കൊട്ടേക്കാട്-കഞ്ചിക്കോട് റൂട്ടിൽ രാത്രിയില് ട്രെയിന്റെ വേഗത കുറയ്ക്കാൻ തീരുമാനം
Thursday, May 9, 2024 4:00 AM IST
പാലക്കാട്: കാട്ടാനകൾ സ്ഥിരമായി ട്രെയിനിടിച്ച് ചരിയുന്ന കൊട്ടേക്കാട് മുതല് കഞ്ചിക്കോട് വരെയുള്ള ഭാഗത്ത് രാത്രിയിൽ ട്രെയിന്റെ വേഗത കുറയ്ക്കാന് തീരുമാനം. വനം വകുപ്പിലേയും റെയില്വേയിലേയും ഉന്നത ഉദ്യോഗസ്ഥരുടെ അടിയന്തര യോഗത്തിലാണ് തീരുമാനം.
നിലവിൽ ട്രെയിന്റെ വേഗത 45 കിലോമീറ്റര് എന്നത് 35 കിലോമീറ്റര് ആയി കുറക്കാനാണ് തീരുമാനം. കഞ്ചിക്കോട് മുതല് മധുക്കര വരെയുള്ള ഭാഗത്ത് നിലവിലുള്ള വേഗതയായ മണിക്കൂറില് 45 കിലോമീറ്റര് എന്നത് തുടരും.
റെയില്വേ ട്രാക്കിന് സമീപം സൗരോര്ജവേലി നിര്മിക്കാനും ധാരണയായി. ഈ പ്രദേശങ്ങളില് 4.60 കോടി രൂപ ചെലവില് 600 സൗരോര്ജ വിളക്കുകള് സ്ഥാപിക്കാന് റെയില്വേ നടപടി സ്വീകരിക്കും.
വനം വകുപ്പും ബിഎസ്എന്എല്ലും ചേര്ന്ന് എഐ കാമറകൾ ഉപയോഗിച്ച് ആനകളുടെ സഞ്ചാര വിവരങ്ങള് മുന്കൂട്ടി മനസിലാക്കി ബന്ധപ്പെട്ട ഉദ്യോഗസ്ഥരെ അറിയിക്കുന്നതിനുള്ള നടപടികളും സ്വീകരിക്കും.