നവജീവന്‍ പി.യു. തോമസിന് ഇന്ന് 75-ാം പിറന്നാള്‍ : Deepika.com Nattu Visesham

KOTTAYAM

നവജീവന്‍ പി.യു. തോമസിന് ഇന്ന് 75-ാം പിറന്നാള്‍

Sunday, May 5, 2024 2:07 AM IST

കോട്ടയം: അനേകായിരം അഗതികള്‍ക്കും രോഗികള്‍ക്കും ആശ്വാസവും അഭയവും നല്‍കുന്ന നവജീവന്‍ പി.യു. തോമസിന് ഇന്ന് 75-ാം പിറന്നാള്‍. ലക്ഷക്കണക്കിന് രോഗികള്‍ക്കും കൂട്ടിരിപ്പുകാര്‍ക്കും ഇദ്ദേഹം അന്നദാനം ആരംഭിച്ചിട്ട് നാലു പതിറ്റാണ്ട് തികയുന്നു. കാരുണ്യത്തിന്‍റെയും കരുതലിന്‍റെയും ശുശ്രൂഷകനായ പി.യു. തോമസിനെ ഇന്ന് ആര്‍പ്പൂക്കര നവജീവനില്‍ ആദരിക്കും.

കോട്ടയം മെഡിക്കല്‍ കോളജിനു സമീപം വാടകമുറിയില്‍ രണ്ട് മനോരോഗികളുമായി അഗതി ഭവനം തുടങ്ങിയതുമുതല്‍ പി.യു. തോമസിനൊപ്പം സഹായികളും സഹകാരികളുമായി പ്രവര്‍ത്തിച്ച ആരോഗ്യപ്രവര്‍ത്തകരെയും വൈദികരെയും സന്യസ്തരെയും സഹായികളെയും സമ്മേളനത്തില്‍ അനുമോദിക്കും.

കോട്ടയം മെഡിക്കല്‍ കോളജ്, ജില്ലാ ആശുപത്രി, കുട്ടികളുടെ ആശുപത്രി എന്നിവിടങ്ങളിലായി ദിവസം ആറായിരം പേര്‍ക്കാണ് നവജീവന്‍ സൗജന്യമായി ഭക്ഷണം വിതരണം ചെയ്യുന്നത്. കൂടാതെ ആര്‍പ്പൂക്കര നവജീവനില്‍ ഇരുനൂറ് അഗതികളെയും സംരക്ഷിക്കുന്നു. രോഗികള്‍ക്ക് മരുന്നും ചികിത്സാസഹായവും ഉള്‍പ്പെടെ വിവിധങ്ങളായ സേവനപ്രവര്‍ത്തനങ്ങളാണ് പി.യു. തോമസിന്‍റെ നേതൃത്വത്തില്‍ നവജീവന്‍ നടത്തുന്നത്.

ഇന്നു രാവിലെ പത്തിന് നവജീവന്‍ ചാപ്പലില്‍ മാര്‍ ജേക്കബ് മുരിക്കന്‍ വിശുദ്ധ കുര്‍ബാനയര്‍പ്പിക്കും. 11.30ന് ഫാ. ജോര്‍ജ് ആന്‍റണി ആശാരിശേരിലിന്‍റെ അധ്യക്ഷതയില്‍ ചേരുന്ന സമ്മേളനത്തില്‍ മാര്‍ ജേക്കബ് മുരിക്കന്‍, പോള്‍ മാത്യു, അഡ്വ. വി.സി. ഇമ്മാനുവല്‍ വെട്ടൂര്‍, ഡോ. പി.കെ. ജയകുമാര്‍, ഫാ. സരീഷ് തൊണ്ടാംകുഴിയില്‍, ഏബ്രഹാം ആന്‍റണി എന്നിവര്‍ പ്രസംഗിക്കും. പി.യു. തോമസ് മറുപടി പ്രസംഗം നടത്തും.