ലണ്ടൻ: കേരള സർക്കാരിന്റെ സാംസ്കാരിക വകുപ്പിനു കീഴിൽ പ്രവർത്തിക്കുന്ന മലയാളം മിഷൻ ചാപ്റ്ററുകളിൽ മാതൃഭാഷാ പ്രചാരണത്തിനായി സംഘടിപ്പിക്കുന്ന വിവിധ പരിപാടികളിൽ ഏറ്റവും സ്തുത്യർഹമായ പ്രവർത്തനവും പങ്കാളിത്തവും കാഴ്ചവയ്ക്കുന്ന ചാപ്റ്ററിനു നൽകുന്ന പ്രഥമ കണിക്കൊന്ന പുരസ്കാരത്തിന് മലയാളം മിഷൻ യുകെ ചാപ്റ്റർ അർഹമായി. ഒരു ലക്ഷം രൂപയുംപ്രശസ്തി പത്രവുമടങ്ങുന്നതാണ് പുരസ്കാരം.
മലയാള ഭാഷ ലോകമെമ്പാടും പ്രചരിപ്പിക്കുന്നതിന്റെ ഭാഗമായി നൽകുന്ന മൂന്നു പുരസ്കാരങ്ങൾ സാംസ്കാരികവകുപ്പ് മന്ത്രി സജി ചെറിയാനാണ് പ്രഖ്യാപിച്ചത്.
കണിക്കൊന്ന പുരസ്കാരത്തിന് പുറമേ മലയാള ഭാഷയെ സാങ്കേതിക വിദ്യാ സൗഹൃദമാക്കുന്നതിനു നൂതനആശയം ആവിഷ്കരിച്ച് അവതരിപ്പിക്കുന്ന വ്യക്തികൾക്കോ സ്ഥാപനങ്ങൾക്കോ ലഭിക്കുന്ന പുരസ്കാരമായ ഭാഷാ പ്രതിഭാ പുരസ്കാരത്തിന് അധ്യാപകനായ എം.കെ. പ്രവീൺ വർമ്മയും ഭാഷയുടെ പ്രചാരണത്തിനും വളർച്ചയ്ക്കും മികച്ച സംഭാവന നൽകിയ പ്രവാസ സംഘടനയ്ക്കുള്ള പ്രഥമ സുഗതാഞ്ജലി പ്രവാസി പുരസ്കാരത്തിന് ബെറോഡ കേരളസമാജവും അർഹമായി.
2021 ജനുവരി ഒന്നു മുതൽ ഡിസംബർ 31 വരെയുള്ള ഒരു വർഷത്തെ പ്രവർത്തനങ്ങളെ മുൻനിർത്തിയാണ് മലയാളം മിഷൻ യുകെ ചാപ്റ്ററിന് പുരസ്കാരം ലഭിച്ചത്.
ലോക മാതൃഭാഷാദിനമായ ഫെബ്രുവരി 21 ന് തിരുവനന്തപുരം അയ്യങ്കാളി ഹാളില് നടക്കുന്ന ചടങ്ങിൽ മുഖ്യമന്ത്രി പിണറായി വിജയന് പുരസ്ക്കാരം സമ്മാനിക്കും. ഭാഷാപ്രതിഭാ പുരസ്ക്കാരം ഗതാഗത മന്ത്രി അഡ്വ. ആന്റണി രാജു നല്കും, പ്രഥമ സുഗതാഞ്ജലി പ്രവാസി പുരസ്കാരം ധനമന്ത്രി കെ.എന്. ബാലഗോപാല് സമ്മാനിക്കും. സാംസ്കാരികകാര്യ വകുപ്പ് മന്ത്രി സജി ചെറിയാന് അധ്യക്ഷത വഹിക്കുന്ന ചടങ്ങില് പ്രതിപക്ഷ നേതാവ് വി.ഡി. സതീശന് വിശിഷ്ടാതിഥിയും വിദ്യാഭ്യാസ മന്ത്രി വി. ശിവന്കുട്ടി മുഖ്യാതിഥിയുമായിരിക്കും. ശശി തരൂര് എംപി, മേയര് ആര്യ രാജേന്ദ്രന്, സാംസ്കാരിക കാര്യ പ്രിന്സിപ്പല് സെക്രട്ടറി റാണി ജോര്ജ് ഐഎഎസ്, നോര്ക്ക വൈസ് ചെയര്മാന് പി. ശ്രീരാമകൃഷ്ണന്, കവി കെ. ജയകുമാര് (ഡയറക്ടര് ഐഎംജി), പ്രഫ. വി. മധുസൂദനന് നായര് (മലയാളം മിഷന് ഭരണസമിതി അംഗം), മലയാളം മിഷന് ഡയറക്ടര് മുരുകന് കാട്ടാക്കട എന്നിവരും പങ്കെടുക്കും.
