കുവൈറ്റ് സിറ്റി: തനിമ കുവൈറ്റ് സംഘടിപ്പിക്കുന്ന ദേശിയ വടംവലി മത്സരത്തിന്റെ 16ാമത് എഡിഷനുള്ള തയാറെടുപ്പുകൾ പൂർത്തിയായതായി സംഘാടകർ അറിയിച്ചു. മിഡിൽ ഈസ്റ്റിലെ ഏറ്റവും വലിയ വടംവലി മത്സരത്തിന് സമ്മാനമായി മിഡിൽ ഈസ്റ്റിലെ തന്നെ ഏറ്റവും ഉയരം കൂടിയ ട്രോഫിയാണ് സമ്മാനിക്കുന്നത്.
ദി ടഗ് ഓഫ് വാർ ഫെഡറേഷൻ ഓഫ് ഇൻറർനാഷണലിൻറെയും ടഗ് ഓഫ് ദി വാർ ഏഷ്യൻ ഫെഡറേഷന്റെയും അംഗീകാരത്തോടെ നടക്കുന്ന വടംവലി മത്സരം കുവൈറ്റ് ഇന്ത്യൻ സ്കൂളിൽ ഒക്ടോബർ 28നു ഉച്ചക്ക് 2 മണിക്ക് ആരംഭിക്കും. സാൻസിലിയ എവർറോളിംഗ് സ്വർണക്കപ്പിനും ക്യാഷ് അവാർഡിനും വേണ്ടിയുള്ള മത്സരത്തിൽ 18 ഓളം ടീമുകൾ അണിനിരക്കും. രണ്ട്, മൂന്ന്, നാല് സ്ഥാനങ്ങൾ കരസ്ഥമാക്കുന്നവർക്ക് യഥാക്രമം ബ്ലൂലൈൻ, നെസ്റ്റ് & മിസ്റ്റ്, ലൈഫ് ഫിറ്റ്നസ്സ് എവർ റോളംഗ് ട്രോഫികളും മെഡലുകളും ക്യാഷ് അവാർഡുകളും സമ്മാനിക്കും.
കുവൈറ്റ് ഇന്ത്യൻ സ്കൂളിന്റെ ഫ്ളഡ് ലൈറ്റ് ഓപണ് എയർ ഓഡിറ്റോറിയത്തിൽ ഘോഷയാത്രയോടെ ആരംഭിക്കുന്ന പരിപാടിയിൽ തോമസ് കെ. തോമസ് എംഎൽഎ മുഖ്യപ്രഭാഷണം നടത്തും. ഭൂട്ടാൻ അംബാസഡർ ചിറ്റെം ടെൻസിൻ ഉദ്ഘാടനം ചെയ്യുന്ന ചടങ്ങിൽ ഇന്ത്യൻ എംബസി ഫസ്റ്റ് സെക്രട്ടറി വിനോദ് ഗെയ്ക്ക്വാദ് അടക്കമുള്ള പ്രമുഖർ സംബന്ധിക്കും.
ഈ കാലയളവിൽ മണ് മറഞ്ഞു പോയ ജീവിതങ്ങളുടെ ഓർമയ്ക്കായി സ്മൃതിപൂജ നടത്തും. 25 ഇന്ത്യൻ സ്കൂളുകളിൽ നിന്നും തെരഞ്ഞെടുക്കുക്കപ്പെട്ട വിവിധ മേഖലകളിൽ കഴിവ് തെളിയിച്ച 25 വിദ്യാർഥികൾക്ക് എപിജെ അബ്ദുൽ കലാം പേൾ ഓഫ് സ്കൂൾ അവാർഡുകൾ വിതരണം ചെയ്യും. മഴവിൽ മനോരമ ജൂനിയർ സൂപ്പർ4 റിയാലിറ്റി ഷോ വിന്നർ കുമാരി റൂത്ത് ആൻ ടോബി നയിക്കുന്ന ഗാനമേളയും ഉണ്ടായിരിക്കും. ഫുഡ് സ്റ്റാൾ സൗകര്യങ്ങളും ഒരുക്കും.
കെകെഡിഎ, ഐഎകെ, ഐഎകെബി, രാജു ചലഞ്ചേർസ്സ്, സിൽവർ സെവൻ, ലെജന്റ്സ് ഓഫ് കെകെബി, സെറാ കെകെബി, ബോസ്കോ കെകെബി, യുഎൽസി കെകെബി, ടീം അബ്ബാസിയ, ടീം അബ്ബാസിയസി, ഫ്രണ്ട്സ് ഓഫ് രജീഷ്, അലി ബിൻ അലി ഫ്രണ്ട്സ് ഓഫ് കുവൈത്ത്, ഫ്രണ്ട്സ് ഓഫ് രാജു ഫ്രണ്ട്സ് ഓഫ് കുവൈത്ത് ബി, ഫ്രണ്ട്സ് ഓഫ് രാജു ഫ്രണ്ട്സ് ഓഫ് കുവൈത്ത് സി, ഫ്ലൈ വേൾഡ് ടൂർസ്സ് & ട്രാവൽസ് ആഹാ കുവൈത്ത് ബ്രദേർസ്സ്, എ. എം ഓട്ടോമോട്ടീവ് ആഹാ കുവൈറ്റ് ബ്രദേർസ്, എന്നീ ടീമുകളാണു ഇത്തവണ മത്സര രംഗത്തുള്ളത്.
കുവൈറ്റിലെ പ്രവാസ സമൂഹം നേരിട്ടും ഓണ്ലൈൻ ലൈവ് ആയും വീക്ഷിക്കുന്ന പരിപാടി കുവൈറ്റിലെ സുപ്രധാനമായ ഒരു സാംസ്കാരികാഘോഷമാണ് .
കുവൈറ്റിലെ വടംവലിക്കാരായ ഇന്ത്യക്കാർക്ക് അന്തർദേശീയ മത്സരങ്ങൾക് അവസരം ലഭ്യമാക്കാനുള്ള സാധ്യതകൾ ആരായുന്നത് തനിമയുടെ മുഖ്യപരിഗണനയിലാണെന്നും സംഘാടകർ അറിയിച്ചു..
വാർത്താ സമ്മേളനത്തിൽ ഓണത്തനിമ ജോയിന്റ് കണ്വീനർ വിനോദ്, പേൾ ഓഫ് ദി സ്കൂൾ കണ്വീനർ ദീലീപ് ഡികെ, ഓണത്തനിമ കണ്വീനർ ജോജിമോൻ, തനിമ ജെനറൽ കണ്വീനർ ബാബുജി ബത്തേരി, പ്രൊഗ്രാം കണ്വീനർ ബിനോയ്, പൊസ്സഷൻ കണ്വീനർ അഷറഫ് ചൂരൂട്ട്, ജോയിന്റ് കണ്വീനർ മിസ്. ഉഷ ദിലീപ്, റിസപ്ഷൻ കണ്വീനർ ഹബിബ് മുറ്റിചൂർ, മീഡിയ കണ്വീനർ മുബാറക്ക് കാന്പ്രത്ത്, ഫൂഡ്കണ്വീനർ റുഹൈൽ, സ്പോർട്ട്സ് കണ്വീനർ ജിൻസ്, കൾച്ചറൽ കണ്വീനർ ഷൈജു പള്ളിപ്പുറം, സ്പൊർട്ട്സ് ജോയിന്റ് കണ്വീനർ ജിനു, ഫെസിലിറ്റി മാനേജ്മന്റ് റാണ, പ്രെസ്ന്റേഷൻ കണ്വീനർ ജിനോ എന്നിവർ സന്നിഹിതരായിരുന്നു.
|