റിയാദ്: ഇസ്‌ലാം ധാർമ്മികതയുടെ വീണ്ടെടുപ്പിന് എന്ന പ്രമേയത്തിൽ റിയാദ് ഇസ്‌ലാഹി സെന്റേഴ്‌സ് കോഡിനേഷൻ കമ്മിറ്റി സംഘടിപ്പിച്ച ക്യാന്പയിൻ സമാപന സമ്മേളനവും അഹ്‌ലൻ റമദാൻ സംഗമവും വെള്ളിയാഴ്ച നടക്കും. ഖുറൈശ് റോഡിൽ എക്‌സിറ്റ് 30 ലെ നൗറസ് ഇസ്തിറാഹയിൽ ഉച്ചക്ക് ഒരുമണിമുതൽ വിവിധ പരിപാടികൾക്ക് തുടക്കമാവും.
ആറുമാസം നീണ്ടുനിന്ന ക്യാന്പയിന്‍റെ സമാപന സമ്മേളനം പ്രമുഖ ഇസ്‌ലാമിക പണ്ഡിതനും തിരുവനന്തപുരം ദാറുൽ അർഖം കോളേജ് പ്രിൻസിപ്പലുമായ അബ്ദുൽ ലത്തീഫ് സുല്ലമി ഉദ്ഘാടനം ചെയ്യും. ഉത്തമ വിശ്വാസം ഉദാത്ത സംസ്കാരം എന്ന വിഷയത്തിൽ പ്രമുഖ ഇസ്‌ലാമിക പണ്ഡിതനും ഷാർജ മസ്‌ജിദുൽ അസീസ് ഖതീബുമായ ഹുസൈൻ സലഫി മുഖ്യപ്രഭാഷണം നിർവഹിക്കും.
ന്യുജൻ; പ്രശനങ്ങൾ പരിഹാരമുണ്ട് എന്ന വിഷയത്തെ ആസ്‌പദമാക്കി വിസ്‌ഡം സ്റ്റുഡന്റസ് കേരളം പ്രസിഡണ്ട് അർഷദ് അൽ ഹികമി, അജയ്യം ഇസ്‌ലാം എന്ന വിഷയത്തിൽ മദീന ഇസ്‌ലാമിക് യൂണിവേഴ്‌സിറ്റി ബിരുദാനന്തര വിദ്യാർത്ഥി നൂറുദ്ദീൻ സ്വലാഹി, നോമ്പും വിശ്വാസിയും എന്ന വിഷയത്തിൽ അബ്ദുല്ല അൽ ഹികമി, റമദാൻ കൊണ്ട് നേടേണ്ടത് എന്ന വിഷയത്തിൽ ഷുക്കൂർ ചക്കരക്കല്ല് തുടങ്ങിയവർ സംസാരിക്കും. ഹൃദ്യം ക്വുർആൻ സെഷന് ആഷിക് ബിൻ അഷ്‌റഫ്, അമീൻ മുഹമ്മദ്, അബ്ദുറഊഫ് സ്വലാഹി തുടങ്ങിയവർ നേതൃത്വം നൽകും.
ക്വുർആൻ ഹദീസ് ലേർണിംഗ് കോഴ്‌സ് (ക്യുഎച്ച്എൽസി) ഒൻപതാം ഘട്ട പരീക്ഷ റിയാദിൽ നിന്നും റാങ്ക് ജേതാക്കളായവർക്ക് സമ്മാനങ്ങൾ വിതരണം ചെയ്യും. കണ്ടിന്യുയസ് റിലീജിയസ് എഡ്യുക്കേഷൻ (സി.ആർ.ഇ) രണ്ടാഘട്ട ലോഞ്ചിംഗ്, സമ്മേളനത്തിന്‍റെ ഭാഗമായി സംഘടിപ്പിച്ച ക്വുർആൻ പാരായണ മത്സരം, റമദാൻ ക്വിസ്സ് വിജയികൾക്കുള്ള സമ്മാന വിതരണം ചെയ്യും. വിദ്യാർത്ഥികൾക്കായി ലിറ്റിൽ വിങ്‌സ് സെഷൻ ഒരുക്കിയിട്ടുണ്ട്.
ഉമർ ഫാറൂഖ് മദനി സുൽത്താന, ഉമർ കൂൾടെക്ക്, ഉമർ ഫാറൂഖ് വേങ്ങര, സൗദിയിലെ വിവിധ ഇസ്‌ലാഹീ സെൻ്റർ പ്രതിനിധീകരിച്ച് ഇമ്പിച്ചിക്കോയ ദമ്മാം,എൻ. വി.മുഹമ്മദ് സാലിം മദീന, താജുദ്ദീൻ സലഫി മാറാത്ത്, അബ്ദുസലാം മദീനി ഹായിൽ, മുഹമ്മദലി ബുറൈദ, ഡോ. അബ്ദുല്ല ഹാറൂൺ ബുറൈദ, ഫൈസൽ കൈതയിൽ ദമ്മാം, മുഹമ്മദ് കുട്ടി പുളിക്കൽ,ഷുഹൈബ് ശ്രീകാര്യം അല്‍റാസ്, ഒസാമ ബിന്‍ ഫൈസല്‍ തുടങ്ങിയവർ പങ്കെടുക്കും.
റിയാദിലെ വിവിധ പ്രദേശങ്ങളിൽ നിന്നും വാഹനസൗകര്യത്തെ ഏർപ്പെടുത്തിയിട്ടുണ്ട്. കൂടുതൽ വിവരങ്ങൾക്ക് 0550062689 എന്ന നമ്പറിൽ ബന്ധപ്പെടുക.
|