കോവിഡ് മഹാമാരിയുടെ വിഷമതകളിലൂടെയും നിയന്ത്രണങ്ങളിലൂടെയും കടന്നുപോയ കാലഘട്ടമായിട്ടും മലയാളം മിഷൻ യുകെ ചാപ്റ്ററിന്റെ മികവാർന്നതും മാതൃകാപരവുമായ പ്രവർത്തനങ്ങളുടെ അംഗീകാരമാണ്കണിക്കൊന്ന പുരസ്കാരമെന്ന് മലയാളം മിഷൻ യുകെ ചാപ്റ്റർ പ്രസിഡന്റ് സി.എ. ജോസഫ് അഭിപ്രായപ്പെട്ടു.
പ്രമുഖ പ്രവാസി സംഘടനയായ യുക്മയുടെ സാംസ്കാരിക വേദി രക്ഷാധികാരിയായും മികച്ച സംഘാടകനുമായ സി.എ. ജോസഫ് 2020 നവംബറിലാണ് മലയാളം മിഷൻ യുകെ ചാപ്റ്റർ പ്രസിഡന്റ് ആയി നിയമിതനായത്. യുകെയിലെ വളർന്നു വരുന്ന കുട്ടികളിൽ മലയാള ഭാഷയും സംസ്കാരവും എത്തിക്കുവാനായി ദീർഘവീക്ഷണത്തോടും അതോടൊപ്പം നിശ്ചയദാർഢ്യത്തോടും മലയാളം മിഷൻ യുകെ ചാപ്റ്റർ ചിട്ടയോടെ കഴിഞ്ഞ വർഷം നടത്തിയ എല്ലാ പ്രവർത്തനങ്ങൾക്കും പ്രസിഡന്റ് എന്ന നിലയിൽ നേതൃത്വം നൽകുവാൻ കഴിഞ്ഞത് അഭിമാനമായി കരുതുന്നുവെന്നും ഈ അംഗീകാരം യുകെയിലെ മലയാള ഭാഷാസ്നേഹികളോടൊപ്പം വിനയപൂർവം ഹൃദയത്തോട് ചേർത്തു വയ്ക്കുന്നുവെന്നും ഇനിയും വരും തലമുറയ്ക്ക് വേണ്ടി കൂടുതൽപ്രവർത്തനങ്ങൾ നടത്തുവാനുള്ള പ്രചോദനമായി ഈ പുരസ്കാരത്തെ കരുതുന്നുവെന്നും സി.എ ജോസഫ് കൂട്ടിചേർത്തു.
2021 ജനുവരി മുതൽ ഡിസംബർ വരെയുള്ള കാലയളവിൽ മലയാളം മിഷൻ യുകെ ചാപ്റ്റർ നടത്തിയിട്ടുള്ള വ്യത്യസ്തങ്ങളായ മുപ്പതോളം പ്രവർത്തനങ്ങളും പരിപാടികളും അവയുടെ തെളിവിനായി നൽകിയ വാർത്താലിങ്കുകളും ഫോട്ടോകളും ഉൾപ്പെടുത്തി ജനുവരി ഒന്പതിനു മലയാളം മിഷന് നൽകിയ റിപ്പോർട്ട് വിലയിരുത്തിയതിന്റെ അടിസ്ഥാനത്തിലാണ് കണിക്കൊന്ന പുരസ്കാരത്തിനായി മലയാളം മിഷൻ യുകെ ചാപ്റ്ററിനെ തെരഞ്ഞെടുത്തത്.
