിമിറ്റഡ്, റിലീസിനൊരുങ്ങുന്ന മലയാള ചിത്രം "ആന്‍റണി' എന്നിവരാണ്.
മലയാള സിനിമയിലെ പ്രശസ്ത താരനിരയും വള്ളംകളിയും കേരളീയ കലാരൂപങ്ങളും എല്ലാമായി ഈ അവധിക്കാലത്തിന്‍റെയും ഓണാഘോഷങ്ങളുടെയുമിടയിൽ ഒരു ദിവസം മുഴുവൻ ആഹ്ലാദിച്ചുല്ലസിക്കുവാൻ മുഴുവൻ യുകെ മലയാളികളെയും സ്വാഗതം ചെയ്യുന്നതായി യുക്മ പ്രസിഡന്‍റ് ഡോ.ബിജു പെരിങ്ങത്തറ, ജനറൽ സെക്രട്ടറി കുര്യൻ ജോർജ്, ജനറൽ കൺവീനർ അഡ്വ.എബി സെബാസ്റ്റ്യൻ എന്നിവർ അറിയിച്ചു.
കേരളപൂരം വള്ളംകളി നടക്കുന്ന വേദിയുടെ വിലാസം: Manvers Lake, Station Road, WathUponDearne, Rotherham South Yorkshire. S63 7DG.
|