ഡ്രൈവിംഗ് സ്‌കൂള്‍ ഉടമകളുടെ സെക്രട്ടേറിയറ്റ് മാര്‍ച്ച് 13ന് : Deepika.com Kerala News |

Click here for detailed news of all items

ഡ്രൈവിംഗ് സ്‌കൂള്‍ ഉടമകളുടെ സെക്രട്ടേറിയറ്റ് മാര്‍ച്ച് 13ന്

Tuesday, May 7, 2024 1:14 AM IST

കൊച്ചി: സംസ്ഥാനത്തെ ഡ്രൈവിംഗ് ടെസ്റ്റ് പരിഷ്‌കരണത്തിന് ട്രാന്‍സ്‌പോര്‍ട്ട് കമ്മീഷണര്‍ ഇറക്കിയ സര്‍ക്കുലര്‍ പിന്‍വലിക്കണമെന്നാവശ്യപ്പെട്ട് ഡ്രൈവിംഗ് സ്‌കൂള്‍ ഉടമകള്‍ 13ന് സെക്രട്ടേറിയറ്റിലേക്ക് മാര്‍ച്ചും ധര്‍ണയും നടത്തും.

പ്രതിഷേധം തണുപ്പിക്കാനെന്ന പേരില്‍ ഇറക്കിയ ഉത്തരവിലെ ഇളവുകള്‍ കണ്ണില്‍ പൊടിയിടുന്നതാണെന്നും അപേക്ഷകരെ ഇത് കൂടുതല്‍ പ്രതിസന്ധിയിലാക്കുന്നതാണെന്നും ഡ്രൈവിംഗ് സ്‌കൂള്‍ സംയുക്ത സമരസമിതി ഭാരവാഹികള്‍ പത്രസമ്മേളനത്തില്‍ പറഞ്ഞു.

വ്യക്തമായ പഠനമില്ലാതെ പുറത്തിറക്കിയ സര്‍ക്കുലര്‍മൂലം ലേണേഴ്‌സ് പാസായി ഗ്രൗണ്ട് ടെസ്റ്റിനായി കാത്തിരിക്കുന്ന ഒന്പത് ലക്ഷത്തോളം വരുന്ന അപേക്ഷകര്‍ പ്രതിസന്ധിയിലാണ്. ഇത്തരത്തില്‍ കാലതാമസം വരുത്തി വീണ്ടും ലേണേഴ്‌സ് ഫീസ് വാങ്ങിയെടുക്കാനുള്ള തന്ത്രമാണോയെന്ന് സംശയിക്കുന്നതായി ഡ്രൈവിംഗ് സ്‌കൂള്‍ ഓണേഴ്‌സ് സമിതി പ്രതിനിധി ജയശങ്കര്‍ ആരോപിച്ചു.

ഡ്രൈവിംഗ് സ്‌കൂള്‍ ഉടമകള്‍ നല്‍കിയ ഹര്‍ജി അടുത്തദിവസം പരിഗണിക്കാനിരിക്കേ കോടതിയെ പോലും വെല്ലുവിളിച്ചാണ് സര്‍ക്കാര്‍ ഉത്തരവുമായി മുന്നോട്ടുപോകുന്നതെന്നും സമരസമിതി ഭാരവാഹികള്‍ പറഞ്ഞു. ഹരിഹരന്‍ നായര്‍, നാസര്‍ ഉസ്മാന്‍, വേണു മേലൂട്ട്, ഷുക്കൂര്‍ ബാബു, ശിവപ്രസാദ് എന്നിവരും പത്രസമ്മേളനത്തില്‍ പങ്കെടുത്തു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.