മുംബൈ ഭീകരാക്രമണം: തഹാവുർ റാണയെ ഇന്ത്യക്ക് കൈമാറുന്നതിന് സ്റ്റേ
Wednesday, August 23, 2023 3:37 AM IST
വാഷിംഗ്ടൺ: 2008ലെ മുംബൈ ഭീകരാക്രമണക്കേസിലെ പ്രതി പാക് വംശജനായ കനേഡിയൻ ബിസിനസുകാരൻ തഹവുർ റാണയെ ഇന്ത്യക്ക് കൈമാറുന്നതിനുള്ള ഉത്തരവ് യുഎസ് കോടതി സ്റ്റേചെയ്തു.
കാലിഫോർണിയയിലെ ജില്ല കോടതി വിധിക്കെതിരെ 62കാരനായ റാണ ഒമ്പതാം സർക്യൂട്ട് കോടതിയിൽ അപ്പീൽ സമർപ്പിച്ചിരുന്നു. ഇത് പരിഗണിച്ചാണ് ഡിസ്ട്രിക്ട് ജഡ്ജി ഡെയ്ൽ എസ്. ഫിഷർ സ്റ്റേ ഉത്തരവ് പുറപ്പെടുവിച്ചത്.
അപ്പീൽ കോടതിയിലെ അന്തിമവിധി വരുന്നതുവരെയാണ് സ്റ്റേ നിലനിൽക്കുക. റാണയെ കൈമാറുന്നതിന് സ്റ്റേ അനുവദിക്കരുതെന്ന സർക്കാർ ശിപാർശ തള്ളിയാണ് ജഡ്ജിയുടെ നടപടി.