കേരളഗാന വിവാദം: ശ്രീകുമാരന് തമ്പിയുടേത് ഉള്പ്പെടെയുള്ള പാട്ടുകള് പരിഗണനയിലാണെന്ന് അക്കാദമി സെക്രട്ടറി
Sunday, February 4, 2024 9:24 AM IST
തൃശൂർ: കേരളഗാനം എഴുതാനാവശ്യപ്പെട്ട് അപമാനിച്ചെന്ന ശ്രീകുമാരന് തമ്പിയുടെ ആരോപണത്തില് പ്രതികരണവുമായി സാഹിത്യ അക്കാദമി സെക്രട്ടറി സി.പി.അബൂബക്കര്. കേരളഗാനം പാട്ട് സംബന്ധിച്ച് അന്തിമ തീരുമാനമായിട്ടില്ലെന്ന് അബൂബക്കര് പ്രതികരിച്ചു.
ശ്രീകുമാരന് തമ്പി ഉള്പ്പെടെ നിരവധി പേരില്നിന്ന് പാട്ട് വാങ്ങിയിട്ടുണ്ട്. ഇവയെല്ലാം പരിഗണിക്കുന്നുണ്ട്.
അക്കാദമി നിയോഗിച്ച കമ്മിറ്റിയാണ് ഏത് പാട്ട് വേണമെന്ന കാര്യത്തില് അന്തിമ തീരുമാനം എടുക്കേണ്ടത്.ശ്രീകുമാരന് തമ്പിക്ക് വിഷമമുണ്ടാക്കുന്ന ഒന്നും തങ്ങള് ചെയ്തിട്ടില്ലെന്നും അദ്ദേഹം പറഞ്ഞു.
സർക്കാരിനായി കേരളഗാനം എഴുതാൻ ആവശ്യപ്പെട്ടിട്ട് അക്കാദമി തന്നെ അപമാനിച്ചെന്നായിരുന്നു സംവിധായകനും ഗാനരചയിതാവുമായ ശ്രീകുമാരൻ തമ്പിയുടെ ആരോപണം. സച്ചിദാനന്ദനും അക്കാദമി സെക്രട്ടറിയും ഗാനം എഴുതാൻ ആവശ്യപ്പെട്ടിട്ടാണ് ഗാനം എഴുതി നൽകിയത്. തുടർന്ന് അക്കാദമിയിൽ നിന്ന് ഒരു അറിയിപ്പും ലഭിച്ചില്ല.
തുടർന്ന് കേരളഗാനം ക്ഷണിക്കുന്നു എന്ന് ചാനലുകളിൽ പരസ്യം നൽകി തന്നെ അപമാനിച്ചെന്നും ഇതിന് സാംസ്കാരിക മന്ത്രി ഉത്തരം പറയണമെന്നും അദ്ദേഹം ആവശ്യപ്പെട്ടിരുന്നു.