കവിയും ഗാനരചയിതാവും മലയാളം സർവകലാശാല മുൻ വൈസ് ചാൻസലറും മുൻ ചീഫ് സെക്രട്ടറിയുമായകെ ജയകുമാർ ഐഎഎസ്, പ്രമുഖ സാഹിത്യകാരൻ ഡോ ജോർജ് ഓണക്കൂർ, കഥാകൃത്തും നോവലിസ്റ്റും മുൻ പൊതുവിദ്യാഭ്യാസ ഡയറക്ടറുമായ കെ.വി. മോഹൻകുമാർ എന്നിവരടങ്ങിയ സമിതിയാണ് പുരസ്കാര ജേതാക്കളെ തിരഞ്ഞെടുത്തത്.
കണിക്കൊന്ന'പുരസ്കാരം ലഭിക്കുന്നതിനായി പരിഗണിച്ച 2021 ൽ മലയാളം മിഷനെ നയിച്ചിരുന്ന മുൻഡയറക്ടർ പ്രഫ. സുജ സൂസൻ ജോർജ്, മുൻ രജിസ്ട്രാർ എം സേതുമാധവൻ, മുൻ ഭാഷാധ്യാപകൻ ഡോ. എംടി ശശി എന്നിവർ നൽകിയ സഹായസഹകരണങ്ങൾ വളരെ വിലപ്പെട്ടതായിരുന്നുവെന്നും അനുസ്മരിച്ച പ്രസിഡന്റ്, മലയാളം മിഷന്റെ പുതിയ ഡയറക്ടറായി ചുമതലയേറ്റ പ്രശസ്ത കവി മുരുകൻ കാട്ടാക്കടയുടെ നേതൃത്വത്തിലുള്ള മലയാളം മിഷന്റെ പുതിയ സാരഥികളുടെ വിലയേറിയ മാർഗ നിർദ്ദേശങ്ങൾ ചാപ്റ്റർപ്രവർത്തകരെ കൂടുതൽ കർമനിരതരായി മുന്നോട്ടു നയിക്കുവാൻ ഉപകരിക്കുമെന്നും അഭിപ്രായപ്പെട്ടു.
മലയാളം മിഷൻ യുകെ ചാപ്റ്ററിന്റെ പ്രവർത്തനങ്ങൾക്കെല്ലാം സഹായിച്ച സെക്രട്ടറി ഏബ്രഹാം കുര്യൻ,വിദഗ്ധസമിതി ചെയർമാൻ ജയപ്രകാശ് എസ് എസ്,കൺവീനർ ഇന്ദുലാൽ സോമൻ, ജോയിന്റ് സെക്രട്ടറിമാരായ സ്വപ്ന പ്രവീൺ, രാജി രാജൻ, വൈസ് പ്രസിഡന്റ് ഡോ. സീന ദേവകി, റീജണൽ കോഓർഡിനേറ്റർമാരായ ആഷിക് മുഹമ്മദ് നാസർ, ബേസിൽ ജോൺ, ജിമ്മി ജോസഫ്, ബിന്ദു കുര്യൻ, പ്രവർത്തക സമിതി അംഗങ്ങളായ മുരളി വെട്ടത്ത്, സുജു ജോസഫ്, ബിൻസി എൽദോ, വിനീത ചുങ്കത്ത്, ദീപ സുലോചന, ശ്രീജിത്ത് ശ്രീധരൻ എന്നിവരോടുള്ള ഹൃദയം നിറഞ്ഞ നന്ദിയും സി.എ. ജോസഫ് അറിയിച്ചു.
|